“جانفي”

– اهو جاء جاتفي مااطولو وما اندبو ديسمبر يا راجل

– الكل بالنقص من عمرنا محسوب مادام شي لا الطويل ولا القصير

– ايا تراه فاش يذكرك جانفي على الاول؟

– فاش يذكرني بالله ماهو في الليالي البيض والسود واوكة السوق مردوم بالنداس والاحناش

– اما احناش واما ليالي يرا ايامي التالي وانت الي عطاك على كرشك ، نقصد جانفي شنو يجي فيه

– فمة عيد الثورة وقيلا زادة فتوح ولد جارنا الصادق ماشي يكتب الصداق والاشهار في الصيف قالوا

– والله قريب نشق دبشي ونقول فيها وووه … شدخلني في صداق فتوح انا . نقصد 8 جانفي باش يذكرك

– ثمنية ، ثمنية … موش فيبالي نهارت صبينا هاكة الخرخوط من ظهرة باش خرجنا الميحاض وبيت البانو باش كبرت الكوجينة

– اما كوجينة يراني في تركينة خليك ترتاح مني ، 8 جانفي موش نهار جيت عطيت فيا الكلمة وخذيتني

– بالله شذكرك فيه ها النهار

– طرشة تحدث في مجنونة تسمعشي بها ، ويزيني من الدرويش متاعك

– مالا فيشطة تلقاه جاب ربي قتلي خلي نوصي على دوارة على وسع طيبهانا نهارتها والا ملخة كان تحب المهم قلي باش نوصي

– نندب والا نستنى يتلمو ها الليلة معاك ، انا نقلو ذكرى خطوبتناوهو يقلي دوارة ، راهو لازمك تجيبلي كادو في ها المناسبة كيف استبرق بنت خلتي راجلها كل عيد خطوبة وعيد زواج يجيبلها يا فردة ذهب يا لبسة سمحة يا صباط يا كبان سعدي ووعدي ومعاهم شكلاطة ووردة

– توة لازم تحرقها المفاجاة يا مرتي ، ايا مادام انت جبدت الحكاية انا وصيتلك على زوزين قلاسط بشكير تسخن بيهم سقيك في الشتاء وانت كل ليلة تلسعني بسقيك في الفرش وقلت نجيبهملك نهار عيد خطوبتنا

– هكة … قلاسط وبشكير زادة ؟ زايد الرجال عندهم اماليهم والحب لاماليه يشرق عليا محسوب انا

– انا راهو كل نهار عندي نهار حب معاك يا رتيبة موش كان نهار خطوبتنا

– كولني كولني باللغة ماهو نعرف زهري

– حقة جبتلك ساشاي ليم وراسين بسباس اوكة بحذا العتبة حضرهملنا للسهرية واعملنا قلية فول كان تحب

– انا بالحق ماشية تغلي طرف بسباس ونتغلف بالفيكس ونتمغط وكولو انت الفول والليم