شعريار
أمل حياتي
أحمد شفيق كامل
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
أمل حياتي يا حب غالي ما ينتهيش
يا أحلى غنوة سمعها قلبي ولا تتنسيش
خذ عمري كله، بس النهار ده خليني أعيش
خليني جنبك، في حضن قلبك، وسيبني أحلم
يا ريت زماني ما يصحينيش
***
أملي، حياتي، عينيّ
يا أغلى مني عليّ
يا حبيب امبارح وحبيب دلوقتِي
يا حبيبي لبكرة ولآخر وقتي
إحكي لي قول لي
إيه م الأماني
ناقصني ثاني
وأنا بين إيديك
عمري ما ذقت حنان في حياتي
زي حنانك
ولا حبيت يا حبيبي حياتي
إلا عشانك
وقابلت آمالي، قابلت الدنيا، قابلت الحب
أول ما قابلتك واديتك قلبي يا حياة القلب
أكثر من الفرح ده ما احلمش
أكثـر من اللي أنا فيه ما اطلبش
بعد هنايا معاك يا حبيبي
لو راح عمري
أنا ما اندمش
***
وكفاية أصحى على ابتسامتك
بتقول لي أعيش
أسمعها غنوة
بتقول لحبي ما ينتهيش
خليني جنبك في حضن قلبك
وسيبني أحلم
يا ريت زماني ما يصحينيش
***
يا اللي حبك خلى كل الدنيا حب
يا اللي قربك صحى عمر وصحى قلب
وإنت معايا يصعب عليّ
رمشة عينيّ ولا حتى ثانية
يصعب عليّ لا يغيب جمالك
ويغيب دلالك، ولو شوية
قد كده مشتاق إليك
قد كده ملهوف عليك
نفسي أنده لك بكلمة
ما تقالتش لحد ثاني
كلمة قد هواك ده كله
قد أشواقي وحناني
كلمة زيك، واللي زيك فين؟
ده انت زيك، ما اتخلقش اثنين
***
يا حبيبي مهما طال عمري معاك
برضه أيامه قليلة
دي السعادة والحنان اللي في هواك
ما يقضيهاش أجيال طويلة
حبك ملا قلبي وفكري
بينور ليلي، يطول عمري
بيزيد في غلاوته دايما بيزيد
وتملي جديد في حلاوته
وتملي جديد
إنت خليتني أعيش الحب وياك ألف حب
كل نظرة إليك بحبك من جديد،
آه بحبك من جديد وأفضل أحب
أنا حبيت في عينيك الدنيا
كل الدنيا
حتى عوازلي أو حسادي
كل الناس حلوين في عينيّ
طول ما عينيّ شايفة الدنيا
وإنت قصادي
***
وأنام وأصحى على شفايفك
بتقول لي أعيش
أسمعها غنوة
بتقول لحبي ما ينتهيش
خليني جنبك في حضن قلبك
وسيبني أحلم
يا ريت زماني ما يصحينيش
