“طيّاب”

يس الرباعي:

في عرس صاحبي التوفيق قلنا نمشيوا للحمام مع العروس، ايا قول وصلنا للحمام، دخلنا وخذينا مفتاح المرفع الي نخليوا فيه الدبش وطلعت للسطحة عفصت على ساق واحد ملهْوث في فوطة وراقد ياخي قام قلي ماهو حل حبوبك الواحد ما ينجمش يعمل غمضة بعد الحمام في ها البلاد؟

يا خويا سامحني والله لا ريتك حبيت نتعدى نخلي دبشي …

المهم طلع متسامح وقلي الله يلعنك يا شيطان ، نحيت دبيشاتي ولبست شورط الحمام هاكة الاديداس المخطط الساتان ودخلنا وجاني مسؤول الاستقبال قلي طياب خويا؟ قتلو مالا عاد اللازم لازم، وحطلي استيك في يدي فيه صوردي منقوب ورقم 6 قلي هاك عند البزويش ، ايا لبست القبقاب وهزيت الكرتل طول عبيتو بالماء السخون قلت نغطس سويقاتي.

وانا في بيت السخون ودخلت وطول تقول دخلت للحادث بريحة الفليو ، يا جماعة على سلامتكم ياخي اشنية ها الريحة شفمة غمزني واحد وفهمت الي السبد الي قاعد في فم الباب قد الفرتون وموشم مدخل معاه دبوسة فليو ويدور دورة ويصب على لحمو ويفرك ويقلب عليه سطل ماء ، كنت ماشي نكلمو لقيتو سبقني وغزرلي وقلي سافا العزيز ؟ قتلو ساااافا صحة لخويا ،

ايه ما نطولش عليكم خرجت من غادي مزنزن بالسخانة والخنقة متع الفليو ومشيت للبزويش ايا يا معلم جاشي دوري ، قلي اهو مازال واحد قدامك زيد اسخن ، تقول فوزي البنزرتي ماشي يعمل شنجمون وقلي اسخن …

عاودت دخلت وجاب ربي هاكة الفرتون خرج من بيت السخون وعملت فيها سبورتيف وليت نمسكل والناس داهشة فيا وانا تحليت عاد وليت عامل فيها فندام ، وخرجت للبزويش استلمني الحق بضحكة وقلي خليك على كرشك ، يا ولدي كيفاش توة يصير هذا؟ قلي ايا عاد ما تعطلنيش ، وشماشي يعمل الميت قدام غاسلو تمديت ونحس بجثة طلعت ترفس فيا بسقيها ويقلي سيب روحك ونسمع كان في العظم كل عظمة ترطق وحدها وانا نتحمل نوليشي نعيط والناس يضحكوا ويقولوا ولد ناناتي ،

كمل رفس لين شبع ودورني على ظهري وبدى يجبد في الرقبة يا بزويش يهديك حاشتي بها راني يقلي ريض وسيب روحك خلي تدلك بالباهي وبعد دار يد يد ساق ساق اهو عوجهم اهو جبدهم واهو يحك ويبرم ويرمي البروم قدامي زعمة زعمة اهو الوسخ ويختمها بعد كل فركة بضربة تقول يخبط في قرنيطة وجبد هاكي الكاسة الي تقول عليها بروس ميتاليك وبدى النبي مولاك ووخيكم مع كل جبدة يذوب وساكت موش خوف اما ما فمش جهد باش نتكلم واخر المتمة قلب عليا سطل ماء وقلي ايا صحة ،

اما صحة وخي وانت خليت فيا صحة ودخلت للمطهرة نعمل تشليلة وخرجت ما نشوف في شي في مخي كان نعفصشي مرة اخرى على هاكة الراقد ويقوملي وانا موش ناقص عاد يكملشي على مرمتي ، وتمديت في السطحة ونسمع كان صحة خويا كوكا والا بوڨا؟ ياخويا كويس ماء يرحم بوك فيه البركة ، قلي دبوسة ماء بالفين ، باهي هاتها فمشي ما ينفخ ربي في صورتي ، وبردت شوية ولبست دبيشاتي ولبست بشكير في راسي خايف من الهواء تجينيشي زفة ريح زادة في جرة ها الحمام ،

ايا دخلت للدار ونلقاها برود تشره وريحة البخور عجعاجي والمرا ظهرلي كيفلي مبدلة شوية بالمكياج والافاح … ايا صحة صحة شبيك بطيت تحبشي قهيوة والا كاس تاي ، ايه شبيه هات قهوة لا يقطعك ، هكك وخذاتني عيني لين جات قاتلي في الريح صار كبيت انت؟

فقت مفجوع نسخايب هاكة قباض الارواح متع الحمام الطياب لحق عليا للدار وقلتلها والله لا يد لا ساق راني. خليني نتمغط هوني ونرقد وبرة ، ايه لا توة نغطيك تعيا وانت تستنى وانا محضرة روحي فيبالي ، يا سلسبيل جيب غطي بوك خلي نمشي نكمل المسلسل والمحروم محروم …