يا شهيد

الأزهر الضاوي

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

غنّيها يا شعبي البـــاسل

للبحر اللّي مـــــــــــــــــــا ينسى

غنّي وقول دمّك يا فاضل

فاح خميــــــــــرة في الخبزة

غنّي وقول دمّك يا فاضل

فاح خميــــــــــرة في الخبزة

………..

يا شهيد … يا شهيــــــد

………..

يا شهيد الخبزة رجعت

يا شهيد الخبزة… ثور

طالعة من قبرك وردة

تنادي الشعب يجيك يزور

دمّي يا امّيــــــــــمة وردي

صوّر خبزة ع الكيّاس

عن شعبي صدري لقّيتو

نقبوه البوب والحرّاس

واللّي قتلني آنا ريته

متخفّي وسط البالاص

ينخز في ذراع العسّاسة

صبّو فيّ غلّ رصاص

دفنوني في ليلة ظلمة

وجنازة ما فيها ناس

………..

بن غذاهم والدغباجي

كي تلاقو بين الوديان

يتمشّو والدّم سواقي

من قبلّــــــــــي للدّندان

وقالو هذا دم الفاضل

ساح وعطّى كلّ مكان

يصرخ ويشاور ع الخبزة

رفعوها رجال الدّيوان

وناري انا ع القمح الباجي

في مخازنكم يارومــــــــان

………..

راويها الوردة من دمّك

فاحت في هبّ النّسمات

طارت ريحتها عند أمّك

صاحت ما تقولوشي مات

لاش تقولو مات الفاضل

ما تقولوشي الفاضل مات

………..

الفاضل في قمحك يا سبولة

في الزيتونة وفي النخلات

الفاضل معزوم على قفصة

نادولو جبال الفسفاط

الفاضل يا نوّار اللّوزة

فاتح في غريق القرّات

شعاع النّور في ليلة دمسة

سربة في حلق البايات

ماشي واحد راجع خمسة

ساير في طريق الحياة

هو نايم توّة يصحى

كيف تناديلو الهزّات

هو نايم توّة يصحى

كيف تناديلو الهزّات