يا فاطمة

أحمد البرغوثي

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

يَا فَاطْمَه رَاهُو الهَوَى ذَبَّلْنِي

إِذَا مِتِتْ تَرْڨَاكْ الدّْعَاوِي مِنِّي-

+-+-+-

يَا فَاطْمَه صَاڨْلِ النَّابْ

يَا أُمّْ الغَثِيثْ المْجَبِّي

بْنَادِمْ إِذَا كَانْ مُصْوَابْ

وْنِشْدُوهْ لَازِمْ يْنَبِّي

أَنِي الڨَلَبْ مِنْ مِحِنْتِكْ ذَابْ

ورُوفِي عَلَيَّ بْرَبِّي

-+-+-+-

رُوفِي رُوفِي

يَا فَاطْمَهْ مَا تْغَرّْڨِيشْ شْڨُوفي

يأَنِي حَابِّكْ رَامِي عَلِيكْ كْلُوفِي

بِالظَّاهْرَهْ يِزِّيكْ رُوفِي حِنِّي

-+-+-+-

بِالظَّاهْرَهْ الْخِيرْ مَا زَالْ

فَآهْلِ العْڨُولْ الصّْمِيلَهْ

يَا فَاطْمَهْ سُودْ الأَنْجَالْ

مِنِّكْ خْلُوڨِي عَلِيلَهْ

كَانْ خَافْيَهْ وْخَاطْرِكْ مَالْ

مِنْ كَانْ نَادِمْ نْقِيلَهْ

-+-+-+-

إذَا كَانْ ڨَلْبِكْ وَارِدْ

يِزِّيكْ مِنْ دَڨّْ الْحَنَكْ البَارِدْ

وْكَانْ جَافْيَهْ ڨُولِي عَلَاشْ نْطَارِدْ

حِزِّي غَرَامِكْ ڨَبَلْ مَا يُڨْتُلْنِي

-+-+-+-

حِزِّي غَرَامِكْ عَلَى النَّاسْ

يَا أُمِّ العْيُونْ النّْعَايِسْ

وِلدْ الأصَلْ كِيفْ يُوثْڨِ السَّاسْ

إذَا تْحَكَّمْ يْسَايِسْ

أنِي نْهُومْ مِنْ شِدَّةِ البَاسْ

ومِنِّكْ رْڨَتْنِي الحَمَايِسْ

-+-+-+-

مِنِّكْ وَاجِي

مَصْهُودْ مِنْ صَهْدِ الغَرَامِ نْلاجِي

عَالَجِتْ مَا نَافِعْ طْبِيبْ عْلاجِي

لا سلِمِتْ لَا سَلَّمِتْ لَا مِتْهَنِّي

-+-+-+-

لا سْلِمِتْ مِنْ عِلَّةِ الْحُبّْ

لَانِي مْسَلِّمْ حْرُوبَهْ

إذَا رِيتْ مَكْحُولْةِ الْهِذِبْ

تِڨْفِزْ خْلُوڨِي رْعُوبَهْ

فِي فَاطْمَهْ خَاطْرِي شَبّْ

مِنْ بَعدْهَا تْكُونْ تُوبَهْ

-+-+-+-مِنْهَا حَزَّتْ –

إذَا سْلِمِتْ مِالْخُطْفَتْ دْلِيلِي هَزَّتْ

لَوَّحِتْهَا مْنِ الڨَلَبْ زَادَتْ عَزَّتْ

تَبَّعتْهَا زَادْ الغَرَامْ صْحَنِّي

-+-+-+-تَبَّعِتْهَا سُودْ الأَرْمَاڨْ

حَبِّيتْهَا بِالْحَڨِيڨَهْ

بِينَاتْنَا الْڨُولْ يِنْسَاڨْ

وِكْلَامْنَا بِالرِّمِيڨَهْ

يَا فَاطْمَهْ الْوَڨِتْ فَرَّاڨْ

لَوْ تُلُطْفِي يَا عَشِيڨَهْ

-+-+-+-

لَوْ نْوَعِّي

يَا فَاطْمَهْ رَانِي عَلِيكْ نْدَعِّي

لَا ڨْمِحِتْ مِنْ شُورِكْ وْلَا مِسْتَعِّي

لَمْتِينْ فِي الڨَلْبِ المْشُومْ نْمَنِّي

يَا فَاطْمَه رَاهُو الهَوَى ذَبَّلْنِي

إِذَا مِتِتْ تَرْڨَاكْ الدّْعَاوِي مِنِّي