تابعنا على

من يوميات دوجة و مجيدة

دوجة ومجيدة في المولد

نشرت

في

دعاء المولد النبوي مكتوب 1445/ 2023.. موعد المولد النبوي - موقع العراب

– ايا مجيدة اهي صحيفتك متاع العصيدة ويحييك ربي لكل عام , ليدك في العاهد الله ما خرجتها الا ما كل غديرة شربت ماها يعطيها بعزة صحتنا وين مشات كان موش هاكة المغابن صغار محسن ابني يحبوها وسيدك النوري الحق يشره على هاكي الصحيفة نهار المولد لا نعملها يشويها شتحل الحوسة

ياسين الرباعي
ياسين الرباعي

– برة لا يقطعك يا دوجة , انا كل عام من العصايد الكل ما نتبسم في حتى داڨرة كان داڨرتك , فعلى عزاه تجيني كيف متاعي كحلة عاقدة وسكرها في خيارو , تشره الحق , انا اوكة عبيتها في دويڨرات وقلت تبرد شوية ما بين هاكة البنات رحاوا كعيبات زلوز وبعفت الغشاشر لعمك سعيد الحوانتي يحيبو الدنيا , وهوما حبوا يخرجوا يخرج بزهم؟ , لا بعد يتعاركوا على لحسان الطنجرة واماتهم الله يبارك عوف يفربوهم ولاوا يلحسوا معاهم , توة هافا حديف هافا منين نردوها من الصغار والا ما الشناقة الاولة والفانية

– يا حسرة على عصيدة مجيدة , ليدك في العاهد الله ورحمة بويا عبد الله سيدك النوري كل عام يقلي اول ما نفوق متاع مجيدة ويحلف بالايمان يقلي كان تخلطهم ما نفرقش بين متاعك ومتاعها ,

– حتى انا هكك وخيتي ماهم يجيبولي دويڨرات الجويرات , هوما يكفّر خيرهم اما شاي الله يا عصيدة , عاد الا غبينة عمناول وعصيدة كراية , وخيتي عصيدة موش عصيدة , صحلب موش صحلب , زميط وموش زميط , يا لندرى كيفاش بلبزتها مسيكنة , بيفة مطززة وكريمتها تدردع كيف شحم العزاوز وبلاش روح جرتها خرجنها بقلسيطة على طرقين , عطيتها للصغار انا كلاوا شكلاوا والفاضل خرجناه للدجاج , وهي الي يشوف الوهرة ولبستها يقول الدنيا اتخفت وعصيدتها حمد الله هات المنديل

– الي فاتك اغرب وخيتي , الخطرة الفايتة تريكية حابتلي دويڨرة عصيدة انا نحيت السريفتة من فوقها وسيدك النوري قلي هز من قدامي , حاطة فيها حلوى متاع صداقات وسرات هاكي الحلوى فوق الكريمة وولات الوان الوان كيف كليم الشوالق وكمل رشرشت عليها هاكة الشكلاطة المتفتفتة تقول قلوط الفار فوقها , كلاتها مهيرية وصغارها بالشفاء هاكي ماهي المهم ما تعملش وعطيها تحوم وتاكل الي يجي حلقها مقصدر اللطف , وحتى سيدك النوري خذا فيها حصة بالعجب يقلي متاع تريكية العادة مهمة شعزاها السنة ؟ وبعد عاد كيف رديتلها دويڨرتها عرفت الي كنتها مزغنية هي الي عملتها , المزاغنة ماهم الي عطاهم على تبلحيط الحاجة وهاكي تريكية طول النهار وهي طيح طيح هي وياها والكلام بيناتنا دايرة بابنها قاتلو طلقها لاهي متعنا ولا نجموه تفرعيسها وقلة حفاقتها وربي يبقي عليهم الستر انا لا ندخل ولا نتكلم شعندي فيهم اما هو بالحق مزغنية ما صدفتش وما تعجبنيش حتى ناراه بس الحبيب ابنها ونقلو لوح عليك لين وليدي هكة حتى تجرالها حاجة تريكية بالعصب في جرتها لا يورينا سو فيها

– كهو لوح عليك كيف ما قلت انت يصفاوا محسوب شاورونا قبل ما ياخفوها , هاكة البنات كل وحدة يا للا عباتلك داڨرة كبيرة وقالولك هفي متاع دارنا واوكم يكسروا في الفاكية والزينة وخارجة منهم زلوزة , مالا عاد ماشي لامهم الشي يهزوها كل عام وياكلوا غادي عصيدة امهم ويجيبوا الداڨرة فارغة ويجيوا مالا يجيبوا دويڨرة نفوقها انا وسيدك قادر ؟ ابدا عوينتك ما تارا سو , هافي هي متاعك نفوقو ومتاعي عقرب فوقو يعطيهم عقرب الافنين انا رميت طوبتهم ما عادش يهموني , وكانك من عبيشة بنتي كل عام تجيب داڨرة عزيزة وغالية ونمدلها عصيدتنا هي وصغيراتها وناكلوا بالوهرة وتكمل العشية وتمشي , وكل مرة نقول نعطيها داڨرة لحماتها وهي تقلي لا اوكة عندهم كول انت وبوياااا , شفت ماهو كيفاش تفكر فينا موش كيف المغابن الاخرين

– حتى هاكي المشوية مهيرية كيفهم تقول فرد مدب قاريين العشية تعشي وهي تهز الداڨرة وتركب وراء محسن على الموبيلات وتجي كان مغرب تخسر عليا اوكي امي تسلم عليك وقاتلك كل عام وانت بخير , لقينا في الزفت كان ترتيبو , تصفا وتنفى هي وياهم , اما الحق يا مجيدة عصيدة نجاحة عمناول تشره , الفيحة والريحة تجيبك منين ومزينتها بالراكح لا هاكة الهبح وهاكة الاخفر والاصفر والاحمر كيف متاع العرب , وعاقدة فارينتها في خيارها , حتى سيدك النوري افرب فيها قلي بعد متاع نجاحة توفى العصايد

– عاد انتي هزيت عينك لنجاحة بكلها هاكي ملي عرفناها كل شي بالوهرة والله نعرفها في الزنقة داخلة من المركز تقول كانت في الصالة موش عند عمك سعيد الحوانتي وتخرجلو في القايلة باش يبدى فارغ وتقفي براحتها وعمك سعيد بفضالها , تدخل للحانوت ريحة الافاح تعطرق تخليها غادي , حتى سعيد نهارت الي يعرفها جاية تقفي ما يسكرش في القايلة ويقلي محلاها هاكي المرا بالراكح كل ما فيها تجيني ما تبهفليش شوايري كيف دوجة !

– برة يرا كبدتو ممروجة انا نبهفل الشيرة يبهفل شوايرو ؟ مالا يحبني نقفي الي يجي ماهو نفرز ونختار وكان عجبو , ايا توة نبني عليه ساس ونصير نقول لمحسن يقفيلي من مطراح اخر , ايا اكدس اكدس زين معايا العصيدة وهز داڨرة سيد النوري يا دوجة فرد مرة ,

– لا نكدس ولا نزين خلي نمشي وخيتي هاكة الراجل يستنى ونمشي نبخر الدار الليلة موسم وانت كمل وايجاني توة نحكيوا بالوهرة هافا موش بالواقفة وخيتي الحدبف , ايا نستناك يا مجيدة غير بس ما تجيش

أكمل القراءة
انقر للتعليق

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *

من يوميات دوجة و مجيدة

مجيدة تعمل في البسيسة (الجزء الثاني)*

نشرت

في

ـــــــــــــــــــــــــــــــــــــــــــــــــــــــــــــــــــــــــــــــــــ

يس الرباعي:

– يا لطيف هافا الكل يجرى فيها دربالة وما نسمعش, اع عليك علاش ما تقليش راني مشيت طيرت عليها السو, يالا توة نعدي عليها وقت نمشي لحبيبة بنتي ماهي جويرتها تتسمى, اخر مرة ريتها في الخميس متع فخفاخة يرحمها, انت ما مشيتش عاد تعزي يا مجيدة سالوا عليك بناتها

– ماهو نهارتها خلينا كازي والا فيازي والا شسمو ولد كمونة في القعادة, والله قهروني بالاسامي المقلبة قد ما قلتلهم سميوا حاجة نجم نقولها وشي خلاتني بقة في حيط وسماتو كيف ما حبت هي يعطيها كية

– ههههه يشويك يا مجيدة قتلتني بالفحك, نيازي اسمو نيازي انا ما حفضتو الا ما مهيرية ليلة وهي تقلي عليه

– اي وشكون عاد جاء للخميس يا دوجة؟

– ما كدس حد عليها وخيتي الدار تملى وتفرغ, عزيزة كانت لا تفر لا تافي والله تشاواوا عليها الناس الكل الا هاكة الشايب متاعها شادد كرسي في باب الحوش وعينيه على البنات الداخلة والخارجة ويسال هافي شكون وهافي بنت شكون , اول خميس وهو يخطب يعجبكشي ها الحديف تقول كان يستنى فيها تقبل, بناتو يقولوا يا بويا موش وقتو توة اكدس مع الرجال, وهو يقلهم ماهي فرصة ياخي بعد عندي سقين باش ندور في الزنق ونلوج؟ توة هافا راجل هافا لا يحشم لا يكابر يعمي عينو ان شاء الله.

– هو بيناتنا لازمو مارا يا دوجة بالله هاكة البنات كل وحدة تشد دارها بعد واولادوا الي هافا يجعلوا يقوم بمرتو وصغارو وهو اشكون بيه؟ هافا حلال ربي العالمين هي عرفت مطراحها وربي يرحمها وهو ما ايلو الا بمارا راهو, انا والله فكرتلو في شافية دباشة اخت راجل عبيشة بنتي ماهي تصبات عاد وما خفاتش وزيد ترتاح منها عبيشة راهي حريقة وقبيحة كلمتها تقولها وما كفبوش كيف قالوا اخت الراجل كيف العقرب في الطاجن, حاكة افيم عبيشة بنتي مسيكنة

– وخيتي اوكة يلوج هو وعويناتو تتشاعل كان هافا توة نبعفلو مع حبيبة بنتي تقلو على شافية هافي, اما هو يجبها صغيرة وبيفاء ومزيانة يحب يغرم شبابو الراجل, الفلوس ماهم بالبالة وهو والله شادد رويحنو عاد لين ومن صلو مزيان قشرتو بيفة حمراء ماشي تنطر الدم وكمل بناتو عينهم محلولة لامهم يرحمها, توة يرفاولك بلي يجي لبوهم

– احنا نقولولهم عليها ويراها ويدبروا روسهم بعد انا تعرفني في الماخفة لا نحب ندخل لا نولي مشومة بعد, يصفاوا على بعفهم الكل

– توة نبينا ونصليوا عليه يا مجيدة, انا جيتك نحبك تجي تعملي فتيتة برغل سيدك النوري قلي برغل مجيدة وحدو وما تعملهولي كان هي, ايا وقتاش تجيني باش نقلو يقفينا؟

– وخيتي وانا مازلت نجمها حركة النعمة؟ حد التغلية نغليهولو اما الحكان خاطيني راهو

– لا حتى هو قلي انتم احركوه وغليوه وانشروه وانا نحكهولكم يباركلو في صحيحتو, اوكة البنات زادة بين يدينا وكان هافا اعمل حتى نفيص ويبة ليلك نعرف سيدك قادر يحبو

– باهي مالا اقفي قفياتك وقلو ياخفنا ويبة اعماكم ونعملوه حتى احنا عقب برغلنا

– ايا يباركلك يا مجيدة ويشدك لا يهدك خلي نمشي والله خليت الدار حايسة توة نحكيوا بالوهرة عاد وقت نحركوا النعمة

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

*تم نشر الجزء الأول على “جلنار”، بتاريخ 16ــ 02 ـ 2024

Motif deux poules

أكمل القراءة

من يوميات دوجة و مجيدة

دوجة ما لحقتش على العشوية

نشرت

في

aoitef on Twitter: "وريحة القهيوة العربي من أحلى يدين معها كويس تاي منعنع و  قعيدة تونسية حرة في النحاس التونسي كاس #تاي_تونسي و نكمل بحلوياتنا و بيها  تحلى سهريتنا https://t.co/952kzOyRNE" / Twitter

يس الرباعي:

– اوووه يا مجيدة نفختلي راسي شرفية سم الله عليها شتحكي جاب ربي جاء ولد ابنها هزها , جابتو سحري بحري اللهم احفظنا يامة عليه عمك يوسف مولى بيتها وانا نقول شبيا وين نخرج للمركز نلقاه كويدس على حجيرة قدام الماكينة مع الرجال وهو طلع هارب من تزنزينها

ياسين الرباعي

– هي والله كويدستها تشره اوكي جات طيرت علينا فتيتة بجباج وزيد قداش قاعدة تجيني هي , تسخايبني لتو حاطة في قلبي منها ملي عرفت الي سيدك قادر حب عليها قبلي , انا الراجل وفربتو على قلبي وهي تصفى فاش قام نحط في قلبي منها , اوكة مكتوب وخفات يوسف رغم اكبر منو هي راهي في غير جاهك تزيد عليه عدت ايدك سنين ولقاتو قد يويدتها وين تحددلو ياقف مسيكن وهو يا شرفية يا شرفية , الكلام بيناتنا وعلى ما قالو وخيتي انا عيني ما راتش , يقلي معاها الشعير , ويحكلها البرغل وعندو زنس حكان يحكيوا عليه , حتى من النعمة يحركها اعماها يد بيد هو وياها ,

– وهو وين ينجمها مسيكن مرا عفيمة والعفيم ربي , اما والله محلاه الراجل هكة ما تلقاش نكبة اعماه , وها , عطاك ربي قد ما هو سويكت وحسو ما يتسمعش قد ماهي تقول بالعة راديون انا ليدك في العاهد الله راسي وجعني اخر المتمة تحكينا على ايامات عرسها , هافي هي العزوزة كيف تخرف تفكر ليلة عرسها , وكيفاش خوها وقف ليوسف على ركبة ونفص وقلو اختي ما تخرج الا بالكروسة وكيفاش القازة طاحت من الفرش ورصاتلها في الفلام ليلة عرسها وكيفاش حماتها تسخن في الماء , حال هافا لين كان موش عياه

– استك استك هاكي ماهي فيبالها تحمص فيا خاطر انا خفيت سيدك قادر تقلك نوريها كيفاش عرست وخفيت يوسف , لا عقلها خص المرا شخلاني التوفيق حب على بنتها قتلو شوف فنية اخرى بعدلي كب البرمة على فمها تطلع الطفلة لامها وامها معيوهة ولسانها ما يسكتش عاد وخيتي شسلطنا عليهم , اوكة قاملو الزهر خفا رتيبة كمونة تشره الحق غيرشي شوية العصب الي عندها ودورتها رزينة في الحركة اما يصفى ولا بنت شرفية

– لا هي يا مجيدة بناتها يشرهوا وما جاوش لامهم الحق , اوكي وحدة واخفة ولد الكتاري بسيكلتو جديدة ويخدم على رويحتو ووحدة واخفة ولد الرقيق بنصبتو متاع الخفرة ودويرتو يكمل فيها عرست في خرخوط فيه ابيتة ودويرة وميحاف وما سمعنا عليهم شي الحق , هي الكبيرة ما فناتش اما اهي امها توة قالت الي هي حبلت ونعم الله عليهم

– قلي كنيتك وين يا دوجة عشوية كاملة ما ريتهاش؟

– هاكي من الصباح خرجت , ماهي اختها على راس ليلتها تفاهمو مع بعيفاتهم يتلاقوا بحفا المدينة باش تشري معاها تشويكات وتبيدلات للفانا , هي بيناتنا حبت تعطيها دبش ابنها , قلتلها ما تعطي شي تعودشي تحبل تولي تشري , لين الخسارة خلي وخيتك تشري الدبش وخلي دبيشاتك في الڨلص , بعدلي تدور دورة وتحبل المرا يشويها جتى الحبارش الي تشرب فيهم ما عملوا شي , كهو عاد ولات وخلاتهم وهبطت للبلاد وجرتهم من غاد تعداوا لدارهم الي في الربط ماهم يشتيوا في الربط دار بوها , انا والله ما نعفصوا الربط لاهو متعنا ولا نعرفوه حتى محسن وقت يمشي نقعد نخمم عليه لا يعرفوه زڨلّعية غادي ويفكولوا موبيلاتو ويعطيوه طريحة ,

– توة بدويرتهم في الغابة وماشين للربط , راهو الهبجي هبجي انا عرفتهم من ليلة مشينا للنزول وريت هاكي اللبسة وكيفاش يشطحوا مخلطين بنات واولاد وريحتهم تنفي بالشراب , اوكي جات بحفاك جاب ربي باش بعدت على هاكة الشي الي هوما فيه

– ماهم يتبعوا في خالتها شرات دار في الربط قالت تعدي فيها الشتاء قامت امها دورت بول الفيب ببوها وشرا دار حتى هو بحفا نسيبو , احنا خفيناها من الغابة ما فيبالناش بالربط والا حال نمشي انا وناخفها

– هاكي عتورة يعطيها شابورة حبت تخرج هي والمنجي تسكن في عمارات قاليا في شط القراقنة , قتلو كان تخرج غادي والله لا نجيك ولا تشوف خيالي في دارك هاكة الي مازال علينا نسكنوا بحفا القراقنة وزيد الدروج انا سريري ما نجمش نطلعلو وسيدك قادر ما طمع بالله الشيخ يتسبب وطاح عليه غربال حتى نطلع دروح يرا قلبها ممروج تحب تهججلي ابني من بحفايا , وكملت كمونة سمعتها هكك قامت دارت بالتوفيق وقاتلو نخرجوا نسكنوا وحدنا ووين تسكن عاد , بحفا دار بوها فمة بريج ماتت العزوزة وصار للورفة قالوا نكريوه هي عاد تحب تحول بحفا امها , قتلو لين امها ياخي انا في وجهي كرع ؟ تكدس هون انت وخوك وعطيتهم قلة السماح باش كدسو , غفبت عاد كمونة يرا جريتها مخنونة وعتورة هزت ساقها على بيتي مديدة وبعد وقت سمعت بيا مريفة دخلت ولا كان ولا جارا

– والله عملت بالراي وخيتي كيف خليت وليداتك بحفاك , بالله انت وسيدي قادر وحدكم على طيحة على شرقة شكون بيكم , مرة بايتين وحدنا انا وسيدك النوري وقت محسن في الصوة وهي مشات لدارهم لولتين , في غير جاهك هو دار على جنبو وهو عكش ومكنو موفق يشدو في ساقو يسيبو في فهرو وانا وليت ندور في هاكي الدار وما عرفت ما نعملو وفربني هواء بعدلي خرجت عريانة لوسط الدار وما رجعت فينا الروح الا ما طلق طولو سيدك النوري وقال توة نفهن منا للصباح

– يامة علينا يا دوجة حتى ليلة الي نزلو رجالنا تعكش اللطف يزي عليا وبرة , وهاكة علاش انا قلت للاولاد لا واحد يخرج بالله يعكشلي سيدك قادر شنعملوا انا مازالت الصحة الي تنجم تهزوا والا تقلبوا على فهرو

– انا جارا فيا ليلتها وخيتك وزيد واكل الرزين هو تعشينا ملفوف بالذيل وجبتهولو واقف على دهانو نودك ولا نشهيك ياخي فرحة وما تمت

– والله فكرتني يا دوجة , نقوم نشوف هاكة العجين تخمرشي قلت نعمل فم حلالم الليلة ونخلي عجنة للطشطاش نقومشي الفجر نقليه شهوة عتورة يعطيها كورة كرهت وحمها وكمونة قاتلي بالله اعملنا عجة الفنجان يكسرلها المسلان لا بعد ما تاكلش الطشطاش وانا في غبينة نحرك بيناتهم وفي غلبة كراية

– عاد يويداتهم وين , يعملوا بمكاسرهم كل وحدة شتحب

– عتورة بالوحم تشم ريحة الزيت في الطاجن تولي تتباوع وتقشع علينا وكمونة عبد السلام ما عليه كلام , تقوملك الفجر هي توب لله ياخي كفرت المرا هي , تصبح مغطة هاكي كيف العرايس ونكلمها تقلب عليا خليقتها وتسيب العصب على هاكة الصغار بالفرب والدعاء ويا لندارا منين تجيبوا هاكة الدعاء اللطف , انا عزوزة وما ندعيش يرا لحيمتها تشيش وريش

– ايا ما نعطلكش يا مجيدة , وانا نمشي نقص شوية خفرة نعملشي فم مغلي بالدهان وتوة نعدي عليك الصباح ناكل الطشطاش عاد لا يقطعك

– شي العشية فيسع توفا اللطف والله لا شبعت بيك يا دوجة اوكة نستناك الصباح واعمل حسابك نشقوا الريق مع بعيفاتنا خلي نحكيوا بالوهرة شلعزة

Motif deux poules

أكمل القراءة

من يوميات دوجة و مجيدة

مجيدة عندها عشويّة

نشرت

في

باب الجبلي

ياسين الرباعي:

– انا قد ما نقول ما عادش نجيك يا مجيدة وشيء ما انجمش نصبر عليك يعطيك بشية تشويك نتوحش حديفك وكدستك

– علاش اللطف يا دوجة ، اع عليك ما عادش تجيني ، شسمعت عليا الريح البرة

ياسين الرباعي

– توة قداش من خطرة نسمع تلمد الجويرات عندك ويجيوك وانا لا من يقلي يا غريبة وينك ، شلغفة لا تبعفلي واحد من الغشاشر يقلي ولا تقلي قبل بنهار … امس يا للا لا محسونة وحنيفة ونفيسة وحتى من عجمية الي تحرك النعمة بحفاك وانا نسمع سمعان

– ليدك في العاهد الله ورحمة بويا عبد الله يلي انا كادسة وهوما دزوا عليا الباب ولا فيبالي بيهم ، قالولي سمعنا بيك جيت لدارك قلنا ناراوك ، ايا اكدس اكدس نحكيلك ويزي من عياهك ياخي بيناتنا هو يا دوجة راك مولات الدار يشوم عليك النهار

– لا محسوب كان قتلي توة نجي انا خصوصي سمعت عاد بحنيفة جات يجيبها لاجية تعرفني ما نحبش خليقتها من نهار عطات بنتها وما قاتليش ، بالكشي نعمللها العار يراها في النار

– هو الحديف بيناتنا حاسة راهي يا دوجة وقاتلي والله ندرا كيفاش نسيت دوجة فعلى عزاه بتبهفيل الشيرة

– برة يبهفل شيرتها من مارا ، انا الي يقلك وين نبص بصة نقلها عليها وفي عرس الباشا ابني خليتها لاهية بالكوجينة والبرمة والتطيب والي تقول هي كهو وسيدك النوري بين يديها ليدك في العاهد الله يخرج ازرق نيلة من بحفاها يفربها بالساعتين فلافة وفي الاخر تنساني ، برة ينسيها فكرو

– لا محسوب هاكي الماخفة متع بنتها خليني ساتكة وبرة ، هي ما قالت شي اما الحديف عاد ما يتخباش اوكي تبلع في ريقها وبرة ، الراجل طلع صاحب محنة ويشرب وقالوا صعيب وزيد بعد ما قلهم بوه كاتبلو ربع البرج طلع كاتبلو خرخوط من قبلة باش يبني فيه ابيتة ، كلموه هافا كيفاش قلهم الشراب ما نحيهش والبني يا من عاش نسكن في بيت عند امي ، جاوا يبطلوا الخطبة بوها قلهم الف وغف بالله لا نبطل توة الفالف عروس نبطلوه وتوة تكدس على قلبي الطفلة ، وقاعدين داخلة فيهم غولة ويزي عليا وبرة

– اييه خلي نلحس مناكبي توة ، موش شماتة الطفلة الحق حليلتها وما تستاهلش اما عياه امها طلع فيها ، وقت حبينا الطفلة للباشا ابني قالوا واخفة وبعد سيبتو اوكي هي خفات راجل هكك والباشا وحل في قلالة يدرجحلها المنڨالة خرجت شوكتها علينا يا مجيدة يعطيها تمسيدة

– علاش اللطف انا قلت دوجة جابلها ربي بنية بعد حصلة مهيرية

– عاد لين مهيرية فيها لحمة الخروف بلي راسها كبير اما في الاخر محسن ابني تحت جناحي ، اما هافي الطف دكتو تحتها وفعلى اخفتها اشوكّلتو ، تخيل يا مجيدة باني قفا الدار راهو ونسمع طرطارتو يدخل وما يجينيش ، في غير جاهك بالعدة يدك ايام ما ناراش ولدي ، تقلو لين ماشي اكدس هون اوكم لاباس عليهم وتغلفلو في قلبو علينا يراها في تركينا ، ايا بالله فك عليا من بلاها نفكرها لحمي يولي يبرڨل كل عفمة وحدها ، قلي عاد نفيسة شحالها ملي مات مولى بيتها لا ريحتها ولات وهي من دار لدار اهي عند خوها اهي عند اختها …

– والله مسيكنة في غبينة تحرك هاكي نفيسة ، لا بعد ركايبها وفاوا والقرمش تهرا ، مشات للكاس وعطاوها حريشات كملتهم والنافع ربي ، اوكة سعيد يباركلو قالت خطرة بعد خطرة يحيها يمسدلها سويقاتها عندو بوماضة قالت هي ويا هي والفرج بدى يفهر على يديه ، وزيد ماهي خفات لابنها الصغير تبارك الله والله راجل امس في الايام في حجرنا يا دوجة – وشكون خفاتلو مازالت البركة

– بيناتنا الحديف برانية موش من هوني حنى وطنى فيها الطفل ، ماهو سطا مرمة وخدم في دارهم وراها قلها خوفهالي ، مرفت العزاية نفيسة وجارا فيها وبعد جاها خوها سيدك مصطفى وقلها زايد يا نفيسة برا ناخفوهالو ، اما الحق قالت سمحة الطفلة وسلسة وطويلة وعاقلة حسها ما يتسمعش ، غير ما تجيش كاملة يا دوجة

– يصفاوا مادام عاجبين بعفهم ، واحنا مازال عندنا راي مع صغارنا؟ ، الدنيا تقلبت يقلب عروشتهم ، ولا محسوب طويلة ماشي يعمها جماعة هو ياخي اوكي كمونة كنتك طويلة طول نهار مشوم وعاصرتلك الفوم في عينيك

– هاكي سقيلها وحدها ، انا كان جراتلي حاجة راهو منها ، مالا تقلك يا امي مجيدة نعملك حاجة والا تحبشي حاجة ؟ توب لله ، الي عطاها على التحرقيس وغسيل الراس وتتمكن بهاكة التوفيق تحوم من مطراح لمطراح يراها تحوم وتعد في النجوم

– ايا هافا كلام غايب شطرو وانا حديف هب هب تعرفني ما نحبوش ، خلي نمشي نشوف شعملوا هاكة الكناين في الفطور ونبخر بيتي فمشي ما ربي يرحمنا والعشية نجيك نحكيوا بالوهرة

Motif deux poules

أكمل القراءة

استطلاع

صن نار