فضيلة وزوز عروسات في عرس

ياسين الرباعي:

ماهو عاد فضيلة عرست لولدها الباشا وبنتها عيشوشة فرد ليلة واحنا ما حضرناش خاطر اخت الماداما حلفت بالايمان ما تعفصهمش بعد ما المنجي ولد فضيلة سيبلها بنت سلفها وعود خذا وحدة اخرى والموجيرة قالت نقومشي نمشي ويعز بها عبيشة اختي.

ايا شعندنا فيه ، المهم قالت لازم نمشيوا لفضيلة نهنيوها في بنتها وولدها ، ومن حينك حطيتها ورايا على الموبيلات وشدينا الثنية ، ودوب ما درنا للزنقة الي التراب فيها للركبة والعجلة تكلمت ، الله منها مسكينة هازة هاكى النصف طرناطة فوق منها وقد ما قلتلها يا بنتي احفز روحك راك وليت كيف البابور وهي تصوم نهار وتعطيه على راسو شهر في شاهية ذيل في تلقالناشي دوارة … ، رصاتليشي نكركر في هاكي الموبيلات وهي زنقة كاملة تڨرڨر في كرهت ها الكركازة متاعك ، في وقتاش نوليوا كيف العباد وتاخذلنا كرهبة …

برة وصلنا لباب الحوش ودخلنا والحق فرحوا بنا وهاكة النوري راجلها قلي جابك ربي خلي نعملوا طرح ديمينو ، ايا قعدنا والحمد لله هناكم ربي وقامت فضيلة تخرج في حكك الحلو الي ما قعد فيهم كان الفتراش والكعبات 2ème choix وعبات الصحن والنوري يعبي في الماء من الماجل ويقطر في بيدون الروزاطة وهي تقول والله شي يحشم الحلو هزوه العرايس ومن الصالة دار مرت الباشا ابني هزوا الحكك الكل تقول مسبقين فيه راس مال غير العياه لشكون نخليوه وكليتها وسكت ، نقومشي نعمل العار في الصالة على حكة حلو يصفاوا وينفاوا هوما وياها ، تقوم عاد مريتي يباركلها تهدي النفوس وتقلها وهوما شقام عليهم يعملوا هكة ماهو حلوك والا داخلين طول للتلهميg ، اع عليهم انا كيفك والله ما نسكتلهم ، ايا يصفاوا كيف ما قلت انت واحكيلي عاد شعاملين العرايس

_ وخيتي شنقلك كانك من عيشوشة طيحة عزبزة جاتها هاكة الراجل هكة هكة بها ويدها لراسها ما تهزهاش ، يا عشاوات البرة ويا محواس وكل ليلة السهرية في دار والحق يعاونها في الحركة يد بيد هو وياها … الحق يشره هاكة الراجل ، وكانك من الباشا يامة عليه وليدي وبرة ، المارا طلعت حوامة وتحب ماكلة الشارع والسهريات من دار لدار وهو يكرعد بها كل ليلة ومنهم خطرة مشيت نطل على نيتي احنا فطرنا وهو قام يغسل في الماعون وخصني فتيتة لا جاتني جلطة نهارتها الي ولدي خذا مارا باش يحرك معاها ، خليني ساكتة وبرة وغصتي في قلبي

– بالله وسع بالك يا فضيلة ماهو بنيتك طيحتها باهية هاكي الفايدة وكانك على الباشا مادامو حابب يدبر راسو هو وياها

– لا واللي فاتك اغرب ، عيشوشة كل نهار العشية تجيني وتطل عليا ويا امي نعملكشي حاجة ، ومرت الباشا تحب هكك زادة كل عشية تمشي لامها ، بالله حال لين ماشية متوحشتها زعمة كان موش عياه تسيب فيه علينا ، راني قلبي دم على ابني …

…….

عاد انا وخيك نسمع في الهدرة ولحمي بدى يتفرك وخفت لا نتكلم نبلبزها وليت وتلفت للنوري وقتلو ايا وين الميدة ومعد الديمينو خلي نغسلوا مخنا بطرح