الذباب القزوردي 3D..

من المفروض أن الذي يأتي بعد حُكم فاسد: يحاول أن يكون أقل فسادا.. و من أتى بعد ديكتاتور يسعى ان يكون أكثر ديمقراطية.. فالعاقل من اتّعظ بأخطاء غيره..

مثلا: جماعة “الشعب يريد” كانوا يلومون قطيع النهضة و ذبابها و شتمها و سُبابها لكل من تسوّل له نفسه قول كلمة ما تعجبش في حق النهضة أو أحد رموزها.. للأسف يبدو أن الحكاية عادة من عاداتنا.. سلوك مرتبط بالـ ADNمتاعنا: إذ هاهم جماعة (الشعب يريد) ماهمش مقصرين مع كل من تُخوّل له نفسه الأمّارة بالسوء قول كلمة في سيدنا..

بالتجربة: ادخل الصفحة الرسمية لرئاسة الجمهورية و ركز مع أي كلمة للسيد الرئيس.. اكتب (كلنا قيس سعيّد.. أو يا معذبهم.. أو برافو سيّدي الرئيس..) و شوف قدّاش تجيك من (j’aime..) و جرّب اكتب -كما جرّبتُ و كتبتُ- جملة نظيفة لا فيها سب لا خروج عن النص.. مثلا كتبتُ (سيّدي الرئيس نريد أفعالا لا أقوالا..) و عينك ما تشوف إلا النور.. يا حمزاوي يا نهضاوي يا متاع القرضاوي و الشعراوي و الكيمياوي..

يا رسول الله الى هذه الدرجة ولّينا نرفض الرأي المخالف..!! ياخي كيفاش باش نصلحوا إذا كان مافمّاش نقد..!! ياخي سيدنا معصوم من الخطإ ..!! راهو في الكرة: تنقد فريق رابح خير من أنك تنقد فريق خاسر.. و سيدنا اليوم رابح و منتصر.. و كِيما عندو ملفات سياسية عندو زادة ملفات اجتماعية و اقتصادية.. و الدليل أنه كلما ترأس مجلس وزراء كانت نفس الخطبة و نفس المواويل (الغرف المظلمة.. و القضاء الفاسد.. و الدستور المفخّخ.. و خرافتنا هابا هابا و العام الجاي تجينا صابة..)…

لكن في هذا الكل وينو الزيت و الدخان و عشرات الأنواع من الأدوية..!! وينو القضاء على الاحتكار و التهريب..!! يا معلّم حتى الروز بدا يتّقطع.. و تتكلم يقولولك: عجبوك العشرة سنين إلي فاتوا..!!! والله لا عجبوني.. أما راهي تونس 2022 تستاهل ما خير من السنوات العشر العِجاف.. و تستحق ما خير من هذا الحاضر الضبابي..