هل مازال منتخب منذر الكبيّر … منتخب كل التونسيين ؟!

منذ سنتين و نصف و الدعوات للمنتخب تتمّ حسب الأهواء: بعضهم لإرضاء المحللين.. و بعضهم لإرضاء السماسرة و مديري الأعمال.. و بعضهم لكسب ودّ جماهير الفرق الكبرى.. و غالباً ما كانت أغلبية المذكورين أعلاه راضين على الاختيارات في قائمتها الأولى رغم بعض التململ في المباريات الرسمية..

و حتى لا يكون كلامنا حديثا فلاحيا: خلّينا نسمّوا الأشياء بمسمياتها.. زعمة فخر الدين بن يوسف مازال عندو بلاصة في المنتخب..!! زعمة حمزة المثلوثي الاحتياطي في الزمالك يستحق دعوة للمنتخب..!! زعمة فاروق بن مصطفى احتياطي بن شريفية: هو أولى بالمنتخب من الحارس الأول بالترجي..!! و زعمة معز حسن بعد خطئه في مباراة النهائي يطرد نهائيا من قائمة المنتخب..!!

تِي ماهو على الأقل يوخّر ليصبح الحارس الثاني و إلا الثالث ولا حتى الرابع.. مُوش يخرج من القائمة نهائيا.. لإرضاء جمهور النجم بدعوة علي الجمل و جمهور النادي الصفاقسي بدعوة أيمن دحمان..!! ثم بالله لنفترض أن معز حسن صار خارج اهتمامات الناخب الوطني: علاش تمت دعوة الجمل و دحمان بالذات..!! خاطر المؤكد أن المنذر الكبيّر ماشافش الجمل و دحمان بعد الكأس العربية.. معناها كيفاش اقتنع بيهم و بمردودهم..!!

خاصة اللي الجمل كان ممتازا جداً جداً مع الملعب التونسي و سي منذر ماشافوش.. و دحمان عندو مدة غايب على الميادين و مازال ماسترجعش مستواه المعتاد.. طبعا من غير ما نحكوا على المساكني و الفرجاني و الخزري: هاذوكم عرُص ممنوع المساس بيهم.. ولا كما قال أحد جهابذة التحليل الرياضي: المساكني كيف يخرج في وسط المقابلة.. زملاه يقعدوا يتامى..