نهار الاحد المبارك

اليوم نشوفوا جماعة عطية والعين شنو برنامجهم يقوموا الصباح على البرود يمشيوا لسوق الاحد الخضرة بلاش غادي ويبداوا يعبيوا ،

طبعا الخضرة والغلة ليه ليه وتلقى الراجل فرحان ماشي يروح وهي تقلوا بالله ناقف مشوار على متع الاماعن نلقاشي دوڨرات والا بانوات بانونا مشى ملي خذاتو رشيدة لغسيل الفرش جابتو مكسر يكسر يديها ، ايا هاكة الراجل يلعن الشيطان ويقلها ما تبطاش وبرة الشمس سخنت راهي ، تاقف شوية حكاية ساعة ساعة ونصف وتقلو ما لقيتش اما لقيت قمصان و6 كيسان يشرهو والله نستحقهم يجيناشي حد كدسنا نمدوا الماء في الدبوسة ،

ايا صحة يقلها كملتشي خلي نخرجوا ، وهوما خارجين والراجل يزنڨل في هاكة الفيلي الشمع والساشايات وهي تقلو بالله ناقف على البالة يظهروا قلاسط جدد في الكدس والله خير من متع السوق صغارك طول النهار قلاسطهم منقوبين من الصبع الكبير وزيد يستحقوهم للسبور ،

ايا ما تبطاش شوف فيسع يقلها ، تاقف تركوزة حكاية ساعة وربع هكك وتجي تقلو شوف ها البونتي جديد من مطرقتو لقيتو في الكدس بدينار غالي اما يصفى والله يشره وزدت خذيت ها الزوز تريكوات حتى للدار واحد ليلك والاخر لولدك وانتم تحكوا وتدكوا في هاكة التريكوات قداش من عام ،

ايا الي عملت مبروك كملتشي خلي نخرجوا؟ لا فيه البركة برة توة نخلطوشي على مرقة في البرج ،

ايا يشدوا الثنية للبرج وياخذوا المرقة فرشكة تشره ، ويرجعوا للدار ، يقلها ايا كمل قشر المرقة وقليها ما بين خرجت للمركز نعمل قهوة

_ بالله لين القهوة وخسارة الفلوس اكدس توة نطيبهالك هوني واخرج حوض هاكي الليمة وخرج الفرش يتشمس بالله قداش مني وانتم لا واحد يعاون اللطف ،

_ باهي توة كيف نجي نعملهم خلي نخرج توة

_ اخرج على البسكلة ما تهزليش الكرهبة ماشية لامي راهو نهزلها سبلة اميلة قريب تقول عليها نو مسكينة بالله شكون يجيبلها انا قريتلها حسابها في كعيبة

_ باهي فرد مرة هز لامي كعيبة كيف تمشي

_ لاه ياخي عندها كان انت ، اوكم خواتك ياخذولها كدسنا كان احنا نتفكروها ، تعرفني البلادة وتفريك اللحم ما نحبوش انا

_ موش لازم اوكم مفاتح الكرهبة وتوة نخليلك حق بيدون ايسونس تعدي للطيب البساكلي صب بيدون

_ انت وين نجي نهز الكرهبة تخليهالي كان ناشحة من الايسونس وتعطلني برة عبي انت وايجا وبعد عود اخرج للمركز

_ باهي بطلت موش خارج وين الفرش الي تحب تشمسوا خلي نخرج لليمة

_ خاطر ماشية لامي تعملي هكة ! ايا لمد عليا عسلك ها النهار وهني عليا نقشر الحوت وانت واخذلي شرذمة خاسر عليا نقشر عوض تجيب موسى وتجي معايا

_ ايا تعرفشي انا خارج للمركز وقشر وكول والا لوحها ما عيني في مرقة توة نشلوش عظمة انا والصغار …

…………

المرة الجاية نحكيوا على جماعة سوق الاثنين في قرمدة وسوق الخميس متع تنيور وطريق تونس …