دوجة حايسة بعد العرس

– ايا الحمد لله هناك ربي يا دوجة , وفى العرس ووفى مرقو عاد وين البارح ووين اليوم الايام تطير حل عينيك وغمفهم يطيروا , ايا وين العرايس خلي نزغرد عليهم؟

– عيشك يا مجيدة , والله خرج من عينيا العرس , لا نحكم لا في يد لا في ساق خلاوا الدنيا حايسة مالا قالت وحدة نخلي وحدة من البنات تعاون دوجة يرا كبيدتهم ممروجة عاطين كان يعفصوا في البيوت هافي تريڨل في روبتها وهافي تحب تغسل راسها حتى الميحاف بالصف يشويهم وسيدك النوري يعبي بالكرتل بالكرتل من البير … ويزي عليا وبرة , اوكم العرايس قاموا عاد قبل الفطور بشوية وفطروا سخنتلهم فتيتة شمنكة من عشاء البارح وكسرت حويرة زلوز رميتهم في جيب الباشا وحمرت عاد ولبستلك الروبة الوردية الي هزيناهالها في الملاك خرجت تشره عليها حتى قصيرة شوية اما والله واتاتها يا مجيدة سويقاتها سماح الحق ولحستهم الغولة كانوا كحل ماهي سمرا اوكم بيافوا يا للا , واكم مشاوا عاد لدار بوها مستافنينهم بالعشاء غادي وقالت موش باطيين يحبوا يرقدوا نصهم ما رقدوش البارح ,

– بالله وين يرقدوا يا دوجة راهي ليلة سخونة البارح وشكون جاه النوم ليدك في العاهد الله بالشرشارة انا البارح , وكمونة وعتورة يتبادلوا على المطهرة يدوروا دورة ويشللوا لحيمتهم , المنجي بالسخانة ما قامش يصلي كلمو بوه يل منجي وعي يا توفيق وعي الي هافا يقلو خلي الصباح توة الدنيا سخونة , قلي عاد الباشا قالكشي حاجة وكيفاش خرج اليوم؟

– خرج يفحك من اجنابو الصباح وخرج السورية في يدو رماها في حجري وقلي يااا توحشت بيتي البارح , لا الباشا عزيز بات ليلة بعيد عليا وعلى بيتو تعمل مسيكن , هكك وخرجت هي قاتلو ايا شنو ما عجبتكش بيتك الجديدة , ادخل حاشتي بيك , رنب وفيناتو ودخل مشوار وينعم الله عليها شقاتلو والا شعملوا , وانا نصل فيها تقولشي يا امي دوجة نحركشي معاك حويجة والا تحفزشي هاكي الدويرة وترجع الامعنات للتقسيط , ابدا وليدك في العاهد الله كيف يبدالها عرف وقيد لا هزتو من القاعة يراها في بلاعة

– انا من ليلة النزول عرفتهم موش مرتبين يا دوجة انا دخلت للميحاف حتى دويقرة في الكرتل ما فمش اللطف بالسيف لقيت طسطة حديد في التريكنة , حتى لبستهم الحق مهبجة وشطيحهم فليح الي هافي تركز في سقيها ركزان والغبابر طالعة , اسمع يا دوجة ربيها على يديك الطفلة وعلمها وهرتك ورتابتك

– النزول يصفى في دارهم , اما نهار الحفلة انا شربت روحي كيف العفمة وقت جات العروسة , داخلين اعماها بطيون وقلنالهم جيبوا كان اللازم في اللازم , عرشهم الكل جاء اللطف بصغارهم بكبارهم حال هاكة الصغار لين يدعثروا تحت السقين واهم طلعوا اهم هبطوا للمدار وغير يراوا طبق الحلو خرج والا كاجو القازوز يهبطوا عليه كيف المقحوطين اللطف , ويا مارا كل شي يتعدى الا خالتها عفاسة الي جاتنا كيف وجه النتش وايا نندبوا ايا نندبوا شقلي وشقتلك ما بعفنالهمش بزايد كراهب يجيبوهم للصالة , بالله قلي يا مجيدة منين الكراهب والباشا مسيكن منين عندو , اوكة كريهبت خالو محسن وكميونة عرفو وكميونة سعيد الحوانتي فيبالنا خيرات , احنا وين قالونا ماشي يجيبوا هاكة الجيش وهاكة الخاطر يرا عقلهم يتناطر وسقيهم تحت السواطر ما اقل همتهم اع عليهم , اوكة عاد ترصوا في الكراهب جرتهم , وعمك سعيد عبى الكميونة بالبنات قلهم خليوا البنات عندي فرشلهم كليم التالي وركب عبيشة بنتي ماهي مشات مع العروس وكنينتك كمونة جنبو وجات عفاسة وقاتلو ايجا لهون انا نركب كان القدام وركب هافم التالي يارا ايامها التالي وحرفها ميالي , ويا للا قامتلها كمونة يرحم امها فيما جابت وقالتلها يا تمشي التالي يا برة خوف الكار حتى عبيشة قاتلي ياا والله بردتلي على قلبي رتيبة , وقعدوا شني شنك وتعطلوا هاكة علاش جاوا موخر , وفي التالي حزها سعيد يباركلو قلهم ترصوا الفلافة القدام حتى كان عرفنا بوليس نقولوا عرس وربي يستر , تحلف عبيشة قاتلي ترصينا حتى وركها فوق ساق سعيد مسيكن قريب تجي في حجرو ورغم هكك قلهم نعملوا دورة ونزمروا في البلاد قبل الصالة مسيكن , وحلفلها يرجعها كان هو بعد الصالة باش تستك علينا , هاكة علاش هي ما كملتش العرس قلها حانوتي مسكر كانك خارجة برة نوصلك ولات وخرجت ورتحنا من خليقتها ,

– حتى انتم يا دوجة , قلنالكم عرسوا في الجنان لين الصالة في النهار والخسارة , راهم جاوا حتى على سقيهم شبيناتنا ياخي فلافة جنة يشقوهم والكعباشات موجودة غير بس راسك كبير

– وانا ياخفوا بكلامي اللطف؟ قتلو الباشا ابني ها الحديف , قلي دار العروسة يحبوا صالة بوزيد خاتر امها عرست فيها وفي سبرهم اعراسهم الكل غادي ومولى الصالة يساعدهم في السوم يرا عفمهم كوم , وبيناتنا والله اقل هرجة يا مجيدة , بالله كان جاوني لهوني وسيدك النوري تعرفو مروبش وما يحبش على حاجتو , يقعدشي يتعارك اعماهم زادة , وليدك في العاهد الله فكني الباشا يفكو من شبايك البلاء

– يالا اوكة ما دام شي ربي يهنيهم الحمد لله تعدى عرس يشره ولا عرك لا مشاكل حتى عفاسة الي تخوف الدنيا قصات ومشات ,

– لا كل شي في الغاية الا وقت قريب نكملوا وامها بدات تنادي في جماعتها ايحاوا تصوروا مع العروسة , برة كليناها وستكنا يصفى مع الباشا غمز المصور قلو مشي هاكة الكلاش والا الصاش والا شسمو يعني زعمة زعمة وبرة , ويا للا طلعت جارتهم ما ناداوهاش تتصور نساوها والا شخفتهم وقالتلهم جايبيني باش تفحكوا عليا الناس محسوب العروسة بنتي وما نتصورش اعماها , ولاوشي يقرقوا بها ورجعوها من باب الصالة بسفساريها وبعد ما تصورت قالتلهم نعاود التصويرة نسيت ما نحيتش السفساري وانا وخيتك نقيم في عين ونحط في عين وعبيشة ترص فيا تقلي يااا شعندنا فيهم وهني على الباشا الراجل وحهو يتلون لون بعد لون , وليت خليتهم ودخلت لبيت الحلو وجاب ربي دخلت نلقى جماعة العوادة يعبيوا في الي جايب حكيكة اعماه والي في قفيفتو , حليت هاكة القصيدرات نلقاه صبعي ونقبة البندير كل قصدرية فيها صفة والا افنين خلطت عليهم ولاوا حشموا وخرجوا باش حفزت هاكة الكعيبات قلت نخليهم للسبوع ,

– ايه والعرايس توة وين ماشين والا كادسين هوني وبرة ؟

– لا ماهو الباشا عرفو عندو بريركة في الشقاف يباركلو عطاه المفاتح وقلو عدي فيها ايامات بعد العرس اوكة غدوة الصباح يمشيوا وانا قلت نمشيشي اعماهم نشقشق لحيمتي ونملحها بعد هاكة الجهاد , كانك من الباشا قلي امشي ياا وكانك منها ما قالت شي اما تصفى انا ماشية مع ابني

– ان شاء الله يتم هكة الباشا موش كيف هاكة الاولاد الي عندي يعطي لنساهم غداد عاملين الي ندك تحتي خير من امي واختي , قد ما مشاوا وجاوا لا نهار ياا تمشيشي والا نهزكشي ونعرف انا اولادي يشرهوا اما لا محكوم في خير , حال يسلموا منهم ومن تطويل خليقتهم عليهم , اوكم يبيعوا البلاء بصدقة وبرة يفلقلهم الصرة هاكة البنات ومصرانهم على برة

– توة يعرفوا قيمتنا يا مجيدة يعطيهم تمسيدة والا حتى تغدغيدة , بالله انا وياك وين يلقاوا كيفنا ؟ لا ندخلوا فيهم ويفيمنا ساكت ولا نتلهاوا بحد ولا نحكيوا بحد , يخسروا هوما – يصفاوا وينفاوا , ايا خلي نمشي انا وتوة نرجعلك العشية نعملشي اعماك دورة في الدار ونحكيوا بالوهرة انا الجديف متع هب هب ما نجموش راهو