راجل و سيد الرجال
“كَرنيات”
نشرت
قبل 6 أشهرفي
من قبل
ياسين الرباعي Yassine Rebaï![image2 جلنار Jollanar La notation et l'évaluation des élèves : vers une révolution ? | L'ÉCOLE DE DEMAIN](https://inforum-jollanar.com/wp-content/uploads/2024/03/image-2.jpeg)
– سعيد يا نصاف ايا شحالك ، خذاتشي الكرني بنتك؟
![ياسين الرباعي جلنار Jollanar ياسين الرباعي](https://inforum-jollanar.com/wp-content/uploads/2023/01/ياسين-الرباعي.jpg)
– خذاتو ، الحق باهية عطاوها شكر اما ما جاتش الاولة يطرشق حبتها المعلمة طيحتها في الايقاظ باش خلات بنتها تجي الاولة
– هاكي ماهي معروفة عاد حتى قبل عملتهالي مع ولدي ، والله سمعت وسكت كنت داخلة للمدير بطلت الفايدة في المستوى تصفى وتنفى هي والشهايد متاعها
– وانت ولدك شعمل جابشي باهي؟
– لا الثلاثي هذا انا من الاول موش معملة عليه جابولهم معوضة ماهي انيستو حبيبة ولدت ، الحق كانت تعرفو وهذي ما تعرفش الصغار وما تعرفش تقري حتحتتهم الكل ، حتى بنت سلفي تقرا معاه متعلمة ديما الاولة جات الثانية المرة هذي ، مشينا للمدير قال وسعوا بالكم توة ترجع حبيبة المهم موش في الرتبة الفايدة في المعدل
– اهي جات اساور ندرا شعملت بنتها. يا اساور شحالك؟
– بالله شحالي ماهو خرج من عيني الامتحانات كل ليلة وانا معاهم كلمة بكلمة
– ايه جاشي وجهك للضو شعملت بنيتك؟
– شعندها تعمل بعد الي احنا نقريوا ونتعبوا والمعلم طلع عامل عليها بونتو خاطر ما قراتش عندو ايتيد اوكة قام طيحها في الحساب ونحالها 3 بونتو والله عملتو صحيح غير الطريقة موش كيف ما يحب هو قام كرسحها وزيد جابلهم دراسة النص صعيبة رصاتلها بلاش شهادة ، هو الحق زادة قسمهم قوي بلي معدلها باهي اما جات سبعطاش ، المهم انا نعرف مستوى بنتي محسوب ماشي يدوملهم سي المختار رغم قتلو اول العام المدير نحب نحولها وشيء ما لقاليش بلاصة
– هاكة البلايص يلقاهم كان لجماعتو وتجي فينا احنا يقلك ممنوع ، انا والله مولى بيتي قلي نشكي بيه في المندوبية اول العام غير خفنا لا يعمل بونتو على الطفل
– اهي آمال زادة جاية تظهر مغششة وكانت في بيرو المدير ، يا امال شبيك ياخي شفمة وجهك مشوم؟
– وهوما يخليوا العبد مسلم في ها المكتب ! ولدي خاطر غلطة في المحفوظات نسى كلمة تقوم تعطيه ثمنية ، علاش والله يحكيلي ولد مصطفى المعلم ماهو يقرا معاه ما عرضش بالباهي وعطاتو تسعطاش ، انا سياي ماشي نحول ولدي من ها المكتب اهو بعد نحكي مع بوه نعملوا مطلب ، لا يا حسرة على مكتبنا ونتايجو توة فسد ومعلمين جدد يغيبوا ياسر وصغارنا ضاعوا …
![Motifs 4 جلنار Jollanar Motifs 4](https://inforum-jollanar.com/wp-content/uploads/2024/02/image-4-e1710880768731.png)
تصفح أيضا
![image جلنار Jollanar](https://inforum-jollanar.com/wp-content/uploads/2024/07/image-30.png)
ياسين الرباعي:
_ ايا عجبكشي المحمص الصيفي متاعي
* فاوح يعطيك الصحة
![ياسين الرباعي جلنار Jollanar ياسين الرباعي](https://inforum-jollanar.com/wp-content/uploads/2023/01/ياسين-الرباعي.jpg)
_اهاه نعرفك تقلي هكك وبرة
* لا والله مهم عجبني
_ ايه اما تلقاك يعجبك محمص امك خير
* كل واحد وبنتو اوكة امي تفوحوا وتحرحروا ويجي بنين بالحق
_ اكاهو انت بلي نعمل ونطيب ما يعجبك كان تطيب امك ، برة صير كول عند امك نستاهل فيبالي نطيبلك وما نخليك شاهي شي
* لا يا روحي والله حتى تطيبك فاوح
_ اهاه فاوح هاكة علاش ما كملتش صحنك ياخي متعلم تفضل صحنك انت
* لا هاكة خاطر عملت تحريشة الصباح وقت هبطت اوكي رجعتني على الفطور
_ تاكل البرة وحدك ديما لا مرة قتلي نخرجوا بتي داج والا هزيتني كليت حاجة معاك وحتى تشوف عاد شكون هزيت معاك توكلها
* ما هزيت حد لقيت روحي جعت مشيت عملت ربع تن عند الصحبي الصباح
_ باهي نزيدكشي محمص اوكة بارد وما يعملش الجاير وموش حر كيف محمص امك ينقب الماعدة اللطف
* شبعت الحمد لله
_ باهي توة نسخنوه في العشاء يجي يشره
* تحبشي نكلم امي نمشيوا نتعشاوا عندها يا روحي وخلي المحمص نعديوه لامك تذوقوا ما فيها باس
_ باهي علاش ما نتعشاوش عند امي احنا ماشين ماشين وانت تحرحط كان على داركم تقول شعملتلك امي
* تعرفشي انا ماشي للقهوة وما عيني في عشاء ولا نمشي لحتى دار
_ اكاهو الي عطاك على القهوة كرهتك انت وياها تمشيلها وتلوحني في الدار وحدي برة يرزيكم فيها ها القهوة
* باهي انا قاعد هات نلقاوشي فيلم في التلفزة والا حطلنا الجزيرة
_ لا فيلم لا جزيرة يعطيهم تنطيرة هات الكومند لهوني مسلسلي التركي عدك بيه يبدى خير ما تفوتني حلقة الليلة …
* باهي انا البرة في الفيراندا
– مالا عاد تخنس وحدك بالتلفون والفيس بوك فرصة
* لا فيس بوك لا فيس امك انا ماشي نتمغط نرقد والعشاء محمص وقهوة الصباح محمص كان فضل زادة ، بعدلي برجي بالمحمص نخليه في بيت النوم نلقاه في الكوجينة ….
– نسمع فيك راهو بالله شتمتم وشتقول
* لا قلت ماشي نتبع معاك المسلسل وقيلا باهي يظهر …
![Motifs 4 جلنار Jollanar Motifs 4](https://inforum-jollanar.com/wp-content/uploads/2024/02/image-4-e1710880768731.png)
![image13 جلنار Jollanar](https://inforum-jollanar.com/wp-content/uploads/2024/08/image-13.jpg)
يس الرباعي:
في عرس صاحبي التوفيق قلنا نمشيوا للحمام مع العروس، ايا قول وصلنا للحمام، دخلنا وخذينا مفتاح المرفع الي نخليوا فيه الدبش وطلعت للسطحة عفصت على ساق واحد ملهْوث في فوطة وراقد ياخي قام قلي ماهو حل حبوبك الواحد ما ينجمش يعمل غمضة بعد الحمام في ها البلاد؟
![Yassine Rebai جلنار Jollanar](https://inforum-jollanar.com/wp-content/uploads/2024/07/Yassine-Rebai.jpg)
يا خويا سامحني والله لا ريتك حبيت نتعدى نخلي دبشي …
المهم طلع متسامح وقلي الله يلعنك يا شيطان ، نحيت دبيشاتي ولبست شورط الحمام هاكة الاديداس المخطط الساتان ودخلنا وجاني مسؤول الاستقبال قلي طياب خويا؟ قتلو مالا عاد اللازم لازم، وحطلي استيك في يدي فيه صوردي منقوب ورقم 6 قلي هاك عند البزويش ، ايا لبست القبقاب وهزيت الكرتل طول عبيتو بالماء السخون قلت نغطس سويقاتي.
وانا في بيت السخون ودخلت وطول تقول دخلت للحادث بريحة الفليو ، يا جماعة على سلامتكم ياخي اشنية ها الريحة شفمة غمزني واحد وفهمت الي السبد الي قاعد في فم الباب قد الفرتون وموشم مدخل معاه دبوسة فليو ويدور دورة ويصب على لحمو ويفرك ويقلب عليه سطل ماء ، كنت ماشي نكلمو لقيتو سبقني وغزرلي وقلي سافا العزيز ؟ قتلو ساااافا صحة لخويا ،
ايه ما نطولش عليكم خرجت من غادي مزنزن بالسخانة والخنقة متع الفليو ومشيت للبزويش ايا يا معلم جاشي دوري ، قلي اهو مازال واحد قدامك زيد اسخن ، تقول فوزي البنزرتي ماشي يعمل شنجمون وقلي اسخن …
عاودت دخلت وجاب ربي هاكة الفرتون خرج من بيت السخون وعملت فيها سبورتيف وليت نمسكل والناس داهشة فيا وانا تحليت عاد وليت عامل فيها فندام ، وخرجت للبزويش استلمني الحق بضحكة وقلي خليك على كرشك ، يا ولدي كيفاش توة يصير هذا؟ قلي ايا عاد ما تعطلنيش ، وشماشي يعمل الميت قدام غاسلو تمديت ونحس بجثة طلعت ترفس فيا بسقيها ويقلي سيب روحك ونسمع كان في العظم كل عظمة ترطق وحدها وانا نتحمل نوليشي نعيط والناس يضحكوا ويقولوا ولد ناناتي ،
كمل رفس لين شبع ودورني على ظهري وبدى يجبد في الرقبة يا بزويش يهديك حاشتي بها راني يقلي ريض وسيب روحك خلي تدلك بالباهي وبعد دار يد يد ساق ساق اهو عوجهم اهو جبدهم واهو يحك ويبرم ويرمي البروم قدامي زعمة زعمة اهو الوسخ ويختمها بعد كل فركة بضربة تقول يخبط في قرنيطة وجبد هاكي الكاسة الي تقول عليها بروس ميتاليك وبدى النبي مولاك ووخيكم مع كل جبدة يذوب وساكت موش خوف اما ما فمش جهد باش نتكلم واخر المتمة قلب عليا سطل ماء وقلي ايا صحة ،
اما صحة وخي وانت خليت فيا صحة ودخلت للمطهرة نعمل تشليلة وخرجت ما نشوف في شي في مخي كان نعفصشي مرة اخرى على هاكة الراقد ويقوملي وانا موش ناقص عاد يكملشي على مرمتي ، وتمديت في السطحة ونسمع كان صحة خويا كوكا والا بوڨا؟ ياخويا كويس ماء يرحم بوك فيه البركة ، قلي دبوسة ماء بالفين ، باهي هاتها فمشي ما ينفخ ربي في صورتي ، وبردت شوية ولبست دبيشاتي ولبست بشكير في راسي خايف من الهواء تجينيشي زفة ريح زادة في جرة ها الحمام ،
ايا دخلت للدار ونلقاها برود تشره وريحة البخور عجعاجي والمرا ظهرلي كيفلي مبدلة شوية بالمكياج والافاح … ايا صحة صحة شبيك بطيت تحبشي قهيوة والا كاس تاي ، ايه شبيه هات قهوة لا يقطعك ، هكك وخذاتني عيني لين جات قاتلي في الريح صار كبيت انت؟
فقت مفجوع نسخايب هاكة قباض الارواح متع الحمام الطياب لحق عليا للدار وقلتلها والله لا يد لا ساق راني. خليني نتمغط هوني ونرقد وبرة ، ايه لا توة نغطيك تعيا وانت تستنى وانا محضرة روحي فيبالي ، يا سلسبيل جيب غطي بوك خلي نمشي نكمل المسلسل والمحروم محروم …
![Motifs 4 جلنار Jollanar Motifs 4](https://inforum-jollanar.com/wp-content/uploads/2024/02/image-4-e1710880768731.png)
![image جلنار Jollanar](https://inforum-jollanar.com/wp-content/uploads/2024/08/image-14.png)
يس الرباعي:
– ابويا بويا ، هات عشرين نلف نمشيوا ناكلوا ڨلاس
– يخلي دار امك لين عشرين نلف ماشي تشري الحانوت ياخي؟ اهم الفين جيبنا جيرفاي ناكلوه هوني
![Yassine Rebai جلنار Jollanar](https://inforum-jollanar.com/wp-content/uploads/2024/07/Yassine-Rebai.jpg)
– شمعنتها جيرفاي نحب ڨلاس انا
– الجيرفاي جيلاط بالعصا يعطيك عصاء على جنابك
– اللطف عليه من العصا وليدي عوض تقلو توة نهزوا امك وناكلوا الجيلاط مع بعضنا وتخرجني نبدل الجو وانا محبوسة طول النهار لا نخرج لا ندخل نغسلك في سحاقك انت وصغارك ونطيبلك … تقلو عصا ، زايد والله زايد نعرف سعدي راقد معاك انا
– وين تخرج قلك بعشرين نلف هو واختو برك نمشيوا معاهم لازمني نبيع الموبيلات باش ناخذلكم الجيلاط ، بالله قوم قلم هاكي الدلاعة واغسلنا حارة هندي واكدس اهو برود يشره على الفيراندا
– اما فيراندا ياخي نسيت انت الليلة نزول نادين بنت شافية جارت الطيب خويا والمارا مستدعيتنا وتحلف وتعاود نمشيوا ، ايا قوم حدد سوريتك وسروالك ما بين حضرت انا
– بالله شهزني للنزول جلوة وقدم قدم وتكسير راس اهو ولدك توة يهزك مشوار بالموبيلات وخليني هون انا
– مالا عاد ياخي اول مرة تعملهالي تبعثني وحدي كيف الهجالة؟ ورحمة بويا العزيز الغالي قريب نعيط فيها وووه ايا قوم ها الليلة خيرلك
– الله لا يعطينا ما يغلبنا ، انا قايم برة ابدى احضر اوكي سوريتي الساتان المنورة بالاصفر محددة من العرس الي فات وتوة نلبس سروالي الاخضر
– توة نندب والا نستنى حتى يتلمدوا ، تدخل معايا للجنان هكة تقول داخل معايا حبوبة والا محسن الرايس ، توة نحضرلك انا دبشك كيف راد عليا ربي وانا اهو ما لقيت ما نلبس دبشي الكل راوه عليا ، اسمع ما يهمنيش الليلة تتعدى ماهو نزول انا غدوة الحفلة هبطني الصباح نشري روبة بالوهرة كيف النساء
– يا خليل يا خليل هاكة متع الجيلاط بو عشرين نلف يخدم ماهو غدوة الليل، خلي نمشيولو والله شهيتني ناراه وتوة نهزوا امك معانا خير من العرس …
![Motifs 4 جلنار Jollanar Motifs 4](https://inforum-jollanar.com/wp-content/uploads/2024/02/image-4-e1710880768731.png)
استطلاع
صن نار
- ثقافياقبل 16 ساعة
نقابة المهن الموسيقية تكرّم لطفي بوشناق ونجوم الفن التونسي
- جلـ ... منارقبل 16 ساعة
“الملاك يهبط في بابل”
- اقتصادياقبل يوم واحد
الجديد في معرض السياحة والعمرة الدولي
- رياضياقبل يومين
رئيس النادي الصفاقسي السابق منصف خماخم في ذمة الله
- راجل و سيد الرجالقبل يومين
“محمّصة”
- رياضياقبل يومين
تصفيات كان 2025… تونس في الثانية الأخيرة!
- صن نارقبل يومين
دبلوماسي سابق رئيسا لوزراء فرنسا… واليسار يتهم “ماكرون” بسرقة الانتخابات
- صن نارقبل يومين
عرب فلسطين المحتلة… اضراب عام أول أكتوبر تضامنا مع غزة