شعريار
قُلْ أَعُوذُ
أحمد فؤاد نجم ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
قل أعوذ
ابن زوزو مد بوزو
الجبان ابن الجبانة
كال غدانا
قام لقانا
شعب طيب
كال عشانا!!
واد يعوم على كل موجة
والعوام يبقي ابن وز
ينزل اي سوق يهز
عالرقاب سكين تجز
وبالنفوذ فلوس تنز
الفلوس دي منين يا لولو؟
الفلوس من عند جدو
جدو كان بياع “بليلة”
لما كان يكسب ريال
تبقي ليلة بالف ليلة
قصدي جت من عند عمو
عمو كان نبّوت غفير
يعني كان خدام وزير
عيشتة كت بالحيلة نيلة
يبقي جت منين يالولو؟
ايوة جت من عند ماما
اصل ماما بنت عز
بس عز، كان مقشف
مايساويش اردبّ رز
يبقي جات منين يالولو
يبقي جات من التجارة
والتجارة في الادارة
والادارة في العبارة
والعبارة في الدوبارة
والدبارة من التجارة
والتجارة مش شطارة
انما حبة حظوظ
برضة جت منين يالولو
يبقي جت من عند بابا بالنفوذ
والنفوذ بيجيب فلوس
والفلوس تجيب نفوذ
والنفوذ يجيب غلاوة
والغلي جزمة عساكر
عالرقاب تضغط تدوس
والغلا قانون طوارئ
حاجة طابقة عالنفوس
اة يا مصر، لو تقولي
يبقي مين ابن التيوس؟