“توتة”

ماهو عاد كملنا الامتحانات ورتحنا من قوم اقرى وجيب كراستك نعرضلك والحق المدام كان عدات تجي الاولة بعدلي كراس المحفوظات شربتها شربان والانتاج الكتابي الكل خدمتو وحفظتو للصغار باش يصبوه صبان وحتى المنسج والاشغال خدمتهم هي وخذات عدد باهي الحق ،

ايا قلنا نمشيوا للتوتة نعديوا العشوية وان شاء الله ما يطلعش فمة ماتش كورة في الستاد ويرجعونا منين جينا ويسكرولنا التوتة بعدلي هي مكسبنا في صفاقس وما نجموا نمشيولها كان سبت والا احد وهوما يسكروها قال شنو ماتش كورة ، ايا حضرنا القفة فيها خبز وحكة هريسة وحكتين سردينة وحدة طماطم ووحدة زيت وعضمات مسموطين وانا مشيت عبيت بيدون من الماجل من دار سي محسن جارنا وما طمعت بالله حلفلي قلي نحي كعبات بيثر قمت عبيت بلاطة وقلت للمارا تعملنا خلطة زميط نهزها معانا للتوتة ،

ايه احنا في الكرهبة ونسمع في رامي يعيط :

اوقف اوقف جاك من تالي دور واضربو …

ونضربلك فران لين العجالي حكوا في الكياس وتهراوا وماشي يوافاوا بلاش عمر ، وقتلو شفمة شكون جاء من تالي ؟ قلي لا يا بويا هاكة نلعب انا وبشير صاحبي في الفري فاير قتلو يرد بالو ،

– اما بشير؟ يرة قنباعتك تطير خلوضتلي مصارني نسخايب شفمة ورزيتنا في العجالي ، ايا نحي من يدك خير ما نحلف برحمة بويا نكسرهولك ها التلفون ،

ايا قول وصلنا ودوب ما راكيت وجاني واحد قد ماهو والحق لاهو مشلط ولاهو لابس خلعة ولاهو شادد زلاط وقلي الفين

يا ولدي فاش قام الفين وانت شتعمل هوني وشكون خلاّك ؟

قلي خليت روحي وخلص والا هز الحطامة متانك واتجبد ، الحق خفت لا نعمل معاه مشكلة ونفجع المرا والصغار موش خوف منو والا حاجة وعملت هكة ومديت الفين كيف الناس الملاح ودخلنا ، ايا سيدي فرشنا هاكة الكليم على الحشيش تحت شجرة ومدينا القفيفة وغشمتني الموجيرة بكاس تاي وهاكة لولاد هزوا الكورة وطول انتدبوا لاعبين معاهم والنبي مولاك باللعب ،

هكك ونسمع فيها تقلي بالله جاي معايا والا عينيك تتشاعل للداخل والخارج ومقمقم وجهك لشرق تغزر لهاكي المارا الي قدامنا بالله على هاكة الشبشوبات الصفر والا زينها البديع تغزرلها ،

– يا بنتي ما نغزر لحد راني شايخ بالعصافر ونعس على الصغار كادس

– اهاه نعرفهم عصافرك انت ، برة عاد ناقصة انا ها النهار اهي رتيبة بنت سلف اختك راتني وجايتنا.

هكك وتتلهوث رتيبة على المادامة في شحالك ووينك وعينيا عماوا بوحشك ومرتي تسأل وتمسأل ويا حسرة عليكم وعلى عشرتكم ومحلاكم وتقريب ربع ساعة هكك لين قالتلها رتيبة بالمسلط ريتك وقت انا خارجة والا راهو كدست معاكم وبقاتنا بخير ومشات ،

وتحلت عليا مرتي عاد في هذي لين جايتني ونعرف لحمتي حلوة وتوة تقول لاختك راتنا واختك يعز بها وانا قلت نبرد خليقتي وحدي.

واحنا هكك ونسمعوا العيطة ، ونلقاوا رامي يعكز بساقو هبطلو سبنتري من هاكة الملاعبية الي انتدبوهم بتاكل فعصلو ساقو وتنفخت ولات كيف الطبل ، وتحلت عاد ملاك الرحمة ونبع الحنان ، في كرهتكم ونجي نفرحكم تحزنوني وانتم كيف بوكم الي عطاكم على الحومة عوض تكدسوا بحذانا ، وبرة عاد توة شتحبلي وانا نغسلاكم في راسكم والليلة ليلة في الحادث بخوكم وتوة يجبروهالو ساقو …

وطبعا مع كل كلمة يا قرصة يا تشويشة يا دعوة … وفي الاخر قاتلي قوم وهاكة الكسكروتات كولوهم في الدار والمحروم محروم ، قلتلها بالله اقعد على الاقل ناكلوا البيثر والزميط ونزيدوا كاس تاي وكانك على ساق رامي اوكي تفشت وقيلا تفعيصة صغيرة

– الراجل قلبو يلعب على الزيت ، عشوية بداتها رتيبة وانت وعصافرك وختمها ولدوا وصغارو مغبرين وهو يقلي بيثر ، ايا ورحمة بويا ما تقومش الا ما نقول فيها اووه واخطاني توة الدجاج الاكحل دار بيا.

من حينك عاد هزينا هاكة الكليم وخرجنا وشدينا الثنية للدار ونحن نمني النفس يمشية اخرى للتوتة اما ان شاء الله المرة الجاية نلقاوا ماتش خلي نقصوها من الاول