شفتوه مازال يتعنتر !

الجاهل والغبي والفرعوني وحده من يواصل التعنتر حتى وهو ذليل .. التاس حكمت لفائدة الشابة ..فرعون كرة القدم التونسية اللي كان طوال فترته يهددنا بالفيفا يعمل هكة ويصدر بيان فيه استغراب واستنكار من قرار التاس ..

هذا دليل على انو حتى في المعارك ما يعرفش يتكتك ..تي خالد ابن الوليد الذي خاض 100 معركة وانتصر فيها كلّها … خالد بن الوليد وما ادراك ادرك في معركة ما انّ القوى مع عدوّه غير متكافئة فامر جنوده بالانسحاب _ وهذا يسمّى بالانسحاب التكتيكي _ وعاد بعد ذلك ليكبّد العدّو اشدّ الهزائم .. تي اتعلّم شويّة فنون التكتيك مع خصومك ها وديع … اما زايد اللي راسو كاسح يقعد ديمة كاسح ..ثمّ يوخّر ويقدّم ويعيّن الشابة في المجموعة الاولى ويقترح دورة ترشيحية بين حمام الانف وجرجيس والمتلوّي ….

يخخي الفرق عندك روس بصل كلّ راس تغرسو وين ما تحبّ ؟؟ يخخي الخارطة الكروية هي الجنينة متاعك ؟؟ ايّة سيدي شدّ عندك توّة ..المكشّر مرة اخرى اكّد انو سيد الرجال وكشّر عن انيابو وقلك اممهأه .. وزاد رجع للتاس شاكي بيك ..والمتلوي زادة قالتلك اممهأه ورفضت المقترح متاعك …

موش قلتلك امس (بتحطّ نفسك في اماكن بااااايخة) ..لولا كسوحية راسو موش كان ينجم مثلا يوخّر البطولة لما بعد كاس العالم ويعاود تنظيم هالخبّيلة مع رؤساء الاندية ويعاود القرعة وهكة الاندية تعاود تنظم صفوفها وانتداباتها بشكل عادل وتكونلك فرصة يا وديع باش تعمل تربّص في العدالة والديموقراطية مع الجميع ؟؟…

هو ثمة حلّ اخر وهو الاسلم والذي سيكون بداية انفراج للكرة التونسية وهذا يلزمو فقط راجل ..الحلّ الاسلم هو الاستقالة ..استقالة الوديع وحاشيته .. نعرف روحي رومانسي في مثل هذا الطرح ..اما صدقا وبكلّ المقدسات بما في ذلك قدسيّة مصلحة الوطن استقالتك هي الدواء لهذا الوضع المقزّز والمخزّز والمنرفز للكرة في تونس

30 سبتمبر 2022