بطولتنا بين شبهات الفساد.. وشعار بوس خوك..

في 2015 قدّم سليم الرياحي تسجيلات صوتية تؤكد بالأدلة البيع و الشراء في بطولتنا: اتفاق على التخاذل و مفاوضات حول المبالغ المالية.. و فتحوا تحقيقا و عملوا لجنة للبحث و التقصّي و لجنة ثانية لمتابعة أعمال اللجنة الأولى و لجنة ثالثة لطمس أعمال اللجنتين…. و سكّرنا الملف و انتهى الموضوع بعقوبة (بوس خوك و عفا الله عما سلف..)

في موسم 2017/2018 قال عبد السلام السعيداني رئيس النادي البنزرتي إن أحد مسؤولي الملعب القابسي اتصل به و عرض عليه مبلغ 250 ألف دينار مقابل تخاذل لاعبيه و تمكين الستيدة من نقاط الفوز.. بعد صدّرنا فضيحتنا لفرنسا و تحل بحث بعدما تجبد اسم ابن اخت هشام ڨيراط في شبهة بيع و شراء لمباراة نجم المتلوي و اتحاد بن قردان.. و تعدّات الحكاية inaperçue.. رغم ان المنطق كان يفرض فتح تحقيق: إما للإدانة إذا ثبت التلاعب أو لتبرئة الشاب و والده و إعادة الاعتبار لهما..

و قبل دربي قابس طلع علينا اللاعب زياد الشاوش متهما ثلاثة لاعبين بالاتفاق على كيفية التلاعب بنتيجة مباراة الجليزة و الستيدة بمقابل مادي.. لكن لا الجامعة تحركت و لا الرابطة فتحت تحقيقا.. و الأسبوع الماضي تحدثت وسائل الإعلام العالمية و الوطنية عن نتيجة مقابلة جمعيتي رادس و المحمدية (7/7).. و تحركت الجامعة و جمّدت النتيجة و وعدت بفتح بحث و ستضرب بقوة لو اتضح ان في الأمر تلاعبا.. رغم أن كل الأدلة و خاصة توقيت الأهداف و أسماء الرابحين الذين تكهنوا بالنتيجة النهائية (7/7) و التي تحصل مرة في القرن..

و يا من عاش: يجي رمضان و نغطسو في المصروف و الأدعية و يجي التلقيح و مباريات الكأس و الدربي.. و ننسى حكاية التلاعب و التخاذل و بوس خوك.. كما أنه أمس من الصباح و تونس الكل تعرف النتيجة النهائية لماتش القروان و بن ڨردان.. حتى مسؤولي الشبيبة وصلتهم الإشاعة قبل أن تصبح حقيقة.. و صدق أصحاب الإشاعة و ربح مراهنو الپلانيت.. و جامعتنا الموقرة مهبطة تهديد و وعيد و تنديد شديد بشركات الرهان خاطرها تخدم ordre راسها.. معناها العيب في الپلانيت..

و آخر ما ظهر … ها هي السلطات الفرنسية المختصة في الرهان الرياضي، تمنع متراهنيها من اعتماد مباراة من بطولتنا (بن قردان ضد الستاد) تدور عشية هذا اليوم … و لا أظن ذلك لأجل رداءة أرضية الميدان، أو لعدم اكتمال نصاب الفريقين، أو لدواع أمنية، أو بسبب الكورونا …

الملاعبية أبرياء.. و الحكم بريء وهو الذي لو صفّر ضربة الجزاء الصحيحة للقيروان راهو طيّح كل شي في الماء.. تو نحلّو تحقيق و بحث.. و تو نوجهو التهمة للپلانيت و التوانسة اللي يتعاملوا مع شركة غير مرخص لها.. و بوس خوك.. راك في البطولة الاولى عربيا و إفريقيا..

فساد عابر للقارات !