دوجة تشكي من النوري

– عسلامة يا دوجة ايا شحالك وشحال جمعك اوكة ندور دورة ونكر شلاكتي ونجيك لا يقطعك عليا

– اووه دارك يا مجيدة بيناتنا؟ هو انا والله عندي القلب الي يحبك ويتعداوا فلافة ايام ما نراكش عينيا تعمى بوحشك , ايا زوز للوسطية شبيك واقفة اللطف

– لا والله مستعجلة يا دوجة هاكة جيتك نلقاشي عندك كعيبة قارص نغليها نعمل شاربي , قارصتنا ما جابتش السنة الي هو عطاهالها يفقد عينهم عمناول القارص طايح على امو

– مالا توة نخرج نحيلك كعيبات يرحم من خلا قارصتنا تشره الحق , وانت شقام عليك تعمل شاربك توة ماهو الي فمة ريناه يشويك يا مجيدة هههه

– بالله ستك عليا محسوب سيدك قادر فايق بيه هو لشكون تحرقص يا مرت الاعمى , اما العشية هاكي حبيبة بنت محسونة سيالية ماشي يهزولها دبشها قلت ناقف مشوار هي جاتني الحق وقت روح سيدك قادر من العمرة

– وهي فاش قام يهزولها في دبشها اللطف علينا لا يورينا نهار مشوم مازلنا نسمعوا

– ما اقرب صوابك حتى انت مخك وين مشى ! ماهي خفات واليوم ماشي جيبولها دبشها وملاكها ما ترى الفرح عندك ياخي ما قاتلكش محسونة انت باش تمشي؟

– انا الحق بيني وبين محسونة ما بيناتناش مشي وجاي ملي ولدها سيب بنت فتحية اختي والحق القلب موجوع قعد هي اوكي خفات الحمد لله طيحة عزيزة جاتها بخديمتو حتى من الموبيلات جبدها من القرطاس وبقلبو ما يقعدش اوكة كان تعرفوشي من العشية للعشية في المركز كل وقت ووقتو مرة ناصب بكريتلات هندي ومرة بالسلق والمعدنوس وساعات بالبيفر وفي خير خميرو الراجل , وولد محسونة اوكة قاعد ما رفات بيه حتى وحدة وهو يرقص من طفلة لطفلة على ما سمعت هاكي محسونة طول النهار سفساريها على راسها وهي من فنية لفنية ومن زنقة لزنقة تخطبلو وشي العزة لتوة ما خافا , يصفاوا شدخلني انا بربي تعرفني ما نحبش نجبد الخلق الي يعمل قربة تجي على ظهرو وتقطر

– كهو مكتوب وخيتي حتى بنتها بيناتنا الكلام هي والله حلفتني ما نقولش غير انت ما نخبي عليك شي ماك تعرف اما بالله لا ريتني لا ريتك , خطيب بنتها قرقني قالت واكبر منها بياسر وعلى ما قالت كان معرس وطلق وصغارو عند امهم جاب ربي والا يجرى فيها المغبونة , حتى الدبش موش حاجة كبيرة ماشي يجيب ويحب عرس على الضيق , مسكينة حتى الكنسترو قلها ما نجيبش قام بوها باش قدام الناس هبط هو والطفلة لخالها السيالة متاع لافاح خفالها كنسترو حتى لونو متع عرب اللطف مشعشع فاروزي وحط فيه شوية طفل ودبوسة فا وخفالها دماق وانا كيفاش عرفت عاد جات خفات من عندي شوش الورد باش رماتو مع الطفل اما هي ما قالتش تسخايبني نرفع في صبعي , شعندنا فيهم ربي يهنيهم المهم تعرس الطفلة والله الي يعطي بنتو الوقت هافا عبارة قتل عقرب

– وانا نقول شفمة الصباح شفت لالو الكرارطي مدخل الكراسي في الزنقة وتسلفوا الجفنة من عند نفيسة وهو فرنك عندهم جيبان الدبش , حتى انا عرفتها قلت الجفنة باش يبردوا الڨازوز

– اوكة كلموا سعيد الحوانتي على الكميونة وماشي يسكر حانوتو المغبون ويهز المزاودي ويمشي لدار العروس يجيب معاهم الدبش , قلي يا طاهرية سفساريك الحرير تستحقوشي العشية مادامك موش ماشية خلي نتسفسر بيه

– خصتو مازال سفساري هو ماهو عمناول مشينا نطمشوا الزليزوات وسيك النوري نسى الفرشة قلي هات سفساريك نعملوه مفرش وشواني عليه قلي توة ناخفلك واحد وعوينتك ما ترى سو

– توة نمشي بمتاعي مالا يصفى محسوب شكون عندهم هوما ووين يعرفوا عليه , ورتيبة كمونة مرت ابني قاتلي توة نعملك فورمة في شعرك وعندها هي الرمال والدندونة ونعمل قلم شفة ونمشي ماخفة خاطر ما فيها باس

– والله الله منك في هاكة القوايل وانت من كعباشة لكعباشة با تمشي لمحسونة سيالية بعد مطهرتك وتزيينك وزيد هاكة الدماق توصل بيه بالغبابر والتربة اسمع كلامي امشي بشلاكة الشمع وهز الدماق في صر وقت توصل البسو وارمي الشلاكة تحت الطابية حتى تكمل

– والله تقول عليك حافرة حتى انا قلت نعمل هكك يصفى والله الي تجيه مشية يشنع غير شي يحشم , ايا هات كعيبة القارص خلي نمشي وحتى ترى حكة السكر مازالشي فيها يزي عليا وبرة

– اكدس هون اهو عندي القارص والسكر توة نعملهولك انا مشوار وامشي

– برة يباركلك كل مرة تحشمني على روحي يالا فيسع مالا قبل ما يجي مولى بيتك

– موش قتلك ما يجي كان المغرب هاكة راهي غبينة تعلم قعدة الديمينو في الشعبة من وقت كان هارب من هاكة الحرايق صغار بنتو وكمل مرة دخل على غربتهم بالعرجون وتكسر العرجون عمل فضيحة ووجهو طول النهار ايا نندبو ايا نندبو داخل ينش خارج ينش راني في حالة غير ساكتة على دايا وبرة تعرفني ما نحكيش

– بالله استك عليا ياخي على عرجون تكسر يعمل هكة؟

– هات عقلك وخيتي ماهو لا بعد قلك العرجون غالي توة ولازم يستنى الخريف حتى يجمع النخلة

– ايا مالا تعرفشي وخيتي نمشي لداري ونعمل وحدي انا نعرف غشو سي النوري خير ما يلقاني هوني وانا نحشم منو ايا لا يقطعك ويباركلك طل غدوة عاد نحكيلك على هزان الدبش

– مالا عاد لازم نجيك رغم تعرفني ما نحبش تنسنيس اما محسونة شواتنا هي وولدها يشويها والله فكنا ربي منهم كان الهبج عندها دعيوة خير جات لبنيت اختي …..