“اقرا واحفظ”

– ابويا ..يا بويا ، هاكة سيدي عطانا تمارين فمة اسئلة ما عرفتهمش امانك قلي عليهم

– وباية توبيك ، توة شبي عزاك غير تشوف خليقتي تجيك القراية الكل ، باهي هات فيسع الاسئلة

– اهو هذا ما عرفتوش : وقتاش بدات الحماية الفرنسية في تونس ؟

– لا وقيلا عندها ياسر راهو ، ملي انا صغير قد هكة ونسمع بالطيب ولد بن عم بويا يخدم في الحماية وكانوا يقولولوا يخدم في عسكر الحريقة ، برة اكتب قول ثلاثين والا هوما اربعين سنة

– باهي ، ومازال هذا ما عرفتوش زادة : متى دخل الجيش الاسلامي لفتح تونس ؟

– لا هذا فيبالي كاسح شوية ، اما استنى نقلك ، على كلام عمي النوري يرحمو قال هو صغير سمع جدو يحكي كانوا يلعبوا في الديمينو في المركز وجاوا جيش وقفوا بحذاهم وشربوا كاس تاي وشدوا الثنية ، برة قول عام الخطر هذا ، اكتب هكة انت هظاكهو

– باهي مازال هذا …

– ايا سيب بوك يرتاح انت يا طفل فيه البركة

– بالله خليه يتثقف يا نفيسة اوكة فرصة يعرف حاجة ما كانش يعرفها والا تحبوا يطلع كيف خوالو ؟

– يا حسرة عليك كان نخلط عيني نشرمها اما نخاف على عدمها ، هزيت عينك لثقافة محسن و والباشا خواتي ، شبيهم اوكم لاباس عليهم محسوب محسن كيف الطبيب وبكلمتو في السبيطار بعدلي ينصب قدام السبيطار بدبش البالة والكلهم يجيوه ، نسيت ليلة الي طحت من السرير وجيت على مخروقتك وكيفاش هبطك للحادث بلاش صف وكان موش على خاطرو راهم قالولك تكسرت اما مكابرة فيه قالولك ترضريضة وبرة ، تنكر تراه ؟ وهاكة الباشا العزيز ملي ولى يبيع الدخان قدام الليساي والاساتذة الكل ليلو ولاوا وبكلمتو ياخي ولدك وقت يغيب شكون يدخلو موش هو ، محسوب استاذ اعماهم ولى الباشا ، ومازال يتكلم على ثقافة خواتي ، بالله لم عليا عسلك حتى توصل شطرهم

– باهي باهي يا ليتها من كلمة وخليني نكمل نقري الطفل ناقص ياسر راهو في الثقافة العامة …

– ايا باهي شعدنا فيه كمل وايجاني للبيت حاشتي بيك

– لا وقيلا راني ماشي نطول مع الطفل موش قتلك ناقص ياسر وتوة نتكب نرقد هوني

– توة ناوي تقتلني ناقصة عمر ، نحبك تجيب الكرسي وتطلع فوق القلص تمدلي الفاليجة متع الدبش نلقاشي حاجة ما شافوهاش عليا نلبسها في عرس صوفية بنت نفيسة مرت التوفيق بن عمي ، اوكة قلت خير من خسارة الفلوس نلبس دبشاتي القدم

– بالله خلي مرة الاخرى يا من عاش احنا وين والعرس وين

– مالا تعرفشي كيفاش خليلي تقليعة غدوة نمشيشي مع سلسبيل بنت خويا لمارا تجيب الدبش من الخارج والله تشره الحق تحكي عليها سلسبيل وتاخذ الفلوس حتى بالدفعة وفرد مرة نتعداشي معاها نشوف صباط ونعربن على الحجامة من توة نعمل كيراتين ونصبغ تحبلي 200 نلف على الاقل

– يا طفل برة للكوجينة جيبلي كرسي نمد هاكي الفاليجة بالكشي سلسبيل موش فاضية غدوة