في سوق النخاسة الإعلامية …لا تلُم إلا نفسك !

اقرأ كلّ يوم جديد الجديد في ميركاتو الاذاعات وخاصّة الخاصّة ..وبكلّ نزاهة وشرف اتفهّم وبكثير من الهدوء ما يحدث من بيع وشراء وتنقلات لاعبي الساحة الاعلامية من فريق الى اخر ومن دكانة الى اخرى _وتلك هي قواعد اللعبة في ايّ ميركاتو رياضي .. سياسي .. اعلامي .. الخ ..تبدا تماما كذلك “الدلاّل” قديما في اسواقنا وهو يدلّل بنعجة جلدة على العظمة ..هو يبدأ بـ “باب الله” ..و “اشكون زاد” ..لتنتهي بـ “مبروك عليك” …

قلت اتقبّل بهدوء ما يحدث لاننا اعلاميا مع احترامي للنزر القليل القليل القليل، نحن في عصر النخاسة والخساسة والدناسة والنجاسة والبهناسة والوسواسة …وكلّ يبحث عن ليلاه اي بوزاه ..اليس هو عصر البوز ..والله يكون في عون البوّازين والبوّازات .. في المقابل اندهش من ردود الفعل المتشنجة لبعض ابطال الامس والمغضوب عليهم اليوم .. لهؤلاء فقط اقول .. اما كان عليكم ان تشمّوها قبل ما تقراص ..؟؟.. اش لزّكم تخلّيو ارواحكم للاهانة ؟؟ اذا قبلت باسلوب النخاسة الاعلامية ومهزلة الميركاتو فكيف تلوم النخاس واذنك بيده دامية وقدرك بالفلسين وهو مردود ..؟

اش لزّك حتى الدلّال يهزك ..؟.. انت قبلت بقواعد اللعبة بكلّ تفاصيلها ..انت تعلم وانا اعلم والكلّ يعلم اللي اليوم وقت حاجتهم بيك يصنعون لك تمثالا .. وغدا ودائما من اجل البوز وصانعي البوز وجلّهم اتفه من قشرة موز ..غدا تمشي في العفس وثمنك يصبح لا يساوي قشرة زلّوز … مرّة اخرى وكما تعلّمنا .. انا لا الوم الطغاة الذين يركبون على ظهور العبيد ..لانّ انحناء العبيد يسّر لهم مهمة الركوب ..

اذن اليوم وقد اخرجك الطغاة من اجندتهم فذاك يعني انهم كانوا امهر منك ..وانك كنت مغفّلا … والمغفّلون لا يحميهم القانون ولا ينفعهم التنغنيغ .. مرّة اخرى واخيرة ولهؤلاء النادبين حظوظهم على وجودهم خارج الدائرة الاعلامية ..ليكن ذلك درسا لكم حتى تتعلموا تجبدوا سفيركم وتجبدوا بيهم قبل ما يجبدوا بيكم …

اختم بهذا المثال الواقعي .. _ واحد من الاعلاميين ولا تسالوني مااسمه حبيبي لن اجيبكم لانه ببساطة ليس حبيبي هذا العفريت شمّها منذ اوّل يوم تعاقد في ميركاتو جديد مع اذاعة ما … اشترط ان يكون عقده لمدّة خمس سنوات .. معناها يلعب مرتاح حتى لو كان منتوجه لعب عيال .. البورة مكرية وكراها ثابت وهي تجيب والا لا جعلها جابت …هذا طلع مهفّ عليهم وتعشّى بيهم قبل ما يتسحّروا بيه ..

يبارك في ترابك يا تونس قداش تبوّز وتجيب …

3 سبتمبر 2022