راجل و سيد الرجال
“جراري”
نشرت
قبل 6 أشهرفي

ياسين الرباعي:
– ؟آلو. توة موش كنت بحذاك لواش تطلب فيا
– ماك تبهذل الشيرة فيبالي قبل ما تخرج نقلك ما تبطاش نحبك تهزني نعمل دورة على قماش لبيت القعدة ولاوا يعملوا العار جرارينا قدام الناس

– بالله معتاك في خسارة الفلوس اوكم سماح خلي يا من عاش
– لا يشرهو الحق ، وانت وصغارك خليتو فيهم حاجة اوكن بصقة بلعقة بالعفان ، بعدلي قد ما نقلكم الماكلة كان في الكوجينة وانتم ما تفطروا وتتعشاوا كان غاد قال شنو خاطر التلفزة وما نحكيش عاد الرقاد كان فوق منهم عوض تشد بيتك وفرشك كيف الرجال غير هاكة راد الله عليا نبات وحدي وكل ليلة تقلي توة نخلط وتتمغط على ارضك ، والله الا ما ترزيكم فيهم توة نبدلهم جدد وغير واحد مازال يكدس عليهم الشقوفات الجدد
– مالا وين نقعدوا ؟ نبطلوا التلفزة زادة
– اشريلي تلفزة في بيت النوم والصغار كل واحد يشد بيتو ويشوف قرايتو ما هلكتهم كان انت يلقاوك غادي يشدوا جنبك
– يعني تحب شقوفات جدد للجراري وتلفزة لبيت النوم هكة
– ايه شبيه ما يشرقش عليا ، ما ريتش كريمة اختي كيفاش دارها نايمة بالنوم ومن بعد العشاء هي وراجلها في بيتهم يتفرجوا مع بعضهم؟
– وكيف نحب نتفرج وقت العشاء على الاخبار ندخل لبيت النوم بصحني؟ اذا هكك ميسالش
– توة نندب والا نستناهم يتلموا ، تخيل عشانا مرقة تدخلي بيها لبيت النوم ؟ راك ماشي تقتلني ناقصة عمر خيرلك ها النهار
– لا هكك الاعمار بيد الله
– تلوج عليها انت عاد مالا باش تمشي تاخذ وحدة اخرى ، ماني نعرفك اما ما تحلمش ييه هاكة النهار يرحم بورقيبة ،
– اهاه تعيش وترهز ، شعندنا فيه ايا هذا ياسر راهو في التلفون وخلي يا من عاش نبدلوا الجراري فرد مرة كان نجح محمود في الباك
– راك ماشي تجلطني محمود في التحضيري وهو يقلي ينجح في الباك ، ما يهمكش في الفلوس نعرف واحد بالدفعة يعطينا هزني برك
– يهزك العام شتنڨرز وانت تلبس بنادم كيف البرد القديم
– بالله شتقول وانت اتمتم عليا
– لا شي هاكة الريزو ضاع وبرة ، قتلك باهي توة نهزك اما نكملوا الالعاب الاولمبية والماتشات والله الكل وقت العشاء يبداوا وهني عليا نتفرج ، تعرفشي احنا نشريوهم وركبهم بعد وعلق توة يزي من فلوس التلفون
– كهو غير نكلمو على حاجة بجيب التقرنيط الكل اما وقت تضربها بالساعة مع امك وخوك بالتلفون موش خسارة هاكي
– توة شدخل امي ايا ريض خيرلك
– لا شماشي تعملي محسوب ، المهم ما تبطاش اليوم اهو نقلك
– ماشي للقهوة بعد الخدمة تن … تن … تن ...

تصفح أيضا

يس الرباعي:
-ابويا ابويا توة كنت نلعب في الكورة ونحب نغسل راسي ودبوسة الغاز وفات دبرلنا دبوسة ماشي نكدسوا هكة ياخي

– بالله سكر عليا حلقك انا توة جمعة لا صلاة لا عبادة وما غسلتش راسي ، ما قلك حد العب الكورة امسح لحمك بالكاسة وبرة
– هاكة فاش عاطي انت كان امسح بالكاسة كيف ما عملتلي انا عوض تخرج تشد الصف وتجيبلنا دبوسة
– هكة اريح انا ماذبيا يكمل مقطوع
– بالله شتقول واتمتم عليا
– لا يا روحي قتلك اهو وصيت صاحبي قلي توة ندبرلك دبوسة
– اهاه استنى يا دجاجة عوض تمشي انت ماني نعرفك الفم الحارك … وبرة
– ايا سيب علينا من الغاز وحضر روحك نمشيوا لسي التيجاني جارنا قلك طاح بالموبيلات شقت عليه كرهبة
– لا محسوب جاتني مرتو وقت طهرنا رامي ، ما نمشي لحد اهو نقلك تحب تمشي اوكي الثنية قدامك ، ماهو الي عطاك على الحومة انت وزيد تعجبك مرتو وين تاراها ما تنحيش عينيك من عليها ، على هاكة الشبشوبات الي صابغتهم محسوب والا خاطر والعة بروحها موش كيف همي غير نقلك نقيد نعمل السبور والا ماشية للحجامة يركبك ستين عفريت وولي ما عندكش فلوس ووين نخرجوا عينيك يقعدوا يتشاعلو تقول مرتك في وجها كرع ، بالله خليني ساكتة موش على خاطر ما نتكلمش …
– يا طفل خرج هاكة الشقف وبرة نلوجوا نلقاوشي دبوسة غاز حتى كان لازم نبات في الصف توة نبات …


ياسين الرباعي:
– اهو جاء اكتوبر مااطولو وما اندبو سبتمبر يا راجل
– الكل بالنقص من عمرنا محسوب مادام شيء لا الطويل ولا القصير
– ايا تراه فاش يذكرك اكتوبر على الاول؟

– فاش يذكرني بالله ماهو في البلح والرمان يربخوا في عز الخريف
– اما بلح يراني نبح وانت الي عطاك على كرشك ، نقصد اكتوبر شنو يجي فيه؟
– فمة عيد الجلاء وقيلا زادة فتوح ولد جارنا الصادق ماشي يكتب الصداق والاشهار في الصيف قالوا
– والله قريب نشق دبشي ونقول فيها وووه … شدخلني في صداق فتوح انا . نقصد 8 اكتوبر باش يذكرك؟
– ثمنية ، ثمنية … موش فيبالي نهارت صبينا هاكة الخرخوط من ظهرة باش خرجنا الميحاض وبيت البانو باش كبرت الكوجينة
– اما كوجينة يراني في تركينة خليك ترتاح مني ، 8 اكتوبر موش نهار جيت عطيت فيا الكلمة وخذيتني؟
– بالله شذكرك فيه ها النهار ؟
– طرشة تحدث في مجنونة تسمعشي بها ، ويزيني من الدرويش متاعك
– مالا فيشطة تلقاه جاب ربي قتلي خلي نوصي على دوارة على وسع طيبهانا نهارتها والا ملخة كان تحب المهم قلي باش نوصي غدوة؟
– نندب والا نستنى يتلمو ها الليلة معاك ، انا نقلو ذكرى خطوبتنا وهو يقلي دوارة ، راهو لازمك تجيبلي كادو في ها المناسبة كيف استبرق بنت خلتي راجلها كل عيد خطوبة وعيد زواج يجيبلها يا فردة ذهب يا لبسة سمحة يا صباط يا كبان سعدي ووعدي ومعاهم شكلاطة ووردة
– توة لازم تحرقها المفاجاة يا مرتي ، ايا مادام انت جبدت الحكاية انا وصيتلك على زوزين قلاسط بشكير تسخن بيهم سقيك في الشتاء وانت كل ليلة تلسعني بسقيك في الفرش وقلت نجيبهملك نهار عيد خطوبتنا
– هكة … قلاسط وبشكير زادة ؟ زايد الرجال عندهم اماليهم والحب لاماليه يشرق عليا محسوب انا
– انا راهو كل نهار عندي نهار حب معاك يا رتيبة موش كان نهار خطوبتنا
– كولني كولني باللوغة ماهو نعرف زهري
– حقة جبتلك ساشاي هندي اوكة بحذا العتبة اغسلو وخليه يبرد مشوار للسهرية …


ياسين الرباعي:
– يا بويا ابويا خبروشي على القراية وقتاش ترجع؟

– شوف اسيدك زعمة زعمة حارص على القراية وانتم كان تلقاوا تكملوه العام هكة ما تكرهوا ، لا ما خبروش كمل شد الدار بزهري المقود طول النهار في خليقتي انت وخواتك وما ترقدوا الا ما ترقدونا انا وامك
– ايا شبيك على امو ديما موش عاجبتك؟
– شبيك تسمع كان الكلمة التيلانية كيف الطرشة تسمع كان الكلمة الخايبة ، قتلو ما لقيتش فضى في امك وهوما عابديلنا خليقتنا ها الصغار
– الي يسمع يجد عليه ، لا محسوب وقت هوما موش هوني قطعت روحك ، خليني ساكتة خير ، ايا قلي شنعملوا عشاء
– اعملنا فم كسكسي والله عندنا مدة عليه
– توة كسكسي في الليل وبعد تلقاهالي سبة تقلي واكل الرزين؟ فك علينا توة نعملوا مصلي خفيف
– باهي الي تعمل مبروك حتى المصلي باهي
– شلعزة ما تشتهي شي كيف الرجال قلي شنو شاهي ونعملك
– باهي اعملنا مكرونة بالصالصة وحرحرها شوية
– اووه عليا ، ناقصة انا المكرونة تطرش وترصيلي نغسل في الغاز بعد والرخامة بالله تقول عامل عليا بالعاني ياخي خاسر على بويا انا وقت جهدي يطيح في الكوجينة ، ايا قلي شتحب يا زوجي وشنو شاهي؟
– اعمل الي يجي ميسالش تعرفني ناكل كل شي المهم ما تعملوش مدهن باش ما يعمليش الجاير
– توة ماكلتي تعملك الجاير ولات ، مالا عاد امو الي تطيب الحر والقوي وتحشي يدها في حكك البزارات ما يعملش جاير هاكة وتطيبي العزيز الغالي يعملوا الجاير ، ايا تحبشي كمونية؟
– ايه والله فكرة ايا برة مشات معاك
– ابويا ابويا قاتلك امي وين خليت باكو المكرونة فلة نومرو 2 باش ترش العشاء
– خرررف عرفتها قرعة انا ملي ما قالولكمش وقتاش ترجعوا للقراية ، انتم والمكرونة الجارية ياسر عليا راهو…


هل يذهب جيسي جيمس، باحثا عن الذهب… إلى غزّة؟؟

بن يحيى ومولدية الجزائر يفوزان بكأس السوبر

هل يستفيد الصينيون من غلق وكالة المساعدات الأمريكية؟

الضفة الغربية… الاحتلال يطرد السكّان، ويحوّل منازلهم إلى ثكنات

تضامنا مع صديقه نتنياهو… ترامب يفرض عقوبات على الجنائية الدولية
استطلاع
صن نار
- جور نارقبل 16 ساعة
هل يذهب جيسي جيمس، باحثا عن الذهب… إلى غزّة؟؟
- رياضياقبل 23 ساعة
بن يحيى ومولدية الجزائر يفوزان بكأس السوبر
- صن نارقبل يومين
هل يستفيد الصينيون من غلق وكالة المساعدات الأمريكية؟
- صن نارقبل يومين
الضفة الغربية… الاحتلال يطرد السكّان، ويحوّل منازلهم إلى ثكنات
- صن نارقبل يومين
تضامنا مع صديقه نتنياهو… ترامب يفرض عقوبات على الجنائية الدولية
- جور نارقبل 4 أيام
ورقات يتيم… الورقة 105
- ثقافياقبل 4 أيام
حي الزهور… مهرجان ربيع الطفل بداية من الغد
- صن نارقبل 4 أيام
حتى مستشاروه لم يكونوا على علم بها… خطة ترامب للاستيلاء الكامل على فلسطين