جور نار
حوار وطني خالِِ من الحوار…
حَاوَرَ فعل على وزن فَاعَلَ وهو الفعل المزيد الوحيد إللي مصدره ينجّم يكون على وزن فِعال أو مُفاعلة.. معناها المصدر من حاور: حِوار أو مُحاورة..
و الحوار موش كيما الخطاب.. الحوار أخذ و عطاء في الكلام و النقاشات و زِيد منا و نقّص من غادي.. و إلا يولّي واحد يخطب و لخرين يصفقوا.. يولّي حوار عندكش عندي.. حوار معلوم النتائج مسبقا.. كيما قال معمّر يرحمو هاك العام وقت أعطانا القرارات النهائية متاع الجامعة العربية قبل ما تجتمع..
معناها نحن حوارنا إذا ما يشاركوش فيه أطراف متنوعة و مختلفة و إذا ما تصيرش فيه تنازلات و نقاشات مستحيل يكون حوار.. إذا باش يكون واحد يغني و لاخر يرد عليه نعملوا حوار لواه من أصلو..!! إذا كان المنصات في المعتمديات باش يبرمجها طرف معين.. وهو نفسه باش يسمع الاقتراحات.. وهو نفسه باش يعمل التقرير النهائي.. وهو نفسه محضّر الخلاصة و الحلول.. علاش خسارة الوقت..!!
برّا نمشوا دُغري للحلول المبرمجة.. تِي علاش نمثلوا على بعضنا: يا سيدي أجمع كل الأحزاب إلا النهضة و ائتلاف الكرامة لا.. أجمع كل المنظمات إلا اتحاد الفلاحين لا خاطر رئيسو نهضاوي.. المهم لا تستفرد بالأمور الكل.. و خاصة خاصة خاصة: لا تُسوّق للعالم أنه حوار وطني.. وهو في الأصل لا هو حوار و لا هو وطني..