شعريار
البحر بيضحك ليه؟
نجيب سرور
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البحر بيضحك ليه
و أنا نازلة أدلع أملا القلل؟
البحر غضبان مابيضحكش
أصل الحكاية ماتضحّكش
البحر جرحه مابيدبلش
و جرحنا ولا عمره دبل
مساكين بنضحك م البلوه
زي الديوك و الروح حلوه
سارقاهم السكين حموه
ولسه جوّه القلب أمل !
قللنا فخّارها قناوي
بتقول حكاوي و غناوي
يا قلة الذل أنا ناوي
ما أشرب و لو في الميّه عسل
ياما مَلِينا و ملينا
لغيرنا .. و عطشنا سقينا
صابرين و بحر ما يروينا
شايلين بدال العلّة علل
في بالي ياما و على بالي
و اللي بيعشق ما يبالي
مايهمنيش من عزالي
يا حلوة لو مرسالي وصل
بيني و بينك سور ورا سور
و أنا لا مارد و لا عصفور
في ايدي ناي و الناي مكسور
و صبحت أنا في العشق مثل
و البحر بيضحك ليه
و أنا نازلة أدلع أملا القلل