“بروتين”

– ابويا ..يا بويا ، ايا تقريني شوية غدوة عندنا امتحان وفمة اسئلة ما عرفتهمش امانك قلي عليهم

– وباية توبيك ، توة شبي عزاك غير تشوف خليقتي تجيك القراية الكل ، باهي هات فيسع الاسئلة قبل ما يبدى الماتش

– اهو هذا ما عرفتوش : لفلاح سبعة بقرات ولانه لم يقم بمراقبتها مع البيطري مرضت 5 بقرات وماتت ، كم بقي له وكم كانت خسارته؟

– بالله شقعدلوا هذا كان الكازي ؟ اكتب هذا داروا خلات وبرة

– باهي ، ومازال هذا ما عرفتوش زادة : نهضت امك في الصباح الباكر وجهزت فطور الصباح ، حدد كمية البروتينات الموجودة على طاولة الفطور ؟

– لا وقيلا المعلم ما يعرفش امك تصبح امغطة واحنا الباهي فينا يغطس كعبة عليق في البسيسة ويخرج … اكتب الحليب مقطوع هو والزبدة وزيت الزيتونة بويا يستنى في قرض باش نشريوه برة حط زوز والا هوما ثلاثة بروتينات

– باهي مازال هذا ...

– ايا سيب بوك يرتاح انت يا طفل فيه البركة

– بالله خليه يتثقف يا نفيسة اوكة فرصة يعرف حاجة ما كانش يعرفها والا تحبوا يطلع كيف خوالو ؟

– يا حسرة عليك كان نخلط عيني نشرمها اما نخاف على عدمها ، هزيت عينك لثقافة محسن والباشا خواتي ، شبيهم اوكم لاباس عليهم محسوب محسن كيف الطبيب وبكلمتو في السبيطار بعدلي ينصب قدام السبيطار بدبش البالة والكلهم يجيوه ، نسيت ليلة الي طحت من السرير وجيت على مخروقتك وكيفاش هبطك للحادث بلاش صف وكان موش على خاطرو راهم قالولك تكسرت اما مكابرة فيه قالولك ترضريضة وبرة ، تنكر تراه ؟ وهاكة الباشا العزيز ملي ولى يبيع الدخان قدام الليساي والاساتذة الكل ليلو ولاوا وبكلمتو ياخي ولدك وقت يغيب شكون يدخلو موش هو؟ ، محسوب استاذ اعماهم ولى الباشا ، ومازال يتكلم على ثقافة خواتي ، بالله لم عليا عسلك حتى توصل شطرهم

– باهي باهي يا ليتها من كلمة وخليني نكمل نقري الطفل ناقص ياسر راهو وانا مطمان بيك تقريه اهو طلع ما فاهم شيء