صغار رتيبة حيّروا الجنان …

ياسين الرباعي:

_ يا دوجة يراك ممروجة توة هكة صغار ابنك يعفصوا في الجنان بعد ما سيدك قادر ريقوا لاث باش كمل الميالي يرا ايامهم التالي صغار محسن ومهيرية وحرثهم ميالي ، علاش هكة علاش ؟ انا قلت نجيك قبل ما نمشيلها هي يعطيها كية في هاكي التربية متاع صغارها

_ ايا يا مجيدة حدك حد المسقي ، فاش قام تدعي على الصغار ، امهم تصفى وتنفى منك ليلها اما صغار ابني ما نحبش فيهم الحق ، هوما دويفيات راهم غيرشي بس يتبعوا في صغار رتيبة كمونة وصغار عتورة يراها منشورة ، بلاوات صغاركم والكلام بيناتنا ديما ياكلوا في الطرايح من عند بوهم يقلهم ما تلعبوش مع صغار التوفيق والمنجي

_ التوفيق والمنجي ؟ هز عينو لغاد هو محسن ؟ علاش بالكشي هو خير والا هو خير ، عجبتو عينو العورة والا بلوزتو الي بزقة بلعقة ، بالله استك عليا انا ما نحبش الحديف الي يفرك اللحم ،

_ ايا لميتشي عليا عسلك تراه ياخي ما تعرفش باش عينو عورة محسن موش بوه سيدو افقدهالو باش ما يعديش العسكر ومنع منو طلعت ساقو مطروحة ما منعش من عينو ، ودبيشاتو ماهو بالخدمة مسيكن يجي طماطم في الليل موخر وكان نغسلوهم الصباح ما يلقى ما يلبس اوكة يعدي بيهم الجمعة ونهار الافنين يتحطوا في الجفنة ، اع عليك وليت تعاير فيا يا مجيدة ، وانا ساكتة عليك توة دهور حتى امعيناتي في دارك الباقية الي تمشي تموت على النفاس منهم بلاطة حديد لقيتها في قفص الدجاج متاعكم عوف تجيبوها وغميت دايا وسكت ، والله كان قلت عليها لسيدك النوري حال هاكي الي بيناتنا

_ بلاطة مدڨشة من كل شيرة عاملة عليها هكة ؟ توة نجيبلك بلاطة وما تحطهاش في قلبك ، واهو نقلك يا تشد عليا صغار ابنك يا الي في راسي نعملو ، مسيبينهم علينا في الزنقة يعطيهم خنقة

_ باهي لعينتشي الشيطان توة يا مجيدة وفك علينا منهم توة وقت يجي سيدك النوري يعمللكم سطرين بالمحراف في الجنان المهم استك عليا وانت شنعتنا يعطيها شنعة امهم تمشي تخدم في الطريزة عينيها عماوا ومسيبتهملي بالله شنعمللهم نقعدشي في جرتهم

_ وهي من عامتاش تعرف تطرز مهيرية اللطف ، عاد غمزت كولوناتها الي نصلو من كل مطراح سد عليها موش ماشية تطرز عند العباد ، هي تطرز غاد وصغارها يطرزوا هوني يزي عليا ، انا ما نحبش نجيك راهو يا دوجة على خاطر تفريك اللحم هافا

_ قلنالها ها الخدمة لين خدمي ياخفها قالت لا البنات الكل تخدم توة ونلمد زوز فرنك تحت راسي وغلبت محسن وخدمت ، شمازلت نقول انا ، اهو كليتها في فعدي وبرة ونقالع في الصغار

_ يا ناري عليها ، هافي عملت كيف حلوانية بصت في عقلها ، قايمة بعد ما عرست لبناتها تخدم تقشر في الزلوز في الماكينة من الصباح لين تغرب الشمس باش تجي شقلي وشقتلك الدار فرغت وخير ملي قاعدة وحدي ، عوف تشمس فريشها وتحرك حريكتها قايمة تخدم يا عياه ويا هو

_ بالله سيبها المغبونة هاكي ما تحبش تقول وبرة ، ماهو راجل بنتها قلبو بارد طلع والخدمة قلهم لا انا لا هي وفنكت فيه هاكي الطفلة وشي القلب يجيبو ربي ، ويعطيك ربي حاكم عليها ما تخدمش هي زادة ، قامت حلوانية تخدم باش تعطي لبنتها مسيكنة شعنها هي شخشوخة الشايب يرحمو يجعلها تكفيها ماكلة وشراب وحدها ،

_ هي والله مازالت صغيرة تهجلت على بكري مسيكنة كان مشات خفات خيرلها هاكة ولد الزواري حفا في جرتها وللتوة قلي يا امي مجيدة ناخفها هات بس هي ترفى ، بسم الله عليه اوكة عمل قفة متاع ماعون وحدو وسطا يشره عندو رميان حجرة يفربوا بها المفل

_ توة بعد السيف تعلق منجل يا مجيدة ، بعد الشاذلي يرحمو الي شلاغمو يركز عليهم العصفور ونساء الحومة الكل كلاوه بعينيهم تقوم تاخف الزواري ؟ اسمع وخيتي ها الماخفة والمعطا ما تندخلش فيهم يدبروا روسهم كان عينها راهي خفات ، محسوب تندب بيه الراجل الي فمة راتو واوكي عايشة سلطانة زمانها بشخشوختها وبشهريتها ولا رجال لا حبال محسوب شعملنا بيهم رجالنا كان الجهاد في جرتهم ويجيوا مفركين اخر النهار شوف يخلطوا لصلاة العشاء شوف لا ويكباوا على بكري الي تزل منا وتدخل لبيتها ايجي صبعها ونقبة البندير تولي تتمغط وبرة وعوينتك ما تارا سو ، يزي عليا قلو رجال انا كرهتهم خلي ربي يشنقني

_ طلع هبط اسمو راجل في الدار يا دوجة ياخي ما راجل كان بالشي هاكة وانت ماشي تطير على ايامك ، باهي قلي توة وقتاش نمشيوا لعيشوشة لحيانية قلك كنتها زينب شريفية رمات والعزاية ما تشدش الصغار هذا في غير جاهك الصغير الفالف الي ترميه ، يا لندرا شنية غريبتها

_ الله منها وخيتي. والي حماتو لحيانية مازال يشد صغار والا حتى مسمار ، حكاكة فقوسة مرة هاكي لحيانية يعطيها تنحية ، ما خلات ما عاملة فيها تقول جايبة خديمة موش كنة وهي يدها لراسها ما تهزهاش الي عطاها على السواك واللوبان وطول النهار تبخر في بيتها وكنتها مسيكنة حتى وقت تحبل عوف تريحها تزيد عليها ، كيفاش تحبها تشد الصغار مسيكنة ،

_ والله عطاها ربي دار الخلاء تبيع اللفت بيتها وراجلها وهي ناصبة موش كيف همنا نفكروا في كل شي ، ريتها في عرس دار الهدار ليدك في العاهد الله هزها من الكرسي وجليها عروسة من كل شي ، هي تملى المحفل يشويها تعرف تلبس كلبة بن ستين وعندها الفوق ولحيمتها مواتيتها الي تلبسو يشرق عليها حتى شكارة خيش ، ومولى بيتها هكة هكة بها ، عاد خليها وخيتي يجي الدرك على شريفية تصفى يجي نهار وتحبل وتشد الفانا ما عندو وين هارب

_ توة نمشيولها مالا ما فيها باس وفرد مرة ناخفشي من عندها قفطانها نحفر بيه نزول فكرية بنت راضية نجاحة ، ماهي جاتها فرحة كونية وفي شهر خفات وماشي تعرس ، قلك مستعجل العروس يخدم في ليبيا لاباسنن عليه في خير خميرو ويحب يهزها معاه وهاكي نجاحة زرسة العقل طايرتلها بالفرحة بعد الي ما خلى ما جاب من ليبيا يا شكالط ويا حلوى ويا تاي اخفر واحمر يا سفساري الحرير من مطرقتو وزيد حلفلها قلها بعد العرس لازم تجينا لليبيا ونحوس بيك غادي وناخفلك الي تحب ، لا طيحة عزيزة جاتها هي وبنيتها

_ وانت بجدك تاخف قفطان لحيانية ؟ انت وين وهي وين ، طويلة عليك هي وكاملة وين يجيك القفطان وانت كيف قصير الضرطة ، اسمع كلامي امشي بروبتك الفاروزي سمحة عليك

_ منا لغاد يرحم الله حتى تارا نمشيشي كان محسن ما يوصلنيش شكون يهزني وهاكي العقرب والله ما تخليه يخرج بالليل

_ ايا خلي نمشي انا وما تنساش قول لسيدي النور يريڨل هاكة سطرين الميالي خير ما يجي سيدك قادر ويشوملي العشية يعطيهم تنحية ها الصغار