“جيلاط”

يس الرباعي:

– ابويا بويا ، هات عشرين نلف نمشيوا ناكلوا ڨلاس

– يخلي دار امك لين عشرين نلف ماشي تشري الحانوت ياخي؟ اهم الفين جيبنا جيرفاي ناكلوه هوني

– شمعنتها جيرفاي نحب ڨلاس انا

– الجيرفاي جيلاط بالعصا يعطيك عصاء على جنابك

– اللطف عليه من العصا وليدي عوض تقلو توة نهزوا امك وناكلوا الجيلاط مع بعضنا وتخرجني نبدل الجو وانا محبوسة طول النهار لا نخرج لا ندخل نغسلك في سحاقك انت وصغارك ونطيبلك … تقلو عصا ، زايد والله زايد نعرف سعدي راقد معاك انا

– وين تخرج قلك بعشرين نلف هو واختو برك نمشيوا معاهم لازمني نبيع الموبيلات باش ناخذلكم الجيلاط ، بالله قوم قلم هاكي الدلاعة واغسلنا حارة هندي واكدس اهو برود يشره على الفيراندا

– اما فيراندا ياخي نسيت انت الليلة نزول نادين بنت شافية جارت الطيب خويا والمارا مستدعيتنا وتحلف وتعاود نمشيوا ، ايا قوم حدد سوريتك وسروالك ما بين حضرت انا

– بالله شهزني للنزول جلوة وقدم قدم وتكسير راس اهو ولدك توة يهزك مشوار بالموبيلات وخليني هون انا

– مالا عاد ياخي اول مرة تعملهالي تبعثني وحدي كيف الهجالة؟ ورحمة بويا العزيز الغالي قريب نعيط فيها وووه ايا قوم ها الليلة خيرلك

– الله لا يعطينا ما يغلبنا ، انا قايم برة ابدى احضر اوكي سوريتي الساتان المنورة بالاصفر محددة من العرس الي فات وتوة نلبس سروالي الاخضر

– توة نندب والا نستنى حتى يتلمدوا ، تدخل معايا للجنان هكة تقول داخل معايا حبوبة والا محسن الرايس ، توة نحضرلك انا دبشك كيف راد عليا ربي وانا اهو ما لقيت ما نلبس دبشي الكل راوه عليا ، اسمع ما يهمنيش الليلة تتعدى ماهو نزول انا غدوة الحفلة هبطني الصباح نشري روبة بالوهرة كيف النساء

– يا خليل يا خليل هاكة متع الجيلاط بو عشرين نلف يخدم ماهو غدوة الليل، خلي نمشيولو والله شهيتني ناراه وتوة نهزوا امك معانا خير من العرس …