“الكرّيطة” … جديد الأزهر الضاوي

-* “نامي ” يمّة “..على “الكرّيطة”..

ونادي “رجال القيْرَوان”..؟؟

عشرة سنين بعد “البرويطة”..

هاكا علاش قدْروا “الاخوان”..؟!!

هاكا علاش قدروا في “الثورة”..

جابوا ليك ..”الزّمَقتال”..!!!

وحَديث على “المرأة عوْرة”..

و ” فقر”.. و” رَشّ ” مع “اغتيال”..

عَقْروها وهيّ في الدّورة..

وصارت مرتع للجُهّال..

وشوفي معايا توّة الصورة..

في عهد “الشيخ الدجال”..

الأموات البرّة منشورة..

تقولش ضاربنا زلزال..؟؟!!

وتونسنا تندب مقهورة..

ونُصّ الشعب عايش ” زَبّال “..؟؟!!

شوفي ” يمّة “.. غير قوليلي.

راني حرت وحار دليلي..

نصرخ ونعيّط ” يا حليلي “..

اش عملوا فينا الانذال…؟!!

نامي” يمّة “.. نامي نامي..

والموت ورايا وقدامي..

وأحبابي قعدولي أسامي..

مردومين تحت السّيمان..؟؟!!..

واللي حبّيت نودعهم..

ما نجمتش نودعهم ..؟؟

جاهم “الكوفيد” صرعهم..

قْبَل ما يجيهم ” الاوكسيجان”..؟؟!!

نامي محلاها “الكرّيطة “..!!

ودوري بيها ع الخريطة..

وامشي بيها ” سبيتا سبيتا “..

تلقيها الكلة “القيرْوان”..؟؟!!

ولا منهو سامعلك عيطة..

اللي لابس ثوب البهتان..

واللي يشطح ب”ترُمْبيطة”..

عايش في سالف الأزمان..؟!!

موتي “يمّة ” في ” الكرّيطة “..

ك”النملة” ولا “الفرزيطة”..

راهو موتك حاجة بَسيطة..

لْواه تنكّد ع “الشيفان “..؟؟؟

موتي لا عيطة لا زيطة..

من غير ما تنحّي ” التقريطة”..

محلا الموتة.. في ” الكرّيطة “..

فيها “الراحة والامان “..؟؟!!!

موتي “يمّة”.. موووتي.. موووتي..

تجيك ” الرحمة من الرحمان”..؟؟؟