يس الرباعي:

– يا دوجة …يا دوجة … يراك ممروجة ياخي ما عادش تسمع والا شعزاك والسقيفة طوالت ياخي

– يرزيك في دوجة يا سيدي النوري ما تهني عليا نعمل شي ، نغسل في راسي بالمطبسة ، شبيك ، شبيك تعيط

– بالله حال لين غسيل الراس وخسارة الغاز خليت لليل فرد مرة

– اهاه كان الكلام عندك بالله استك عليا ، ايا قلي شبيك صبحت تسرج ع الصباح

– حبيت نقلك شلاكتي وين ريقي يبس عليها نحب نخرج للمركز

– وانا وين نعرف على عزاها شلاكتك شوف تحت السرير والا خليتهاشي في باب الميحاض وخرجت بشلاكة الشمع ماك نعرفك فرعاس

– اما شمع ، البارح بايتة في عتبة البيت ، تلقاك هزيتها ونسيت ماهو نعرفك مذهوبة شيرة

– برة برة تفكرت ، الصباح ريتها في ساق رتيبة كنتك خرجتشي تعلف في الدجاج وخلاتهاش في القفص

– توة شلاكة جديدة تقريب خمسة والا هوما ستة سنين نلبس فيها في قفص الدجاج ، ماهو عيدلها انت قلها خلي متع سيدك النوري

– وانا نجمها اللطف ، حريقة وتفوح فيا يعطيهالها على غير يديا ، ابعف واحد من الصغار يجيبها وقص النزاع خير ما تحل علينا حلقها

– الله لا يعطينا ما يغلبنا ، باهي تحبشي حاجة من المركز ندخلها في يدي

– اهاه يباركلك يا سيدي النوري والله ماشي نقول نو على كعيبة حوت تلقاشي مرقة جيب حتى نفيص رطل ما يهمكش خلي الصغار ياكلوا يصفى ، وتلقاليشي لقيشة لوبان وقريطس سواك فمشي ما ربي يرحمنا وانا الي يشوف غسيل الراس يقول الدنيا خلات ، وفرد مرة عدي على عبيشة بنتك قالت خفاتلي دبوسة افاح تشره من عند بن حليمة جيبهالي

– اهاه افاح هاكة شناقصك ، بلي تفوح زميط زايد ، ايا شعندنا فيه هاكة وصيت جلول الجزار على ذيل توة كانوا جابو ندخلهولك باش تشوشطوا على بكري

– انا نقلو لوبان وسواك وافاح وهو يقلي فيل بقري ، اوكم كناينك يشوشطوه والا هزو لاختك نفيسة ماهي تقلك تشتهي حاجة نعملهالك يا سيدي ، تسخايبك واخف مارا حطيطة وفي غبينة يراها في تركينة

– توة لين جابدة نفيسة يراك رفيسة تقول شعملتلك ، تعرفشي بهاكة اليمين الا ما نمشيلها ونتعشى عندها ونبات غاد واكدس فيها وحدك

– لا عاد بالبيتان هو ياخي والله لا صارها جيب ذيل وملخة وراس ونعملهملك هوني وبات في بيتك خير المهم جيب اللوبان والسواك ودبوسة الافاح

– لا بالكشي بايت عند نفيسة انا خاطر الذيل ماهو خاطر اللوبان والسواك والافاح وقلبي ما قايلي خير…

يس الرباعي:

وانا نشوف في اعراس توة وكيفاش ساعات حتى الخو يمشي لخوه كان للصالة ودار العرس الحس بايت فيها … رجعت بالذاكرة لاعراس حضرتهم وانا صغير وخاصة الاقراب منهم وكيفاش من قبل العرس بنصف شهر واحنا متلمدين ويبدى حلان الحلو من صمطان الزلوز لتقشيرو لرحيانو وكل نهار يتحلوا صواني واحنا داخلين خارجين للكوشة وكان الحلو فاوح وبوهرتو يعني كعبة البقلاوة والا الملبس تقول ربع خبزة وريحتو تجيبك منين وخاصة الملبس وقت يتكسى ويترمى تحت الجفنة بالكانون وطبعا ما يحلى الملبس كان مسروق وكنا نعين عساس في باب البيت وباقي الصغار تحشي يدها تحت الجفنة وتمد الملبس …

وفي وسط ها المعمعة الكل كان الي يدخل وفي يدو قضية تابعة العرس يزغرطوا عليه هذي دخلت بقصة للعرس ري ري ري وهذا جاب صباط لعرس ري ري ري… وكل ليلة تتمد الدربوكة وتبدى الزهويات على السطحة او في وسط الدار وهاكة الغنايات السماح نلمو نلمو نحبو ونكره امو ، لليري يا منة ، نوار اللوز يا مفتح ، يامة سامحيني كسّرت القلة ، وصبّ الرشراش وناري على الزينة يمة … وقبل العرس بجمعة تتذبح البقرة او العاصي ويتخبى اللحم ما يظهر كان نهار العشاء الكبير الي فيه صحن برميار سلاطة مشوية وسلاطة خضراء ومطبق طاجين وصحن دوزيام فيه مصلي بطاطا وصحن تروازيام فيه كمونية … والديسار دلاع بارد مازال كيف طلع من البير… وبعد تمشي لليان تصوبن يديك وواحد من الصغار يصفيلك …

لكن قبل العشاء وفتكم بالهدرة جمعة كاملة الفطور والعشاء وشقان الريق مشتقات البڨّاري هوما الي يطِيبوا من كرش وكروع وملخة وذيل ولحم الراس … معنتها لو صغار توة حضروا قبل راهم ماتوا بالشرّ، لانو الماكلات هذم يتباوعوا منهم. … عاد قبل العرس باربعة خمسة ايام بعد ما يتعبى الدبش في الكنستروات ويتڨربط ويتزين، تجي الكميونة والكراهب لهزان الدبش… وطبعا الكميونة فيها المزاودي والشطاحة ويقولونا ردوا بالكم تتكاوا على هاكة الجراري والمسند… ويبدى كنسترو روز فيه الصبابط والشلايك يظهر منهم كان التالون والقعر معبي بالطفل وشوش الورد ودبوسة شمبوان فيزونات… ويوصل الدبش ويهبط المزاودي على السطحة وتربخ وقتها لين النساء يكملوا ترصيف الدبش… وكانت ديما تبطينا هاكي الي تتلهى تريڨل القلاصن والبوسطوات ما نعرفش علاش توخر ،.. اخر ضربة يشدو وليد صغير يڨرڨبوه على الفرش قال اشنوة باش تبكر بوليّد العروسة…

ومن غدوة عاد الحمام ويمشيوا النساء والبنات على سقيهم زنقة كاملة وهوما يدربكوا وتربخ الدربوكة في الحمام… وساعات تقوم عركة بين اخت العروس واخت العروسة تقلها الي جبتوهم خلصوا عليهم انتم قداش منو خويا والاخرى تقلها ما يهمناش هاكم تابعين العروسة هو يخلص … ويجي نهار النزول عاد واللي يكون ديمة في الجنان… ونبداوا من الصباح نصبطوا ونبخوا في الجنان من باب الحوش واحنا ماشين ونحفروا بلايص المادري ونعلقوا فيهم التيبات والبوق الالمنيوم ونحلوا هاكة الكراسي الي يتطواوا… وقدام منصة البندارة نفرشوا “باش” خاطر الغبرة متاع الشطيح… وتجي سعاد البندارة والا ببويا والا مرت عبعوب كل ناس شكون يجيبوا… ويبدى النزول والشطيح بالفلوس الصبية ب 50 والمعرسة ب 100 والاولاد والرجال يشطحوا وحدهم تحت زلوزة المهم ما يقربوش للنساء … وتتجلى العروسة ليلتها ويقعدوا عاد كان القراب والعروس واختو وخوه ويطيب التشيش بالقرنيط وتتجبد الدريوكة ويبدى جو جديد للصباح …

ونهار العرس هاكة في الصالة عاد… يا صالة مروان يا العموص يا بوزيد… ويمكنونا الصغار في بيت الحلو نستفوا البلاتوات وزوز ڨدعان يفرقوا الحلو وزوز اخرين بڨاجو الڨازوز يدوروا واحنا نحلوا في الشقوفات… والڨازوز كان كريش والمسدي والمدّب حاجة ليكس يعني… والنساء وقتها كل وحدة في يدها هاكي المروحة الشنوة تمروح… والمصور يضرب في الفلاش في الفارغ والناس عاملة جو… ويختم العرس بهاكي التصويرة المعروفة متاع العروسة قاعدة على تابوراي وراسها مشنق الفوق والعروس واقف بجنبها يكحل عليها من فوق… ودام الفرح وتتغنى يا سيد الاسياد يا حبيبي بورقيبة الغالي …

يس الرباعي:

– يا مجيدة كيف سبتك في الزنقة وانت مريفة اللطف , ليدك في العاهد الله امس تعملت عليك وقت ريتك تكرب والعروقة تجبد عليك حتى قلت لسيدك النوري توة اليوم نمشي نطيب فم لهاكي المارا بعدلي نعرف ماكلة كناينك ما تعجبكش وهوما يعملوه بوه على خوه وابيف مطزز تطيبهم

– والله هزيت روحي وبرة يا دوجة هاكة الراجل ياكل كان تطيبي , والدار حاست وهاكة البنات الي هافي تعمل بيتها وتوخر التالي , الي عطاهم على غسيل روسهم كل نهار والي تكلمها تقلك راسي سخون وما نخرجش لوسط الدار هواء عليا يعطيهم تنحية , حتى طمعت في عبيشة بنتي تجي تعملي حويجة جات كيف مفهوبة الشيرة دريكزة ونحات كعبات قارص ومشات حتى قلتلها عملي شاربي طلع قاتلي المرة الجاية توة ماشية عندي سبوع جارتي …

– ايه مالا لين خارجة للزنقة شعلى قلبك قعدت كويدسة في بيتك

– ماهو هاكة المغبون متاع الاماعن سمعتو يعيط في الزنقة وانا عندي دبيبسات فارغين وصباط سيدك قادر ما عادش يلبسو وفيستة متاع بويا يرحمو قلت نعطيهملو وناخفشي دويڨرة والا افنين خير من الڨربوج في الدار , اوكة جرتو مشى ما فمش ريحتو يقطع ريحتو كيف يجي كيف بصة الغولة يتعدى يجري وما خلطتش عليه

– هاكة ماهو يجري باش يخلط على شقان الريق عند غربالة ينشفلهم الريق الافنين. وين ما يجي يخلي قفتو عند غربالة ويكدس ياكل غادي وهي تطيبلو في التاي , تشدو عندها ويعلم الله عليهم شيحكيوا والي يحب يبيع حويجة يمشيلو غادي، انا ماشيتلو زادة كيف راد عليا ربي , غيرشي شلاكة سيدك النوري القديمة ديما في الاعراف قعدت وخليناها في الجنان وعندو سروال عربي ليدك في العاهد جديد هو غيرشي تهرى شوية من القندليسة ومن سقيه تريش فتيتة وخيط الدكة لازموا يتبدل , قلت ناخفشي بيهم باقية والا نفص طزينة كيسان طرابلسي

– شوف ما اكبر عقارها غربالة وانا نقول ديمة اميعناتها جدد وسماح وهي منها للعرمة , داها داء من قبل نعرفها انا راهو , مولى الفو عندها , الي يبيع الحي عندها حتى من هاكة الي يبيع الجيلاط عندها , شعلى قلبها وخيتي هافا الكل , وانا توة مريفة نتكرعد شهزني لدارها وهي فلتها في قعر الزنقة , برالو انتي وقلو وقت هو خارج يعدي عليا يعطيها بشية هي وياه

– ايا انت خرجت خرجت نمشيوا مع بعيفاتنا وفرد مرة ناقفوا على كسكاسة خفات لابنها نقولولها مبروك هي ما تكدسش علينا

– اخي ابنها كبر وخفاتلو هي ؟ امس في الايام يكدس في حجري ويلعب عندي , الايام تجري اللطف , والله يشره هاكة الطفل هو يا دوجة منهم خطرة دخل للحوش وانا نغسل في راسي والله طمعت فيه حكلي فهري الحق حكلي ومدلي البشكير ويدور دورة يقلي نقفيلكشي قفية اخرى يا امي مجيدة , اوكة ولى راجل وماشي يعرس , ايه وشكون خفاتلو مازالت البركة؟

– وخيتي قالوا بنت خلتو هوما ملي صغار مع بعفهم وحبو بعفهم وزيد عاد هي عينها قد ماهي كسكاسة ولقات الرزق وطفلة بس عند امها وبوها والرزيق ليلها تقلك ما خيرش منها لابني

– انا سمعت موش بنتهم وخيتي , قالوا ما فناتش قبل المارا ياخي الراجل كلم خوه قلو الفنا الجاي تعطيهولي جات هاكي الطفلة اوكم خفاوها والرزق بخلاء بوه ماشي يبات عندها , انا قتلو مصطفى ابني عليها قبل غير هو حنا وفنا في جرة كمونة يراها مغبونة خليني ساتكة وبرة ماهو مكتوب والعبد سبب يعطيهم كلب الافنين

– هوما الحديف هافا ما خرجوهش راهم متاع الطفلة وقالوا حتى هي ما قالولهاش , شعندنا فيهم يدبروا روسهم احنا نمشيوا نحيوا اللوم من علينا ويتخفوا , خلي تعرس لابنها فمشي ما مولى بيتها يتهد , الراجل لا بعد يشطح على طار بو فلس وهو مبلي بالجوقات والغناء ومن عرس لعرس ومن رقاصة لرقاصة ومسيكنة في غبينة تحرك هاكي كسكاسة

– لا عاد يخدم على رويحتو وبقلبو الراجل واشكان عليه كان يخدم في الجوقة , غيرشي هي ما تحبش عليه وشيطت بالغيرة , محسوب كان شطح ماهو جايها جايها اخر الليل , تقول ما خفات راجل سمح الا هي , رويجلها يشره الحق والله يجينا في العيد يعيد علينا هاكي الكسوة والكروفات تقول لبسهم كان هو , وريحت الافاح تعطرق وحديفو محلاه . العيد الي فات والله كدس مشوار عندنا وحلفولوا البنات كمونة وعتورة يفوق عيدهم في بيتهم وخرجوا فمهم طاقة محلاه محلاه هاكة الراجل غيرشي كسكاسة مشومة وطبيعتها وحشية اللطف علينا

– لا الحق عندو القدر هو حتى احنا يجينا ما غاب علينا حتى عيد وما يمشي الا ما يعيد على مهيرية ويجيب حق الصغار , يحلف ما يعطهولها كان في يدها حق الصغار , عاد لين يشره الراجل , ايا اهو حسو خرج متاع الاماعن ريحنا ربي من دخلت دار غربالة خلي ناراوا شعندو ونمشيوا لكسكاسة بعد

– يشويه حتى تارا خلاتلوشي حاجة هاكي المغبونة , انا قلت يا دويڨرات يا بلاطة حديد نستحقهاشي في تخليط فتيتة زميط والا نحط فيها فردة عصيدة , بعدلي هاكة الكناين شواوني على البلاطة متاعي طيحوها قداش من مرة ودقشوها رصاتلي عملتها مكب في فم الماجل وكلاها الصديد توة ندخلها للمطهرة وبرة نبل فيها الطفل والا في كرتل الميحاض نخليها مازالت وين عادها

– لا تلقى عندو بلايط هكك واختار اعمايا كيسان تاي نعرف عندك الفوق يا مجيدة , حتى انا شواوني على كيساني هاكة البنات بالتكسير والا عند مولى الفو وين يجي يخرجولوا كاس تاي ويهزوا اعماه المغبون

– ايا نكملوا اعماه وندخلوا نكدسوا بالوهرة يا دوجة هافا موش بالواقفة الشي وحديف هب هب تعرفني ما نحبوش انا