“اشري تربح” !

ابويا ابويا … صاحبي عندو ايفون يحب يبيعو والله نظيف وطالب فيه زوز ملاين برك امانك خليني ناخذو

– وباية توبيك قلو ايفون هاكة شناقصني انا ، كان شديت دروسك سدوا عليك خير قلو تلفون باش تبات ليلة كاملة وانت جاك من قدام جاك من تالي واقتلو ما تخليهش …

– بالله سيب عليك من بوك يا طفل ما تعرفوش هاكة غير نقولوا على حاجة يجيب الفقر الكل

– بسم الله المانع الستار تقول من تحت بسم الله اللطف ، ياخي موش خليتك في البيت انت بحكة الحلوى قلت عندك ما تعمل

– اهاه عملت وكملت وما لقيت ما نلبس باش نخرجوا غدوة للبتي داج ، دبشي الكل لبستو وكرهتو وانا توة عام نحك فيهم وندك ، اسمع اهو نقلك توة نلبس الي يجي والعشية توة نكلم سندس اختي نمشي انا وياها نشري دبشات وبوت في ساقي اوكة باش تعطيني الفلوس وتعمل حسابك ، وكمل قضياتك على بكري باش تخليلي الكرهبة خير ما تقعد تستناني عند الحجامة وتعملي كيف كل مرة هاكي الصابونية في قداش تقعد وفي كرهت الحجامات وتخرجني كيف مذهوبة الشيرة كل مرة ، واسمع ما تقول لحد يجينا الليلة ماهي سندس معايا عاد وما تلحقش على تطيب عشاها قلتلها تجيب صغارها من العشية ويلحق الصادق راجلها وكيف نجيوا نطيبوا مع بعضنا ، اوكة كان تحب خوذنا زوز كيلو لحم ورطل لحم مفروم نعملشي بريك الدنوني وما تنساش حكة قطانية و قرنيطة صغيرة وكعبات كروفات للسلاطة ، وكيف نجيوا هز الكرهبة جيب امي معانا ما فيها باس وحدها مسكينة وكان مشيت لداركم سلم عليهم ما تبطاش وبرة

– يا رامي تراه شوف صاحبك باع هاكة الايفون والا مازال …