“مرمّة”

– ايا نبينا ونصليوا عليه ، ايجاني لهوني يا راجل ، توة في العطلة كنت طامعة نخرج نبرد خليقتي ياخي قايم حاللي مرمة وما ظهرلك تصلح الميحاض وترقع الندا متع الوسطية كان وقتها ، ايا الليلة احد قوم كان تخرج تعشينا البرة صغارك لا راوا لا سمعوا وانا فديت لا خرجة لا دخلة

– ايواه حتى انا قلت ماشي تخرجها من لحمي ها المرمة ، ياخي عملتها ليلي ماك طول النهار تقرقر على فيونس الميحاض والوسطية الي تسكسك عليك في التراب ، وزيد تقلي نخرجوا بالله منين وانت تعرف الي انا عامل كنابل عند المصرف ، قوم اقلي هاكم كعبات الكويكة واعملنا ترشي اوكة جبتلك السفنارية وانت الي عطاك على الحومة

– انا نحوم ؟؟؟ بالله اسكت اسكت برة شوف هشام راجل اختي منيرة شعامل ووين يهزهم والا حتى خوك طول النهار وهو سير سير مع مرتو من مطراح لمطراح وكمل جبتهملي ليلة راس العام رصاتلي محشية في الكوجينة نهار كامل ، شي والله لا يظهر فيك زايد خاطرني ساكتة وما نتكلمش ، وين ما نكلمك تجيب الكنابل والدين وورقة الضو وورقة الماء يعطيني عما خلي نرتاح منك ومن صغارك

– توة هاكم ما في جرتهم شي ربي يكمل عليهم يخرجوا وانا منين نجيبلك

– ماهو بزهري ، نسكت خير سعود موش تعرية زنود موش كان خذيت الطاهر ولد خلت امي راني في سبع خيرات نخلط اوكي مرتو كل مرة اهي معلقة مجارة على قلبها اهم فردات سلوك يديها من الطرف للطرف وزيد المحواس من بلاد لبلاد ، نتبع في راي بويا يرحمو بفعلو قلي ناخذك انت نسخايب الدنيا دنيا ، والله حفاوا رجال في جرتي غير مكتوب احرث ، ايا شعندنا فيه لا تقلي كويكة ولا ترشي ، قوم نخرجوا والله حتى كسكروت على البنكينة واكلتو المهم نخرج لا نقول فيها اوووه

– باهي تعرفشي كيفاش ، اوكي مزانة الهريسة الي جابتها امي واقلي كعبات بطاطا والكويكة واعملنا كسكروتات توة ناكلوهم البرة وندخلوا

– اما كويكة يعطيني تفريكة والله توة نلوحها على طول يدي ، وزيد هاكي هريسة امك عاد غير حشمت منها والا راني رميتها ، عباتها بالثوم وافاحها ناقص وموش حرة تقول معجون توة نعملك هريسة امي وشوف البنة

-باهي المهم قوم اعمل واخطاني ها الليلة نحب نتفرج في الاخبار ونشوف شنو صار في ها البلاد وشني اخرتها معاهم

– كهو انت ماني نعرفك الي عطاك على التلفزة ، اسمع توة نكدسوا هوني وبرة اخرج جيب طرف قلوب وكاكوية يعطيني تنحية في سعدي الراقد بعدلي ساعة جبنو وما فاقش بيا عاملة شعري وحواجبي ومكحلة عينيا ، لشكون تحرقس يا مرت الاعمى

– صحة والله ماشي نقلك غير تلهينا بالحديث وزيد نحس روحي تاعب الليلة وعندي الرعدة في لحمي كان ندخل نرقد ونسخن في فرشي خير …