“محمّصة”

ياسين الرباعي:

_ ايا عجبكشي المحمص الصيفي متاعي

* فاوح يعطيك الصحة

_اهاه نعرفك تقلي هكك وبرة

* لا والله مهم عجبني

_ ايه اما تلقاك يعجبك محمص امك خير

* كل واحد وبنتو اوكة امي تفوحوا وتحرحروا ويجي بنين بالحق

_ اكاهو انت بلي نعمل ونطيب ما يعجبك كان تطيب امك ، برة صير كول عند امك نستاهل فيبالي نطيبلك وما نخليك شاهي شي

* لا يا روحي والله حتى تطيبك فاوح

_ اهاه فاوح هاكة علاش ما كملتش صحنك ياخي متعلم تفضل صحنك انت

* لا هاكة خاطر عملت تحريشة الصباح وقت هبطت اوكي رجعتني على الفطور

_ تاكل البرة وحدك ديما لا مرة قتلي نخرجوا بتي داج والا هزيتني كليت حاجة معاك وحتى تشوف عاد شكون هزيت معاك توكلها

* ما هزيت حد لقيت روحي جعت مشيت عملت ربع تن عند الصحبي الصباح

_ باهي نزيدكشي محمص اوكة بارد وما يعملش الجاير وموش حر كيف محمص امك ينقب الماعدة اللطف

* شبعت الحمد لله

_ باهي توة نسخنوه في العشاء يجي يشره

* تحبشي نكلم امي نمشيوا نتعشاوا عندها يا روحي وخلي المحمص نعديوه لامك تذوقوا ما فيها باس

_ باهي علاش ما نتعشاوش عند امي احنا ماشين ماشين وانت تحرحط كان على داركم تقول شعملتلك امي

* تعرفشي انا ماشي للقهوة وما عيني في عشاء ولا نمشي لحتى دار

_ اكاهو الي عطاك على القهوة كرهتك انت وياها تمشيلها وتلوحني في الدار وحدي برة يرزيكم فيها ها القهوة

* باهي انا قاعد هات نلقاوشي فيلم في التلفزة والا حطلنا الجزيرة

_ لا فيلم لا جزيرة يعطيهم تنطيرة هات الكومند لهوني مسلسلي التركي عدك بيه يبدى خير ما تفوتني حلقة الليلة …

* باهي انا البرة في الفيراندا

– مالا عاد تخنس وحدك بالتلفون والفيس بوك فرصة

* لا فيس بوك لا فيس امك انا ماشي نتمغط نرقد والعشاء محمص وقهوة الصباح محمص كان فضل زادة ، بعدلي برجي بالمحمص نخليه في بيت النوم نلقاه في الكوجينة ….

– نسمع فيك راهو بالله شتمتم وشتقول

* لا قلت ماشي نتبع معاك المسلسل وقيلا باهي يظهر …