تونس الكُلّة حي هلال!

الأزهر الضاوي

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نحب نبقى هوني في القصر..

ومانرّوّحش لـ”حيّ هلال”..

حيّ “الميزيريا” و الفقر..

حيّ “البطّال” و “الزّبّال”….

“خبّيني عندك خبّيني”..

يا”سيدي الرئيس” خلّيني..

نشوف العز ونملا عيني..

“بابا” مات وضاق الحال….

نحب نذوق أيام في العز..

لكن آنا.. مني ملاين..

وقصرك قداش باش يهز..

والمستقبل ماهو باين..

و”الحَرْقة”عليها نتلَز..

وانت قداش باش تعاين..

وبلادي مابِتْ تفِز..

وقاسينا من البَحْر أهوال..

وصرنا كيف “أولاد الحجلة”..

في كل بلاصة همّال..

وما حبّت “تدور العجلة”..

وحالتنا صارت “أحوال”..؟!!..

يا “سيدي الرئيس” اعذرني..

ورجّعني لـ”حي هلال “..!!!

مانحب بعطفك تغمرني..

وأندادي في نفس الحال..؟!!

نحب نبقى في “حي هلال”..

نحب نبقى في “حي هلال”..

غير صلّحلي “حي هلال”..!!!

وتونسنا الكلة صلّحها..

راي الكلة “حي هلال”..!!

وكان ناوي صحيح تنجّحها..

يا اللا توكل بالأفعال..

يزّي.. رانا شبعنا اقوال..!!!

يزّي..رانا شبعنا أقوال..!!!

قفصة 2022/08/13