ياسين الرباعي:

– يا بويا ابويا خبروشي على القراية وقتاش ترجع؟

– شوف اسيدك زعمة زعمة حارص على القراية وانتم كان تلقاوا تكملوه العام هكة ما تكرهوا ، لا ما خبروش كمل شد الدار بزهري المقود طول النهار في خليقتي انت وخواتك وما ترقدوا الا ما ترقدونا انا وامك

– ايا شبيك على امو ديما موش عاجبتك؟

– شبيك تسمع كان الكلمة التيلانية كيف الطرشة تسمع كان الكلمة الخايبة ، قتلو ما لقيتش فضى في امك وهوما عابديلنا خليقتنا ها الصغار

– الي يسمع يجد عليه ، لا محسوب وقت هوما موش هوني قطعت روحك ، خليني ساكتة خير ، ايا قلي شنعملوا عشاء

– اعملنا فم كسكسي والله عندنا مدة عليه

– توة كسكسي في الليل وبعد تلقاهالي سبة تقلي واكل الرزين؟ فك علينا توة نعملوا مصلي خفيف

– باهي الي تعمل مبروك حتى المصلي باهي

– شلعزة ما تشتهي شي كيف الرجال قلي شنو شاهي ونعملك

– باهي اعملنا مكرونة بالصالصة وحرحرها شوية

– اووه عليا ، ناقصة انا المكرونة تطرش وترصيلي نغسل في الغاز بعد والرخامة بالله تقول عامل عليا بالعاني ياخي خاسر على بويا انا وقت جهدي يطيح في الكوجينة ، ايا قلي شتحب يا زوجي وشنو شاهي؟

– اعمل الي يجي ميسالش تعرفني ناكل كل شي المهم ما تعملوش مدهن باش ما يعمليش الجاير

– توة ماكلتي تعملك الجاير ولات ، مالا عاد امو الي تطيب الحر والقوي وتحشي يدها في حكك البزارات ما يعملش جاير هاكة وتطيبي العزيز الغالي يعملوا الجاير ، ايا تحبشي كمونية؟

– ايه والله فكرة ايا برة مشات معاك

– ابويا ابويا قاتلك امي وين خليت باكو المكرونة فلة نومرو 2 باش ترش العشاء

– خرررف عرفتها قرعة انا ملي ما قالولكمش وقتاش ترجعوا للقراية ، انتم والمكرونة الجارية ياسر عليا راهو…

ياسين الرباعي:

– توة ما تقليش اشبيك تخرج هكة تقول ما عندكش دبش كان الذل والقل تلبس فيهم، والله الا ما نرزيك فيهم حتى يجي مولى الاماعن برك ناخذ بيهم بلاطة والا دويڨرات

– بالله فك عليا شكون راني محسوب ماني خارج نقضي وفي القهوة بالكشي ماشي للعرس انا

– ياخي لازم شكون يراك ، ماهم يقولوا مرتو موش لاهية بيه ، تصفى انت شيهمني فيك اما الناس يقطعولي وجهي بعد

– تهنى ما راني حد

– باهي كانك فاضي العشية وصلني لدار حميدة بنت خالي قالوا راجلها طاح نمشي نطير السّوّ

– لا راهو ما تلقاهاش في دارها ، ماني ريت اختها سجيعة في سوق الخضرة وتسلم عليك حقة وقاتلي حميدة ضيفة عندها

– ويقلي ما ريت حد ، يكب سعدي ما تقتلني ناقصة عمر كان انت ، وعلاش ما قتليش دوب ما جيت وانا من الساعة نحدد في روبتي ، خاسر على بويا نتعب في الفارغ

– والله لا جاء لبالي نسيت ، اما كان تحب نمشيوا لدار التيجاني ولد عمتك ماني ريت بنتو سوسن في البلاد هي وخطيبها وقالولي لازم تجيوا الليلة حتى بابا ماشي يكلمك عندنا ختم في الدار

– بالله ريتشي شكون اخر بالهيبر الي لابسو وخرجت بيه ، وهاكي سوسن تحكي لامها وامها ما تتقطعش و تبدى تتفوحج عليا وعلى لبستك ،ما نمشيش والله لا عفصتها مادام تحب تخليني ضحكة بين اهلي

– يا رسول الله توة على لبسة متع شارع عملتلي القمل ، باهي خلينا هوني موش لازم على بونا المشيان

– لا محسوب هوني لاهي بيا انت ، عملت شعري وضرفت حواجبي مالا فقت بيا والا قتلي صحة ، زايد لشكون تحرقس يا مرت الاعمى

– توة ناقص انا ، والله ما فقت بها بلي تفوح زميط شي ما يظهر عليها الكازي

– بالله شتمتم وشتقول ياخي ما عجبكش شعري؟

– لا يا روحي والله ماشي نقلك ملي دخلت محلاه واتاك ياسر غير تلهينا في الحديث وبرة ، ايا صحة مزيان

– بالعكس ما عجبنيش انا قلت توة نرجعلها تريڨلهولي

– لا خليه فيبالي باهي راهو

– ماهو المرة الي فاتت عملتو هكة ما عجبش البنات خواتي

– اهو انا عجبني شدخل خواتك البنات

– بالله يزي عليا انت بــالكشي نعمل فيه ليــلك ، نستر بيــه وجهي الليــلة في السهرية وبعد نجي نتغلف بالفيــكس ونربط فولارة في راسي نحسوا مــاشي يطرشق بالوجيـــعة وقيلا خرجت سخـــونة من الحجـــامة ….

ياسين الرباعي:

– يا بويا ابويا ، نحب عشرة لاف غدوة عندنا تكويرة

– لين زادة ياخي تلعبوا على الفلوس يا ابن الكلب والله لا تحشم

– اما فلوس ماهو حق التاران نكريوه وزيد بايي في دبابس الماء والقهوة

– اما تاران الي تكريه ، امشي للبورة وكور للصباح وهز معاك بيدون ماء من الماجل

– انت ماك نعرفك يا راجل كيف تكب السعد فرد مرة ، توة من دون اندادو ياخي ماهو اعطيه وخليه يلعب شلعزة ، وانا زادة حطلي فتيتة فلوس راهو مية والا مية وخمسين نلف ماشية للجم مع دلندة اختي نلقاشي زربية والا سربيس والا ثريا الي نلقى المهم حاجات لازمينا هذم وكل مرة ناخذ حويجة

– توة بالله زربيتنا اشفيها وانت الي عطاك على الشريان والا ماعونا اشبيه اما الثريا موش لازم هاك انت في الدار يزي تضوي خير من الف ثريا

– اح عيني وقيلا استهويت ، شوف ما ارطب حديثو في الباطل منين جاك ها الكلام السمح؟ قولها لجماعتك متع الفيس بوك هذي يصدقوك اما انا اعطيني الفلوس

– راهو الكنترة واقفة وما فمش سلعة في الجم لوح خلي مرة اخرى وزيد والله زربيتنا سمحة كان تحب هز خبيها يجيناشي حد و افرشنّا الكليم الي عطاتهولك امي

– شوف عاد شيقول ، كوسالة النمر السمحة لاختك والمرڨوم القروي لمرت خوك هاكي ماهي ترعش منها وانا بايي كليم الشوالق ، ارشقوا عليك هاكة ، بالله خليني ساكتة خاطر وقت تجبدلي عليهم لحمي يتفرك ويركبني ستين عفريت والا وقت جات من العمرة مدتلي سبحة وقرطاس بخور تقول مخصوصة ليهم انا وانت تجري وتجري معاها اما اختك القفطان العزيز الغالي جابتهولها

– توة شدخل الكلام هذا في مشيانك للجم ، برة امشي اوكة الثنية قدامك وتوة نخليلك الفلوس

– كهو غير نجبدلك انا ترجعني غالطة وزيد تقلي اوكي الثنية قدامك بعدلي تحب ترتاح مني عوض يقلي نمشي معاك ونهزك ، ايا ورحمة بويا لا مشيتها وخلي حتى نمشي مع سجيعة بنت عمي لتركيا اوكي في الصلاعة ماشية وتقرق بيا

– لا والله تركيا الكل في الجم وارخص لين ها المشي والجاي وتزنڨيل الدبش؟ اهم مية وخمسين نلف وامشي مع دلندة وغدوة احد تلقاوا كل شي …