دوجة فرغت عليها الدار

– نهارك سعيد , والله شميسة تشره صبحت ولقيت باب حوشك مشتح قلت ايا نطل على هاكي المرا ونلقاشي عندها حجيرة وشق قلت نبخر بيتي بعدلي سيدك النوري ولى يبات كان في الوسطية وانا نبات كيف الغريبة وحدي تقول هجالة اللطف علينا , ما نعرفش على اخفتو شبيه قهرني ونهرني هاكة الراجل

– بالله استك عليا بخرت قبلك وما خليت ما عملت وشي سيدك قادر تقول ما عندوش مرا , الرجال لندرا شسمعوا علينا , يصفاوا يخسروا هوما احنا كيف النويورات وهوما على كيفهم

– عاد شلخفة يا مجيدة , فعلى عزاه وخلاه انا قلت نبخر ونارا والله نقلق في الدار بعدلي مهيرية مشات مع دارهم للحامة هي ومحسن ابني والدار فرغت علينا

– عاد مشيت معاهم يا دوجة تشره الحامة وتدلك عفيماتك غادي وتشقشق لحيمتك في الجابية

– نمشي معاهم ؟ برة يمشيها لاجية مهيرية قهرتني ونهرتني , انا والله شرهت الحق وقلت لمحسن حتى سيدك النوري قلي امشي , استنيت هي تقلي لقيتها ساتكة ومحسن يبلع في ريقو لين قلت الكلمة وحدي ويا كلمة الشوم , لابعد احنا ماشين مع خالي وبناتو وامي قالت ما نكفروش الناس وزيد كراوا بيت صغيرة يتحشاوا فيها الكل وجابت المخبل في كبة يعطيها فربة ان شاء الله , وليت وكليت البخصة وبلعتها واوكم غادي هوما توة وانا نبوم في هاكي الدار مع سيدك النوري وحدنا

– هافي عملت كيف رتيبة كمونة يعطيهالها تحت الكرومة , هزت التوفيق في الصيف ومشاوا باتوا ليلتين في سيدي منصور وتحرم تقول امشي معانا وانا نقيم في عين ونحط في عين ونصل فيهم , كانك من التوفيق ابني حشم وقلي يااا برة نهزوك معانا وهي تلافاتو اللطف قاتلو ياخي ما فيبالكش معانا اختي وراجلها وماشي نهزوا امي والڨيطون صغير وزيد نعرف امي مجيدة ما تحبش البحر وما تحبش تعوم ويمرفها البحر خليها في دويرتها خير , شفتشي رجعتني نمرف في البحر يعطيها مرف يهزها , انا ما نقلق حد ماك تعرفني وشكان عليه كان هزوني نقعد كويدسة ورات العين طاب الخاطر اما يصفاوا وينفاوا مازالت البركة في عبيشة بنتي وراجلها فهب معير هاكة الراجل جاوا وهزوني وعدينا ليلة في البحر والله حتى الصغار قالوا رينا صغار خالي محسن قلتلهم غير تقولولهم احنا هون خير ما تجيني لا حاشتي بها ولا بخليقتها , تسخايب ما تهزنيش هي انا غريبة قوم محسوب , والله ليلة تشره عديناها حتى سالت عبيشة علاش ما جابتش حماتها غمزتني قدام راجلها وهو قام وهي قاتلي هو حب يجيب امو وانا ما حبيتش فك عليا منها انا جاية نبرد في خليقتي منها , وبيناتنا عندها الحق المرا تحب تتفرهد هي ورويجلها وصغيراتها وحدهم فاش قام حماتها تتكرعد وراهم

– ليدك في العاهد الله انا وياك لا نسواوها يا مجيدة وشيطنا بالعقالة يرحم امها حميدة قريعية ما تتحرك الكميونة لاي مطراح الا وما تكون هي منبرة القدام ما تخلي وين تمشي معاهم وكلب جيفة على رقبتهم مالا لين جبنا الاولاد احنا؟

– لا عاد قريعية كناينها يشرهو الجق الفم الساكت والرب المتجلي وهكة هكة بها , سعود وخيتي كناين بالوهرة والكار , رباعية لا يزي كيف السرولة والقشرة البيفة الحمراء وزيد حسها ما يتسمعش وهي يا امي حميدة يا امي حميدة , وجموسية تهبل تطعم الكلاب في يديها كان هبطت للبلاد لازم تطلعلها حويجة اهي دبيبسة افاح اهي محيرمة اهو خليعات وقليصنات , ما تغرف باقية صغارها الا ما تغرف لحماتها والباي السمح ليلها , لا يشرهوا كنيناتها الحق موش كيف الي عندنا اللطف تقول قتلنالهم بوهم واحنا ما عمرنا غيرناهم في كلمة , وحتى اولادنا مشومين ما عرفوش كيفاش ياخفوهم عماوا وصماوا في جرتهم

– حقة يا مجيدة مشيتشي تعزي في راجل مصمودية؟

– يا لطيف وقتاش مات هو والله لا سمعت

– ماهو مسيكن من وقت طاح من السدة وجاء على راسو وهو يعالج وتعب وجرا فيه والله مصمودية كلاتو صافي في جرتو لين اوكة عرف مطراحو وربي يرحمو انا قلت نمشي للخميس وبرة

– بالله شطلعو للسدة وهو عرقين يتحركو لو موش عقل متاع واحد خرف , انا ملي نعرفوا وهو كبير ويرعش بركايبو

– لا بعد كاغف الجنان مخبيه في الربعة وحاططها في السدة , جرتو حبشي يمد الكاغف ويكتب الجنان اوكي جات بعمرو اللطف , الله يرحمو بلي كان حافق والملح ما يخرجش من يديه اما لا يفر لا يافي الحق توة سنين ما سمعنا عليه شي واولادو يشرهو الحق راهم كل شي بالوهرة عملوه يا عشاء ليلة الي مات وحمامر منصوبة يا كريسيات السطر للسطر في اجنابي الحوش ومصروف ووهرة وكار كان قاملهم يشنعهم ويرجع يموت يقلهم لين الخساير بعدلي وهوما دايرين بيه وهو يموت قلهم اسمعوا كان مت ما تغسلونيش امس برك غسلت راسي ونظيف قاعد

– ايا تعدالي في الخميس عاد خير ما تقشرلي وجهي مصمودية ونقولوا الكلمة ونجيوا ما نقعدوش هاكم هيموشهم ياسر وعرشهم كبير ولاندرا شعاملين في هاكة البرج

– كهو وخيتي عفم الله مصيبة الموت هاكي موش فايقة توة العزاية حتى تفرغ عليها الدار بعد الخميس

– محسوب مصمودية هي الي تكدس بلاش راجل وراس عزازتك تذكرني عام اخر الا ما تعرس هي ملي هو حي وما يقدرش وهي تشريق خلي الشايب مات توة

– ما اصح عينيهم اللطف كيفها كيف فريخية انا والله بعد العمر الطويل لسيدك النوري لا رجال لا حبال كونشي عاد طيحة فاوحة هكك ينعم الله

– اهاه طيحة فاوحة على زينك البديع والا الهناشر الي عندك , برة خبي تقيلعة وكمل بيع فرداتك وحج قلو تعرس يراك تتهرس يا دوجة

– اهاه محسوب انت ما تعملهاش يا مجيدة

– عاد انا شجابني ليلك اصغر منك بفلافة سنين راني يحقلي

– ايا اقلب علينا ها الصحن وقلي نمشيوشي للحامة مع بعفنا بونتو في هاكي مكبوبة السعد حتى الدار فمة صاحب سيد النوري عندو دار في الحامة معرف عليه مية يمين باش نمشيوا وهو نعرفو بيك انت وسيدي قادر والله يشره ويمشي

– شخص وخيتي والله مافابيا نشقشق لحيمتي وندلك ركيباتي وقالولي تتمد على فهرك بجنب الجابية السخونة بركة سيدي بلبابة نحفر وتتنحى وجيعة الفهر راني نعاني بفهرلي كل شي بالمطبسة وليت نعملو يا دوجة

– كهو مالا توة سيدك النوري يكلم سيدي قادر ونمشيوا والله حتى من غدوة خلي نخلط عليهم غادي ونوريها دينت الكلب