“حبالة”

– اسمع ما تخرجش الا ما تخليلي حق الطبيب ، صبحت مقلقة من الحبالة

– توة شهرين حبلة كل جمعة عند الطبيب غير تقول واك هات الفلوس ، برة للكاس بالكشي نخدم على الطبة انا

– امشيلو انت الكاس ، انا نقلو حبلة في حالة وهو يقلي كاس ، بعدلي ما هامك شي انت كيف الطبيب قلي ارتاح غير انا قلبي حي موش كيف النساء

– انا الي راد الله كل شي فهمتو الا حبالة توة ، ملي تعرس وخلق ربي يسمعوا اهي تعمل في تاست حبالة اهي ترد وتقشع والناس اطير في السو ، تكح كحة تقلك الطبيب قبل ما يهبط الضناء تخلي عليه طولو فلوس ، وزيد يعمللها شهر ويقلها لازمك الراحة على عين قفاك وما تعمل شي ، الحاصيلو ما يوصل ها الصغير الا ما يخرج من عينينا مال وصحة ابدان ومرج وعصب فوق الكل

– كملتشي من عسلك وكلامك الي يفرك اللحم ، مالا تحبوا تعرسوا وتجيبوا الصغار هكك وبرة

– لا حتى بنات توة وشقة انتم ، قبل وقت تعرس تحشم الطفلة تقابل بوها وخوها خلي كيف تحبل وجهها ما توريهش قدام بوها وعمومتها وخوالها ، ولا طبة ولا زمارة يجي شهرها تجيها القابلة للدار والله ينصر من صبح وفكر في الي بعدو يجيبوا بالثناش صغير وحسهم ما تسمعوس ، توة قدام بوها تتشلقح وخوها وعمها وخالها بعين أصح مناش …

– انت عاد ماك كل حبالة تعملي هكة وحفضناه ها الدرس ، نكمل ها الكرش وهذي خليلتي اعمل فيها الي تحب كان مازلت نحبلك ، خليلي الفلوس خير ما يفوتني موعد الطبيب صحيت ووقت نكمل توة نكلمك تهزني خير ما نشحطف في التاكسيات والكيران وهو ماشي يطلب عليا الراحة نعرفو انا ، وكان هذا تعدى جيبلي امي بحذانا مادام قلي يدك لراسك ما تهزهاش

– هاك عديت وحدك وعرفت دواك فاش قام خسارة الفلوس مالا ، جاتنا قي امك بحذانا يجبر ربي المهم قلها تخطاني وما تبداش ترمي في الكلام المرزي …