راجل و سيد الرجال
“سوري”
-ايا العشاء وتعشيناه شتعدي غدوة يا طفل؟
– لا ما عندنا شي غدوة كان فرانساي وما فيها ما نحفظ ونراجع وانفورماتيك هاكة يعطينا على الفهم وبرة
– كيف ما فيها ما تحفظ، لين يقريوكم فيها يا ابن الكلب ؟ قوم من قدامي جيب كراستك وايجا
– اسمع انت عندك العصب وموش هكك تقرية الصغار وسع بالك شلعزة والا سيبو نكمل الماعون ونجيه
– انت قلي هكة وبعد ابدى ڨرڨر اني ما نعاون في شي حتى قراية الصغار ، ايا اوكة ولدك قدامك واخطاوني الزوز
– ايجا هنا يا طفل وانت رقيقص كيف بوك ، شنو المحور متاعكم في الفرانساي ؟
– اوكة نحكيوا على العايلة بالسوري وكيفاش رئيس العائلة يحكم وكلمتو هي الي تمشي ، اما بالسوري راهو يااا
– يكب سعدهم شكبولها سعدها القراية ، توة هذا محور يخليوه ! شعندنا فيه ايا قلي كان جاك الموضوع هذا شتكب؟
– ساهل ماهل ياااا ماهو نحكي شنو صاير في دارنا اما بالسوري وبرة
– ناري على الطفل ماشي ياخذ صفر ، احكي عكس الي في دارنا يكب سعدك من طفل وانا بلي نقري وريقي شايح وانت عقلك ندرا وين …