دوجة ومجيدة حلّوا الحلو

– ايا جاوشي الصواني من الكوشة يا دوجة خلي نعبيوا كعبات الحلو في التنيكات ونقصموهم قبل ما يمغرب المغرب

– اهو نستنى , بعفت سيدك النوري ياقف على الكواش خير ما يحرقهم وقلي ياسر عليا الصواني اوكة يباركلو عمك سعيد قلو وقت يحفروا ناديني ندخلهم لدوجة بالكميونة وفرد مرة قال يتعدى يجيب مهيرية من الحمام خير ما تدخل على سقيها

– توة هافا عقلها كنتك اخر فربة في الحلو تمشي للحمام ؟ حل شجارالو كان غسلت راسها في المطهرة وزيد انا وين ما نسال عليها يا في الحمام يا في المطهرة وخسارة الماء فوق كل شي ياخي بالقمل هي ؟ ليدك في العاهد الله ها الكناين ماشي يطيروا على ايامهم ما نعرفش على اخفتهم كيفاش ولاوا

– ماهي عاد زعمة زعمة عملت اعمانا ورحات الڨطو وسبطتت المقروف تقلك نمشي نغسل حالتي , خليها تصفى بعدلي محسن يقلها ديما مشي للحمام , محسوب ما يتعدالهمش بلاش حمام , هي بلي تفوح زميط خلي على الاقل تفهر خليقتها

– يا دوجة انا للتوة موش عارفة لين جايبتنا سحنونة تحل اعمانا الحلو , راهي فركتلي لحمي وهي هافا ما يصيرش هكة , احنا الڨطو نڨرڨبوه يجي هشوش وخفيف , قالبك متاع المقروف يا مجيدة مشوم , برة يشوم فعلها الفرخ يزقق بوه ولينا , وكل شي عديتو الا انها قامت سنجات ولدها وجات طول كدست على الميدة تسبط في المقروف , جاب ربي ريتها وفكيتو من يدها , الي راد الله كان يسمع سيدك قادر لا يحطو في حلقو زڨلام ومشوم في ماكلتو ماك تعرفو , حتى خطرات تجيبنا صحين تفوقنا ماكلتها يقلي هز عليا متاع سحنونة لا نفوقو ولا نقربلو , تقوم انت تجيبها لحلان الحلو يا دوجة ؟

– هاكة عمايل سيدك النوري يا للا , شافها عند عمك سعيد وهو ياخف في قفية الحلو عاد قاتلة اشه ياخي ماشي تعملوا كعبات مقروف وڨطو , قلها ايه وايجا مع دوجة نعرف حلانك يشره , وهي ما كانتش من العاكسين كركرت شلاكتها وجات نقومشي نطردها يا مجيدة برة يعطيها تمسيدة , اوكة جاب ربي ما حطيناها تعمل شي وتلهات بصغيرها وبمريغة التاي ويصفى توة نعبيلها داڨرة كيف يجي الحلو ورات العين طاب الخاطر , اما الحق نيفرة شالتنا من الغريق , مرتوبة هاكي المرا ونفيفة وتشره , حتى القصان خليتها تقص هي الكعبات جابتهم على فرد كعبة والله نخلي فيهم في الصواني تقول نخلي في الفرفار والا فرتار والا شسمو الكعبة للكعبة , قاتلك حفظت على حماتها دباشة وفاتتها شخلى حموها يقلها يا نيفرة ما يحلالي شي الا ما تحطهولي بيدك , وهوما هكة هكة بيها دباشة وراجلها

– لا تشره هاكي المرا الحق اوكي جات واستعنات وعملت اعمانا , موش كيف هاكة الزوز حطايم الي عندي وحدة صبحت مريفة قالت , ما فهمتش منين جاها المرف وهي البارح نسمع فيها مع المنجي للصباح لندرى فاش يحكيوا , وكمونة الي دفنلها بشيمتها في البالة طول النهار تشري في القلاصن والبونتيات لامها والقلاسط للتوفيق , قامت على الصباح وقالت يا بالة يراها كي الزبالة وما تلقاش سبالة , وها , يعطيك ربي بعد كل وحدة بعين اصح مناش تعبي داڨرة وتقول نفوق امي الحلو تقول عملوه بمكاسرهم , ايا فك عليا منهم انا نتفكرهم ونولي نرعش بكلي

, … توة نبينا ونصليوا عليه يا دوجة , هاكي الحوسة بعد شعملت فيها انا والله غير بس مشيت نحفر فطور سيدك قادر وخليتك وحدك

– شعندي نعمل يا مجيدة , مهيرية ماهي مسشات للحمام ورصاتلي انا وقلالة مرت الباشا , هي دورتها رزينة وحركتها متاع تشفتير اما خير من بلاش تنحى الكافر وكدس المسلم وكملت هب هب كيف مفهوبة الشيرة وقالت عندها شوية حنة ماشي تعمل سقيها ويديها واوكي في بيتها مشتحة سقيها على المخدة كيف مطهر العرب , قلتلها بنيتي تشيح والا تقعد حنتك يجيوا الصواني ما عليك كان تقوم تقص اعمايا وتعبي القزادر , قلت باهي وينعم الله عليها كان ما شومتش السلكة في المطهرة وغسيل الراس وهاكي الحنة

– هكة راد الله علينا يا دوجة , نافسة وعروسة في ليلة عيد , توة يجي سعيد بالصواني ونقصوا وحدنا يقص عنقهم لا يسدوا لا يردوا ها البنات تقول رماهم علينا الباي

– حتى تارا عاد سعيد وقتاش تخرج هاكي المغبونة من الحمام , ديما وين ما يجيبها نقلها شبيك لتو يقلي يا دوجة راهي بطات الداخل وقالت الحمام معبي

, والله يجعل منو هاكة الراجل يسلم في حانوتو ويمشيلها بالفمة ويوسع بالو

– مالا تعرفشي كيفاش , انا حليت القزادر يتشمسوا نمشي نمسحهم خير ما يقوطعنا الحلو ونجيبهم ونجيك , وفرشنا في الوسطية نقصوا الكعبات موش كيف الصباح فرشتنا في السقيفة والي يدخل يفحج على الصواني وبلايط العجين

– باهي يا مجيدة المهم ما تبطاش , خلي نشعلوا المجمارة ونعملوا كاس تاي ونكدسوا بالوهرة وحدنا ونحكيوا واحنا ديما كيف مفاهيب الشيرة اللطف نجكيوش كليمتين على بعفهم