“وتلة”

– يا بويا صحابنا الكل خارجين في العطلة كان احنا اهو ديما كادسين في الدار

– هذا برد لا دخول لا خروج تسخن الدنيا ونخرجوا ياخي اذا الناس بايعين عمرهم وتجننوا نقوموا نتبعوهم؟ توة نعملوا ايامات كيف العادة عند حناتك ويتلموا صغار عمك وعمتك وتوة نشريلكم ديمينو واعملوا جو غادي

– يا راجل راك قهرتني ونهرتني ، في الصيف تقول الدنيا سخونة حتى تبرد الدنيا وفي الشتاء تقول حتى تسخن الدنيا ، والله لا يهمني العطلة هذي تخرجنا للوتيل اوكي حتى راضية اختي ماشية وقاتلي امشيوا معانا

– اما وتيل متاعك وقتو هو؟ وزيد شماشي تارا فيه محسوب كان الماكلة البايتة والمجمرة والسهرية بالشراب وقلة المعروف وحتى التلفزة في البيت يحطوا فبها قنوات متع ڨورّة لا ساس لا راس ، انا تعرفني ها الوتلة لا انا لا هوما

– وانت ماشي للتلفزة باخي يرزيك فيها؟ ماهو نبدلوا الجو والصغار يعوموا قلك بيسين سخونة تشره وكانك على السهرية نسهروها في البيت مع راضية وراجلها والصغار في بيت ، هاكي ماك تعرفها تمشي كان بالوهرة اوكي حضرت المقروض وماشي تهز دبوسة الغاز الصغيرة لقليان القطانية والقلوب ولبراد التاي ، اسمع انا ماشية ماشية راهو اهو نقلك وامك امشيلها انتي والعب معاها الديمينو

– توة أنا مخبي زوز صوردي قلت ندخل الربيع ونبدى المرمة نصلح هاكي الكوجينة ونركب البانو وانت تحب تفرنيهم في الوتيل ، اذا راجل راضية عقلو خف انا مازلت بعقلي راهو

– انتي الناس الكل مجانن عندك ماهو نعرفك ونعرف سعدي الراقد ملي خذيتك وانا من مرمة لمرمة ، نعملوا ليلتين برك يصفى المهم نحب نمشي وعطيت كلمة لاختي اهو نقلك

– يا بويا ا بويا نحب تشريلي ميو باش نعوم وشمبرار قالوا غارقة بيسين الوتيل

– وباية توبيك لقيتشي ما تحل علية ها الليلة توة يجي الصيف ونهزك للبونتا عوم لين تشبع وانا قلتلكم ها الوتلة لا انا لا هوما وزيد انا نصلي والعرا والڨرا غادي ويطيبونا ويديهم بلحم الحلوف جماعة الوتيل ، فم مغلي بالخضرة من عند امك خير من الف وتيل

– ايواه لقاها فيسع ، الصلاة والعبادة جاتو توة اما عينيه مرشقة في البنات طولك يا نهار في التلفزة ميسالش هاكة وساعات تفوتوا الصلاة وهو يقلي حتى نكمل الفيلم ويدخل يتكب يرقد ، اسمع بيت الوتيل سخونة راهي وغير تقلي نتسوقط ونحب نتغطى ونرقد

– لا يا وخي تعرفني ها الشوفاجات ما نحبهمش ونسخن ونخرج ونتبيلك في جرتهم خليني في داري وستر الله مسبول عليا

– عاد اذا ماشي تسكّر السخان في الوتيل وترقد لين ماشين برة اشري ديمينو ونهزوهم عند امك الصغار …