مجيدة ودوجة في العرس

– ايا كيفاش صبحت اليوم يا مجيدة بعد ليلة البارح؟ انا ليدك في العاهد الله صبحت دباك الحال حال الله , كان نسخايب هكك لا نمشيلها عفاسة ولا ناراها , جايبتنا خدم عندها يراها في الهم

– هي عاد هاكة حد عقلها وقالتنا انتم امالي الدار وما تقومولي بعرس الفتحي كان انتم

– امالي الدار ؟ يراها في النار رصاتلنا في الدويرة محموشين ليلة كاملة نعبيوا في الحلو ونصففوا فيه وما يزيش هكك الرجال داخلين خارجين ايا تعباشي الطبق وانجزوا ارواحكم الناس يستناوا ويعيطوا علينا , انا كان موش خاطر سيدك النوري الي عرف عليا مية يمين باش نمشي راني كبيت سفساريا وخرجت

– انا نفسي عز بيا راهو غير هافا فرح وكليتها في فعدي وسكت , خلاونا هاكة ڨاجوات الڨازوز بحفانا والصغار جننوني , لا الحق صغارهم بلاش رباية يكب سعدهم في تربية صغارهم , ولد كراية كلب على ايامو , ڨازوزة في حلقو والاخرى في يدو ويبكي يجب يزيد , قربتو مشا جاب امو عوف تكمل على غربتو جاية تعارك فيا تقلي محسوب من دارك الڨازوز خلي يهز والعيب موش فيك فلي خلاك هوني , توة هافي مرا وهافي تربية في الصغار ؟ برة ينقب عينها بمسمار , هات العاهد , كان موش خفت نفرعسلهم العرس راني كركرتها من هاكي الفورمة الي راسها لوسط الجنان ووريتها التملقيط كيفاش وهي صفراء كيف البوكشاش , وبعين اصح مناش جايتني بعد تقلي طابشي التاي خلي نخرج براد , برة يعطيها كراد

– الكلو من عفاسة انا قلتلها مادامنا في بيت الحلو ما يجينا حد وهات المفتاح نحطو في صدري , قاتلي ما عندنا حد وما يجيكم حد انا نحبكم انتم نعرفكم كل شي بالوهرة , وبعد ما نفر الا ما خلا شكون صدم علينا الي يحب التاي والي يحب الڨازوز والي يحب الحلو , وهاكة الحلو الوشقة عاد الي عاملنو , البقلاوة افرب بها الكافر يسلم والله ما عدا كعبتين بالسيف كليتهم لا ريتها في ڨرجومة , والكعك مهبج موش على فرد كعبة حتى كليت حويرة ما تقولش فاوح سكرو ناقص وجرتهم ما حطوش فيه فتيتة قشور ليم , وتكمل تجي اختها تقلي سخنلي طرف دوارة ولدي جاع , برة يراها كي المجمارة النار في قلبها والريح في جنبها , وقت دوارة هو , الواحد مصرانو على برة وهي تقلو شوية للقطوسة ,

– عاد الي فاتك اغرب انت , انا كملت طبق نصفف ونعوج في راسي وخليتو تحت السويس وراجل كيف السبنتري دخل ريحتو تنفي بالشراب ماشي للبير يطلع في الدلو حاطين فيه دبابس والا شخفتهم مع هو يتطايح جات ساقو في طبق الحلو رفسو , يا وليدي علاش هكة , فحك وقلي ماهو عودو ياخي شجرالو هو , راهو شواني يراه مشوي وللة عفاسة جاية تقلي علاش الحلو هكك مرفوس عيب عليك يا مجيدة برة يعطيها تمسيدة ,

– حتى جماعة العوادة خفاوا فينا باي , جاني واحد منهم يحب مشيرب ماء , عبيتلو مشيرب من الماجل الحق شرب وشبعني بدعا الخير , انا فقت كان كيف مشيت للدار جيت نفرب على السطوش ما لقيتوش رجعت نقول هافا وين هافا وين تفكرت مولى العوادة يطلع كان هو رزاني فيه يرزيه في عمرو

– اوووه اللطف وانت وين خليتو ياخي باش يهزو , زيد فبت يا دوجة بالكشي خاطيه الراجل

– وين عندي نخليه ماهو في صدري حاشيتو

– عاد في صدرك وما تفيقش وقت يهزوه بالله يزي عليا وانت كيف الطهلولة

– انا فقت بيدو راني في صدري اما وين نعرف عليه الكازي يلوج على السطوش فعلا عزاه وخلاه ما نسحابوش عينو خاينة

– يعطيك بعزا في عمايلك حال شقربو ليلك ماهو شرب الشربة يخرج على حالو والا عجبك حدبفو وقيتو بصايري تحليت معاه في الحديف

– يا مجيدة راهو محلاه وما ارطبو وقداش مسايسي وشبعني بالفحك اما وين نعرف علا عزاه انا ماشي يفرب السطوش , والله رزاني في محيرمتي كانت فيه ولقشة لوبان كنت نمفغ فيها قلت نخبيها حتى نخرج للسهرية وملقاط و500 فرنك حاطتهم للكار وقت نروح للبلاد ,

– يجبر عليك ربي وخيتي , المهم عدينالهم كل شي في الغاية وربي يهنيهم هات عجبهم التحفير وبرة سمعتشي حاجة انت؟

– وانا وين نسمع تعرفني نتلهى بالناس والا نسأل والا نحكي بيهم؟ فعلا بعزاهم وخلاهم ماني خليتهم خايفين مع مولى الكراسي, قلك لا بعد كسرولو عدت يديك كريسيات وحبهم يخلصوه فيهم وقاملو الطيب خو العروس وقلو كيفاش تاخف الغرامة وشي وراد الله بيه وماهو عندو العصب هو ولى يتهدد على االراجل ومرتو شقرونة قالت فيها واك وطلقت العيطة وتقلهم بالله شدوه راهو عندو العصب وتوة يافي الراجل ودخلت فيهم غولة وليت وسليت روحي وقلت لسيدك النوري خدم الموبيلات واخرج ...

ـ يتبع ـ