زيْتُ نار
من تداعيات الثورة
سي الزاهي
غيبة وخيبة يا وخياني
من همّي و من همّ زماني
لبلاد الخضراء تستنجد:
هاذوما سلبوني ألواني
سلبوا الفرحة و التبسيمة
وخلاوني في ذاتي نعاني
حسبت الشمس ملات الخيمة
ياخي طلع الضو برّاني
في إسمي ، الزاهي نحتار
منين الزهو .الدهر كواني
هزّوها بمقص النار
والحرق.. اختصاص رباني
شياطين الإنس هوما الغلبه
هوما اللي دايا الدخلاني
في بالي فاهم اللعبة
لكن نرجع ، ما أغباني
مضروب .. موجوع .. موش مرتاح
بين لِمْطرقة و السنداني
راس الزاهي تمهمش راح
و ين الهربة يا وخياني ؟
اذي حلقة طالت بينا
في المسلسل الفنطازي
اذا تحسب روحك زينة
تطلع كازي مل لكوازي
لعصافر هجرت شجرتها
حرقت للبر الطلياني
و الصحرا زدناها صحرا
و قلوبنا تقهرت عيناني
بصعوبة صرنا نتنفس
في تونس العفيفة الحره
ربي عالظالم .. يتهرس
والا يتلوّح في حفرة
يا زاهي ، راك ديما زاهي
اذا بريت من هاك الدبره
وقلّعت الساهي و الداهي
من داخل البلاد ومن بره
حكاية صعيبه ، موش محالة
لو ناخذ مالدرس العبره
و حاربنا غزو المنقالة
لازم تستجيب القدرة
