ياسين الرباعي:

– توة ما تقليش اشبيك تخرج هكة تقول ما عندكش دبش كان الذل والقل تلبس فيهم، والله الا ما نرزيك فيهم حتى يجي مولى الاماعن برك ناخذ بيهم بلاطة والا دويڨرات

– بالله فك عليا شكون راني محسوب ماني خارج نقضي وفي القهوة بالكشي ماشي للعرس انا

– ياخي لازم شكون يراك ، ماهم يقولوا مرتو موش لاهية بيه ، تصفى انت شيهمني فيك اما الناس يقطعولي وجهي بعد

– تهنى ما راني حد

– باهي كانك فاضي العشية وصلني لدار حميدة بنت خالي قالوا راجلها طاح نمشي نطير السّوّ

– لا راهو ما تلقاهاش في دارها ، ماني ريت اختها سجيعة في سوق الخضرة وتسلم عليك حقة وقاتلي حميدة ضيفة عندها

– ويقلي ما ريت حد ، يكب سعدي ما تقتلني ناقصة عمر كان انت ، وعلاش ما قتليش دوب ما جيت وانا من الساعة نحدد في روبتي ، خاسر على بويا نتعب في الفارغ

– والله لا جاء لبالي نسيت ، اما كان تحب نمشيوا لدار التيجاني ولد عمتك ماني ريت بنتو سوسن في البلاد هي وخطيبها وقالولي لازم تجيوا الليلة حتى بابا ماشي يكلمك عندنا ختم في الدار

– بالله ريتشي شكون اخر بالهيبر الي لابسو وخرجت بيه ، وهاكي سوسن تحكي لامها وامها ما تتقطعش و تبدى تتفوحج عليا وعلى لبستك ،ما نمشيش والله لا عفصتها مادام تحب تخليني ضحكة بين اهلي

– يا رسول الله توة على لبسة متع شارع عملتلي القمل ، باهي خلينا هوني موش لازم على بونا المشيان

– لا محسوب هوني لاهي بيا انت ، عملت شعري وضرفت حواجبي مالا فقت بيا والا قتلي صحة ، زايد لشكون تحرقس يا مرت الاعمى

– توة ناقص انا ، والله ما فقت بها بلي تفوح زميط شي ما يظهر عليها الكازي

– بالله شتمتم وشتقول ياخي ما عجبكش شعري؟

– لا يا روحي والله ماشي نقلك ملي دخلت محلاه واتاك ياسر غير تلهينا في الحديث وبرة ، ايا صحة مزيان

– بالعكس ما عجبنيش انا قلت توة نرجعلها تريڨلهولي

– لا خليه فيبالي باهي راهو

– ماهو المرة الي فاتت عملتو هكة ما عجبش البنات خواتي

– اهو انا عجبني شدخل خواتك البنات

– بالله يزي عليا انت بــالكشي نعمل فيه ليــلك ، نستر بيــه وجهي الليــلة في السهرية وبعد نجي نتغلف بالفيــكس ونربط فولارة في راسي نحسوا مــاشي يطرشق بالوجيـــعة وقيلا خرجت سخـــونة من الحجـــامة ….

ياسين الرباعي:

– يا بويا ابويا ، نحب عشرة لاف غدوة عندنا تكويرة

– لين زادة ياخي تلعبوا على الفلوس يا ابن الكلب والله لا تحشم

– اما فلوس ماهو حق التاران نكريوه وزيد بايي في دبابس الماء والقهوة

– اما تاران الي تكريه ، امشي للبورة وكور للصباح وهز معاك بيدون ماء من الماجل

– انت ماك نعرفك يا راجل كيف تكب السعد فرد مرة ، توة من دون اندادو ياخي ماهو اعطيه وخليه يلعب شلعزة ، وانا زادة حطلي فتيتة فلوس راهو مية والا مية وخمسين نلف ماشية للجم مع دلندة اختي نلقاشي زربية والا سربيس والا ثريا الي نلقى المهم حاجات لازمينا هذم وكل مرة ناخذ حويجة

– توة بالله زربيتنا اشفيها وانت الي عطاك على الشريان والا ماعونا اشبيه اما الثريا موش لازم هاك انت في الدار يزي تضوي خير من الف ثريا

– اح عيني وقيلا استهويت ، شوف ما ارطب حديثو في الباطل منين جاك ها الكلام السمح؟ قولها لجماعتك متع الفيس بوك هذي يصدقوك اما انا اعطيني الفلوس

– راهو الكنترة واقفة وما فمش سلعة في الجم لوح خلي مرة اخرى وزيد والله زربيتنا سمحة كان تحب هز خبيها يجيناشي حد و افرشنّا الكليم الي عطاتهولك امي

– شوف عاد شيقول ، كوسالة النمر السمحة لاختك والمرڨوم القروي لمرت خوك هاكي ماهي ترعش منها وانا بايي كليم الشوالق ، ارشقوا عليك هاكة ، بالله خليني ساكتة خاطر وقت تجبدلي عليهم لحمي يتفرك ويركبني ستين عفريت والا وقت جات من العمرة مدتلي سبحة وقرطاس بخور تقول مخصوصة ليهم انا وانت تجري وتجري معاها اما اختك القفطان العزيز الغالي جابتهولها

– توة شدخل الكلام هذا في مشيانك للجم ، برة امشي اوكة الثنية قدامك وتوة نخليلك الفلوس

– كهو غير نجبدلك انا ترجعني غالطة وزيد تقلي اوكي الثنية قدامك بعدلي تحب ترتاح مني عوض يقلي نمشي معاك ونهزك ، ايا ورحمة بويا لا مشيتها وخلي حتى نمشي مع سجيعة بنت عمي لتركيا اوكي في الصلاعة ماشية وتقرق بيا

– لا والله تركيا الكل في الجم وارخص لين ها المشي والجاي وتزنڨيل الدبش؟ اهم مية وخمسين نلف وامشي مع دلندة وغدوة احد تلقاوا كل شي …

ياسين الرباعي:

——————————-

– اليوم سبت عشية عاد اخرج حوس بيا وانا لا نخرج لا ندخل

– لا خلي مرة اخرى والله عاطي كلمة للاولاد يحبوا بعملوا طرح بيلوت

– البيلوت ابجل من مرتك هواشي ! وانت يا عند امك ياعند صحابك وقدام التلفزة غير لقيتني ساكتة

– باهي خليك ساكتة خير ايا اخرج نحوسوا وين نمشيوا ؟

– نحب نعمل دورة على الدبش والصبابط نشوف شفمة جديد وهزني لهاكة الي حل جديد متع الماعون يحكيوا عليه عندو برشة حاجات سماح

– مالا تعرفشي كيفاش نوصلك للبلاد اعمل دورتك ووقت تكمل كلمني نجيك ، تعرفني ها الدوران في الحوانت ما نحبوش

– كان معايا انا ما تحبوش اما وحدك طول النهار تحوم ، علاش ياخي ماهو اعطي راي معايا واختارلي شنلبس ، شي الرجال عندهم اماليهم الكل يلبسوا نساهم وانا لا مرة جبتلي حاجة والا عطيت رايك في حاجة تقول نلبس فيهم لصاحبي

– موش هكك اما نعرف ذوقي ما يعجبكش ياخي موش جبتلك مرة سودلي قمت عطيتو لاختك قتلي متع عزاوز والا مرة في الحانوت قتلك خوذ الصباط هذا خليتني غاد وقتلي ذوقك متع مهارز وخذيت الي حبيت

– المهم معايا وعطيت رايك مالا تخليني كيف الهجالة وحدي؟

– انتي ما يعجبكش العجب وتدخل للحوانت الكل وانا في جرتك تعرفني نفد وما نحبش دوران الحوانت

– كيفك تفد لين واخذ مارا قعدت عازب زلال ، غير بزهري خذيتك انا والله حفاوا عليا اشكون وشكون غير خليني ساكتة وربي يسمحو بويا بفعلو

– في هذي عندك الحق ربي يرحمو بفعلو ويسمحو كيف وافق عليا من دون الي حفاوا عليك ، ايا خرجتشي وما تضيعش وقت خلي نرجعك بكري ونخلط على الاولاد

– لا اولاد لا كراد بعد ماشين نتعشاوا عند امي، سجيعة اختي غادي الليلة وماشي نعملوا كعبات يويو انا وياها باش تلقى ما تاكل الصباح انت وصغارك

– عاد عملتوه العشية ونجيك غادي في العشاء

– دبر فيا انتي عاد ، نحب نحوس انا ونخرج للحوانت وانتي معايا زعمة زعمة عندي راجل كيف راد عليا ربي

– ايا برة زعمة زعمة هاك خرجت وزعمة زعمة عملت اليويو مع سجيعة وانا احسبني زعمة زعمة ما مشيتش لصحابي …