الرئيس قيس سعيّد عندو الحق..

تفاجأ عدد كبير من التونسيّين من الكلام الذي صرّح به الرئيس قيس سعيّد خلال حواره مع الصحفي توفيق المجيّد على قناة فرانس 24 وخاصة عندما قال إنّ مناخ الاستثمار في تونس غير ملائم… وأكاد أجزم أنّ مُنافسي الرئيس وأعداءه قد وجدوا المناسبة سانحة لتشويه الرجل ووصفه بمختلف النعوت البشعة.

ولكن… يا جماعة (كما يقول صحفي قناة الجزيرة فيصل القاسم الذي لا أحترمه) تعالوا نناقش الموضوع بهدوء.. علاش تلومو على قيس سعيد كيف قال المناخ السياسي غير سليم؟؟ يكذب؟؟ موش غاطسين في الوسخ للعنكوش؟ بالكشي الرئيس يتبلّى علينا؟؟ صحيح أنّو هو بيدو جزء من المناخ السياسي الخامج.. وصحيح أيضا أنّ رايس الريّاس ما يلزموش يجبد الخُنّار متاعنا في الخارج.. لكن يلزم نعترفو أنّ المسؤولين في الخارج ماهمش يستنّاو فيه باش يقولها..

هوما يعرفو المصارن متاعنا آش فيها.. وراس سيدي محرز الدول الأجنبية تعرف كل كبيرة و صغيرة علينا.. ماهمش راقدين على وذنيهم؟ السفارات متاعهم في بلادنا وابناء تونس من القوّادة يبعثو يوميا التقارير والأخبار.. وإذا فمّا واحد يتصوّر أن المستثمرين يستنّاو في خطاب قيس سعيّد باش يجيبو فلوسهم في صندوق ويستثمرّو في تونس ننصحو يغُم على راسو ويرقد.

يا جماعة(كيما يقول صاحبنا) إيجاو نحسبُو قداّش من مستثمر أجنبي هزّ شلاّڤاتو و ملاّڤاتو و هجّ من تونس ساقيه أعلى من راسو!! وقداش من تونسي ولد بلاد هجّ منها ومشى يستثمر في المغرب والجزائر وغيرها! انا متأكد أنّك انت بيدك (أيها القارئ السعيد) كان غدوة تجيك هجّة، تدفع عليها الفلوس!!! صحيح أنّ الرئيس يلزمو يكون إيجابي ويبعث الأمل والتفاؤل وخاصة كيف يكون في الخارج… لكن علاش نخبّو عين الشمس بالغربال؟

وضعية بلادنا في الحضيض والشعب كركار وزعيم في المطالب والإضرابات والاعتصامات… والمسؤولين في عوض يطبّقو القانون ويفرضو الإنضباط، قاعدين يدورو من بلاد لبلاد و يسّاسيوْ يا كريم متاع الله!!! المناخ السياسي والاقتصادي في بلادنا غير سليم و حتّى مستثمر ما يجي بكلام سعيد و الا بلاش و حتّى كان يجي، بعد شهر على أقصى تقدير يلمّ فليجتو و يروّح! شكون ينجّم يخدم مع إدارة العصور البدائية و السرّاق و المرتشين و إلّي ما يعملك ورقة و الا يخرجلك سلعة و إلاّ أي خدمة من أبسط الخدمات، الا ما يقلّك “افرح بياّ عاد”!

شكون ينجّم يستثمر في بلاد قباضتها مڤرفة أكثر من شهر و أبسط الخدّامة يوقفلو البزنس متاعو و كان لزْم يطّيحولو قدرو؟؟ شكون يستثمر في بلاد معدّل العمل اليومي فيها 8 دقائق ؟ (المعلومة هذي مانعرفوش منين جابوها).. قيس سعيد ما يعرفش السياسة و ما يعرفش الديبلوماسية و لا علاقة في الشؤون الداخليّة و الخارجيّة أماّ عندو الصدق (وممكن نسمّيه تجلطيم) إلّي واضح في طبعوا و هذا ما ستانسناش بيه خاطر البلاد ما عرفنا فيها كان الساسة الكذّابة و الرهدانة، و المنافقين و الانتهازيّين و السرّاق…حاشى الأقلية القليلة إلّي ما تستاهلش!