دوجة في عرس صغار اختها

ياسين الرباعي:

– ايا الحمد لله هناكم ربي صغار نادرة اختك يا دوجة ، وليدك في العاهد قد ما تمحمصت نجي حتى تركوزة للنزول وما كتبش ، لا بعد هاكة الاولاد قالولي انت كبيرة و مكرونا والا كسرونا والا شسمها تدور في لبلاد وتمشيشي تلقطنا حاجة وتبيلكنا اعماك ، راوني انا في تركوزة العرس ماراوش نساهم الي ما فوتوا حتى خرجة يخرج بزهم الي هافي من العشية للعشية تحمر وتزين وتفحج على الموبيلات وراء راجلها ويا من عاش لاخر الليل ناراوا خليقتهم

– يهنيك يا مجيدة ، حتى هو ما جاش برشة خاطر الناس خايفين اللطف ، حال بالله منين الخوف جانا البجباج والقمل والعمش وخرجنا وعرسنا ولاباس غير بس الدنيا قلبوها يقلب عروشتهم

– ايه وكيفاش عملت نادرة مسيكنة زوز بنتها وولدها فرد مريغة عرستلهم الله منها شجارا فيها

– استك عليا استك عليا يا مجيدة ، من تحضير دار الطفل لهزان دبش الطفلة لوصف العروسة لوصف بنتها وكلاتو صافي مسيكنة ، وهاكة الراجل متاعها ماهو كيف ساق البهيم الخامسة لا يبل لا يعل وكنتها تتوحم مشلڨَحة على عين قفاها عند امها ، كرهونا في الحبالة بنات توة ملي تحبل وهوما عند الطبيب وخسارة الفلوس والراحة وكبان سعدهم ، ياما علينا كيفاش جبناهم ورحمة بويا العزيز الغالي انا التوفيق ابني ما فقت بروحي حبلة الا ما جاني الوجع بالولادة يعطيهم غدادة

– بالله استك عليا ما تفكرنيش في المغابن الي عندي ، شعندنا فيهم يصفاوا ، قلي عاد العروسة كيفاش وراجل بنتها يشرهشي على الاقل؟

– وخيتي كانك من الطفلة طيحة تشره الحق ، يدها لراسها ما يخليهاش تهزها ، يا عشاوات البرة يا سهريات على الفيراندا كل ليلة وكل دخلة وخرجة يحيبلها اهو قرطاس لوبان اهو قرطاس سواك اهي دبيبسة افاح ومن عند بن حليمة و من الباهي زادة ، وقاتلك يد بيد اعماها في الماعون والحركة … الحق يشره هاكة الراجل وهكة هكة بها ، وكانك من ولدها مسيكن جاتو حوامة المارا تحب كان الماكلة البرة وبعد ما كان يدو لراسو ما يهزهاش ولالك يا للا يحرك ويقضي ويزي عليا وبرة هاكي نادرة تغرد وتجيب شكون يغرد اعماها على ولدها ، انا قلتلها الطفل موش سايب راهو لازم موكلينو حاجة بعد الي في سبرهم الشي امها هكك زادة

– يا ناري على نادرة وين كانلها هافا وزيد عاد ساكنة فوقها شماشي يجرا فيها – اوكم في النيخي مع هاكة الشايب ، ماهم فرد منڨَالة فو وماء ، وهي كل نهار غسيل الراس وهاكة المشوي الشيشوار ينوعر وهاكة الشايب اللوطة يسرج ويعس على المناڨَل ، عاد من حينك قلو دخل فوك وماك وحدك هافا خلى ديار راهو وقص عليه المناڨَل وهبطت هي يا للا وعملت صابونية وحالتهم ناتنة كادسين وحتى تارا وين ترصي

– قلتلها ما تخليش ولدك بحفاك مانا مليعين يا دوجة من المغابن الي عندنا ، ماهو ولد ذويبة هكك بناء فوق امو وجارا فيهم وفي الاخر خرج وكراها الدار وجاهم كاري مسخ اللطف ومتع هيبر وهبج وقاعدة تاكل في خـ…اها باللقمة مسيكنة ذويبة

– لا عاد هاكي سقيلها وحدها وطلع فيها فعلها ماهي مشومة ياخي عملت شوية في حماتها وسلايفها الفوم الاخضر عصرتهولهم في عينيهم ، بيناتنا الحديف والله حموها مات موش راضي عليها وعطاهم قلة السماح لو يدخلوها عليه ، كهو متع الدنيا يطلع في الدنيا ، هي حتى في العرس قالتلنا اخر ناس تقول ماشي نعملولها العار يراها في النار ، ايا اقلب عليا تعرفني لحمي يولي يرعش وقت تجبدلي على ذويبة

– يصفى غير الحديف جبد بعفو تعرفني ما نحب نجبد حد انا الواحد يجعلو يقد همو ايا اكدس وانت واقفة اللطف علينا توة نجيب المريغة ونعمر كاس تاي

– ناقصني كان التاي حتى انا ، خلي نمشي اوكة جابلي ذيل قلت للبنات يشوشطوه مابين جيتك يشوشط لحيمتهم بعدلي كل وحدة ترميه للاخرى وانا نحارص فيهم يحشموشي لين قالولي برة يا امي مجيدة توة يجيوا الاولاد ونعملوه مع بعيفاتنا ، توة نعدي عليك جية بالوهرة هافا حديف هب هب تعرفني ما نحبوش انا