دوجة جابلها سيدك النوري، ذيل

– سعيد يا مجيدة شحالك اليوم

– يسال عليك الخير والله بايتة في غبينة نحرك راسي يوجعني ونقشع والدوخة عاملة فيا يشويها انا نهز راسي ونترهوج نقول نقعد على عين قفايا يوجعني برة نطبع صورديا على الارض يوجعني حتى سيدك قادر قام عملي هاكة الطابع الي يكشكش في غير جاهك وشيْ للصباح عينيا في السما يا لندرى شكان بيا

– يشويك يا مجيدة تطلعشي تتوحم هههههههه تمشيشي تعملها وتنفس مع كنتك

– بالله يزي عليا قلبك يلعب ع الزيت انت يا دوجة وقت حبالة هو توة , ايا قلي عاد وينك في شقان الريق اليوم ستنيتك وجات عيشوشة سالت عليك جابت فاضل محمص وانا عندي فم كسكسي جمرناه وجابت حشيشة حمراء تشره متاع ليبيا جاء كاس تاي يشره

– ماهو كنت جاية قام سيدك النوري جابلي ذيل حشاك وقلي شاهيه باللوبية رصاتلي نلمد في كعبات دربالة وحطبات ونشوشط كيف راد عليا ربي وخرجت لعمك سعيد الحوانتي نشري اللوبية قلي ما عندوش. يشويه حانوتو ديما فارغ. عاد قلت نجي نلقاشي عندك لوبية خلي نفخها قبل ما يجي سيدك النوري والله ما يلقاش الفطور ماك تعرفو يشوم عليا النهار

– ايجا معايا للتقسيط نعطيك نتذكر عندي طسطة ربع صع فيها اللوبية اما الذيل يهبل بالملفوف خلي قديمات اعملهم ملفوف

– اما نحي طريف وهاكي الشرذمة الي عندي شنعمللهم شرى الذيل وتعدى لمحسن والطاهر وقلهم جيبوا الصغار وايجاوا للفطور , مالا هاكة الكناين قالوا نجيوا ونعملوا معاها حاجة ؟ في الريح يفقد عينهم يجيوا عازب زلال الباهية فيهم تغسل الباقية متاعها بعد الفطور , الخطرة الي فاتت محسن حضر الميدة والصينية والطاهر يعبي في مشرب الماء من الماجل وهوما كل وحدة شادة عبودها في يدها تقول ما جابوا الصغار كان هوما وكمل نفيسة مرت محسن طرحت ولدها فوق الجلد وبلاش مشمع وبال في الجلد مالا قامت قرضتو ؟ في الريح خرجتو لوسط الدار وخلاتو , بالله يزي عليا وبرة وزيد سيدك النوري يدور دورة ويجيبهملي ما حبني في خليقتهم

– انا كنت كيفك ناكلها في ضعدي ونسكت اما توة وليت نكلمهم الكناين يصفاوا يركبنيشي الفالج في جرتهم زادة يهلكهم تقول قاريين فرد مدب ويعطيك ربي تقول يعملوا بالعاني يمشيوا لامهم البلاء الازرق يعملوه

– حقة عيشوشة شحالها ما قتليش انت عاد

– كلينا الفم وقامت ما حكيناش قالت هابطة تخلطشي على النصبة الي في سيدي بالحسن متاع البوسطوات وتشري مرقة وتطلع تعدلها ابنها بالموبيلات حطت سفساريها وخرجت والله تقول عقلها خف عيشوشة بشية تشويها الشلوفة في الفم والرمال فوق العين والدندونة وهي كيف خنفوسة النساء

– شكادها وخيتي راجلها هكة هكة بها تقول شعندو واولادها يدللوا كل واحد بموبيلات وين تنوى وين تبات ابكي على همي وهمك يا بوك تكلم ولدك تقلو وصلني لمطراح تطلع هاكي العقرب متاعو تقلو ما عندها كان انت توصل اوكة خوك الاخر لين وليت ناكلها في ضعدي ونقعد

– يصفاوا انا نمشي في البوسطة وقت عندي مشية وما نكلم حد فيهم

– ايا خليني نمشي عاد نفخ اللوبية خير ما نتحلوا في الحديف ماك تعرفني وخيتك لا نحب نحكي ولا نجبد الناس كل شاة تتعلق من كرعها

– حتى انا كيفك وخيتي قليل وين نتكلم ونحكي الواحد يجعلوا يقد همو حتى فضيلة سمعت ولدها صب الحجر ماشي يبني بحفاها لا كلمتها ولا مشيتلها ربي يكمل عليه شدخلني وزيد هي ما قالتش تقول ماشي نحسدوهم اللطف

– وهي شقام عليها تبني لابنها بحفاها زعمة كتبولو الارف

– بلاش كتيبة قالوا وبعد توة يجرى فيهم بعد العمر الطويل وخيتي هاكم بيرهم بلاش قاع ما يقولوا شي يدبروا روسهم شدخلنا احنا

– ماهو وقت يكتب لازم يكتب لبنتو الي بانية قبلتهم وهوما ما يعطيوش للنسيب هاكم

– اهاه مالا لين يعطيوا للنسيب فقدة في عينو ياخف الطفلة ويزيدوه الدار

– قلت الحق وخيتي يدبروا روسهم شدخلنا احنا ايا برة يباركلك على اللوبية توة وقت يجيبلي النوري نرجعهالك

– او اللطف علينا شعندك ترجعلي على ها الطسطة ربع صع بالشفاء لوخيتي اما العقد خلي سي النوري ياكلهم مهمين راهم وتذكرني

– يعطيك يا مجيدة تقول تقرى في مخي هههههه كان حبيت مالا نعطيهم لمحسن تحب وهاكي مقصوفة القد مرتو معاه

– ينزلك منازل الصحة وخيتي

– ايا يباركلك وطل عليا عاد موش ديما انا نجي عيلة وحدة رانا

– لا توة نجيك ونحكيوا بالوهرة هافا حديف هب هب ما نحبوش انا