تابعنا على

راجل و سيد الرجال

“حجامة”

نشرت

في

عبدالمنعم.. حلاق مع وقف التنفيذ - منوعات ومرأة - الوطن

– ابويا ابويا نحب خمسين نلف نمشي للحجام

– اوووه لين خمسين فاش قام انا راس ولحية بثلاثة لاف نعملهم

– انت تحجم عند حجام زمني وانا ماشي نعمل كيراتين

ياسين الرباعي
<strong>ياسين الرباعي<strong>

– يعطيهالك بين العينين وشنو هذا الكيراتين بسم الله علينا وعليهم

– انت ماهو نعرفك عاد وقت تكب سعد الدنيا ، بالله اعطي لولدك الفلوس يزي وما تعملوش كيفي وين ما نقلك على مشيان الحجامة يركبك ستين عفريت تقول ماشي نزين لصاحبي

– توة يا رسول الله راجل يحجم بخمسين ، انا ليلة عرسي حتى من السشوار عملهولي وزادني غسلة لشعري فيزونات وعطيتو خمسة لاف وحب يعطيني الباقي غير قتلو اعطيهم للصانع متاعك

– ايا نبينا ونصليوا عليه اهو جاب ربي تجبد الموضوع ، نحب نمشي نعمل شعري حتى انا بالبروتايين خلي يرطاب وفرد مرة نعمل وجهي وحواجبي ، اوكة باش تعمل حسابك تحبلي ميتين نلف على الاقل وغير تقلي ما عنديش جاب ربي مرة بعد قداش نمشي

– بالله ريض على روحك قلو بروتايين فقر عظمة في راسك وبنبخ شعرك مشوار ولاباس محسوب شماشي تزيدك ها الحجامة ماهو بلي تفوح زميط محسوب

– حتى انا مع شكون نحكي ، ايا لمد عليا عسلك ماهو نعمل شعري من توة باش نلقاه حاضر لملاك استبرق بنت خوك ، وحقة انا وصيت هاكي المدام الي تجيب دبش الخارج على انسومبل وقاتلي ميسالش خلصني حتى على دفعتين ثلاثة باش على الاقل نلقى النفس وناخذ الصباط

– اما صباط زادة ، ماهو عندك كدس صبابط وزيد تلبس الكويل انت ما يظهرش البس حتى قبقاب شكون راك ، والدبش اوكة القلص قلو ار يرحل وانت الي عطاك على خسارة الفلوس

– اما دبش تحكي عليه ، دبشي الكل يعرفوه وشافوه عليا ، ياخي مازال يتلبس هاكة؟

– وبرة راوه عليك ، انا سروال وسورية لبستهم في صداقنا لتوة نحضر بيهم محسوب طردوني من الاعراس والا قالولي نعرفوهم

– شوف مع شكون نحكي انا عاد ، انت خليلي الفلوس وشيهمك محسوب نلبس فيهم ليلك انا ، ماهو باش نستر وجهي قدام اهلك وسلايفي ، اوكة شوية لانسيت ، هاكي مرت العادل ولد خالتي ولدت ، خليلي فلوس نمشي نهنيها هي هناتنا في رامي

– يا رامي ايجا خاذ حق الحجام وقلو قلك بويا ساعدنا شوية وصير وقت تحب حاجة قلي راسي راسك خير ما تحل عليا باب سبحان من سكرو …

Motifs 4

أكمل القراءة
انقر للتعليق

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *

راجل و سيد الرجال

“ضْحيّة”

نشرت

في

ياسين الرباعي:

– الو. ايا كل عام وانت بخير ياا ، ايا قلي وقتاش نجي نهزك عندنا

– سنين دايمة ولا يقطعكم عليا اما خليني في دويرتي يحييك

– ايا ايجا ذوق عيدنا قلو دارك قلي وقتاش نجيك وبرة

ياسين الرباعي

– باهي تعرفشي خلي وقت تطلعوا للبحر تغسلو الجلد نطلع اعماكم نشقشق لحيمتي فرد مرة

– اما جلد؟ بالله ماهو صدقناه للجامع يااا

– يا غبينتو الساعة علوشكم نظيف وجلدو يشره يالا صدقة بالغة ان شاء الله مالا خلي نجيكم نعصبن الدوارة نعرفك تحب تعصبيني

– دوارة شكون كونشي دوارتي ماهو ولات تتباوع وشولقتها وقطعت المصارن والمنديل ياخي هزيت رميتها في الزبلة وبرة

– هكة راد الله يا ناري على الدوارة بهاكة الحساب في الزبلة ، تعرفشي نهار تجيوا تطيبوا الراس ايجاني توة نعملهولك بالملثوث محرحر على كيف كيفك

– اما راس زادة؟ فيبالي حضرت الشاليمو قلتلها قرقطوا خلي نشوشطو دكتها تحتها وكدس في الشمس وانا دخلت نقيل فتيتة خرحت نلقاه جيفة هزيت لوحتو وبرة وزيد هي قالت ما تاكلش الراس من الاول ولين ها التشوشيط وتحوسلنا الدنيا

– يا مندبة قريعية ويا غبينة ويا هي ، توة انتم هكة عيدكم جماعة توة ، بالله باش عيد هو وشنو بنتو اذا ما تحوسوش فيه العلوش ، ايا خليني ساتكة انا ماهو نتكلم نولي مشومة ، ايجاني توة وفوح دويرتك بفتيتة مشوي وتوة نعملك القلاية

– كونشي ترامي تعملهم قلاية يااا ، ماهي قاتلك المقلي موش باهي وطروف المشوي مع طريفات سلتة كلمت صاحبتها تعرف تراتور عطاتهملو توة يجيبهم حاضرين مع السلايط

– وشنو ها الترتور اللطف علينا؟

– (طباخ يااا طباخ)

– ياخي الطباخ ولى ترتور في وقتنا هافا ! وفاش قام الطباخ ماهو لم صغيراتك وشعل كانون وبضحكة وبلعبة يتشوى وتتلمو عليه

– يااا راهو ولاوا هكك باقل حوسة ويجيك حاضر كل شي

ايا تعرفشي يا وليدي لا تجيني لا نجيك ولا نحب تفريك لحم انا نتكلم نشوام نسكت تجيني غصة ، اهو نحيت طروف القديد من الحبل وماشي نعمل الجرادق ونسليهم ونتعشاهم خير مليون مرة من الترتور متاعكم وما كذبش اليهودي كيف كان يدعي على صغارو يقلهم يعطيك غلبة مسلم يجيه عيد في العام ما يقدوش واحنا حديفنا قياس ...

Motifs 4

أكمل القراءة

راجل و سيد الرجال

“خارجين”

نشرت

في

ياسين الرباعي:

توة ما تقليش شبيك تخرج هكة تقول ما عندكش دبش كان الذل والقل تلبس فيهم، والله الا ما نرزيك فيهم حتى يجي مولى الاماعن برك ناخذ بيهم بلاطة والا دويڨرات

– بالله فك عليا شكون راني محسوب ماني خارج نقضي وفي القهوة بالكشي ماشي للعرس انا

ياسين الرباعي
ياسين الرباعي

– ياخي لازم شكون يراك؟ ماهم يقولوا مرتو موش لاهية بيه ، تصفى انت شيهمني فيك اما الناس يقطعولي وجهي بعد

– تهنى ما راني حد

– باهي كانك فاضي العشية وصّلني لدار حميدة بنت خالي قالوا راجلها طاح نمشي نطيّر السّوْ

– لا راهو ما تلقاهاش في دارها، ماني ريت اختها سجيعة في سوق الخضرة وتسلم عليك حقة وقاتلي حميدة ضيفة عندها

– ويقلّي ما ريت حد، يكب سعدي ما تقتلني ناقصة عمر كان انت، وعلاش ما قتليش دوب ما جيت وانا من الساعة نحدد في روبتي، خاسر على بويا نتعب في الفارغ

– والله لا جاء لبالي نسيت ، اما كان تحب نمشيوا لدار التيجاني ولد عمتك ماني ريت بنتو سوسن في البلاد هي وخطيبها وقالولي لازم تجيوا الليلة حتى بابا ماشي يكلمك عندنا ختم في الدار

– بالله ريتشي شكون اخر بالهيبر الي لابسو وخرجت بيه ، وهاكي سوسن تحكي لأمّها وامها ما تتقطعش و تبدى تتفوحج عليا وعلى لبستك ،ما نمشيش والله لا عفصتها مادام تحب تخليني ضحكة بين اهلي

– يا رسول الله توة على لبسة متع شارع عملتلي القمل ، باهي خلينا هوني موش لازم على بونا المشيان

– لا محسوب هوني لاهي بيا انت ، عملت شعري وضرفت حواجبي مالا فقت بيا والا قتلي صحة ، زايد لشكون تحرقس يا مرت الاعمى

– توة ناقص انا ، والله ما فقت بها بلي تفوح زميط شي ما يظهر عليها الكازي

– بالله اش اتمتم وشتقول ياخي ما عجبكش شعري؟

– لا يا روحي والله ماشي نقلك ملي دخلت محلاه واتاك ياسر غير تلهينا في الحديث وبرة ، ايا صحة مزيان

– بالعكس ما عجبنيش انا قلت توة نرجعلها تريڨلهولي

– لا خليه فيبالي باهي راهو

– ماهو المرة الي فاتت عملتو هكة ما عجبش البنات خواتي

– اهو انا عجبني شدخّل خواتك البنات

– بالله يزي عليا انت بالكشي نعمل فيه ليلك ، نستر بيه وجهي الليلة في السهرية وبعد نجي نتغلف بالفيكس ونربط فولارة في راسي نحسوا ماشي يطرشق بالوجيعة وقيلا خرجت سخونة من الحجامة ….

– للسهربة الحجامة والوهرة وللدار الفيكس والربطة في الراس وزايد ترجعلها الحجامة اوكي سكرت ماني ريت راجلها في القهوة قلي جاتها كورونا

– ويقلي ما ريت حد ! هاكة طول النهار يلق لقان راجلها والافاح يجيبك منين وسوريتو وكساويها ديما من مطرقتهم ، يا ناري عليا وبرة تقول واخذة شولاق انا

– ايه عاد هاكة مرتو حجامة موش كيف الي مرتو تبات ريحتها تعطرق بالفليو ومقرطة راسها بفولارة …

Motifs 4

أكمل القراءة

راجل و سيد الرجال

“قراية”

نشرت

في

ياسين الرباعي:

برة عاد توة شيحزنا من حفظتشي وجيب كراستك وايجا وشعطاكم المعلم … الحاصيلو اهو بدى الضرب عندي والمرا بعد ما تحفظ الصغار نعرضلها انا والحق حافظة كل شي ناقصة شوية في التعبير الشفوي وبرة وممكن الي عندها اضافة سمحة تعجب المعلمة اما المعلم عليا بالله طول يعطيها صفر وثلاثة شهور حبس ، كيف ايجا لهون وانت رقيقص كيف بوك ، والا ماشي تقتلوني بالحركة وما تسمعوش الكلام كرهتكم انتم وبوكم فرد نهار …

ياسين الرباعي
<strong>ياسين الرباعي<strong>

وانا هكك وجاني ولدي يسأل فيا على تمرين في الايقاظ ايا قلت خلي نعاونو وعلى الاقل الموجيرة ما تقعدش تڨرڨر في انت موش لاهي بيهم والي عطاك على الكورة والقهوة وهات من هاكة اللاوي ، دوب ما حليت الكتاب وبسم الله المانع الستار دخلت وقاتلو بالله شيعرف منو بوك خلي نكمل مسحان الدار ونجيك وغير تعفصولي حزامي تقسم وانا نمسح ، قلتلها كمل ميسالش توة نقريه انا ،

قاتلي اهاه باش تطلعوا كيفكم وين تعرف عليه انت كانو فالح راهو جاء من بارح ، نحبوا قاري كيف خوالو اهو نقلك

، اهاه خوالو في النازا يخدموا قلتلها اما في قلبي الحق خاطر كان سمعتني شيحزنا وقتها ،

ايا لعنت الشيطان وقمت قلنلها ايا انا خارج نجيبشي حاجة في يدي ، قاتلي بالله وين عندك تخرج ما تشوفش فيا حايسة عوض تشد تقري صغارك وتعاون ما فيبالكش الامتحانات قربوا

– يا بنتي موش تحبهم قاريين لخوالهم بالكشي نفسدلك برنامجك انا ،

كهو عاد خرجت اتمتم ندرا شتقول وما فهمت منها كان كيف تشيح الدار خرج الزبلة في يدك والليلة احد جيبلنا العشاء من البرة ماشي نقري الصغار ما عيني في تطيب واعمل حسابك خليلي فلوس الايتيد نعطيهم لصغارك يخلصوا المعلمين خير ما يعملوا عليهم بونتو ويطيحوهم في الامتحان وفرد مرة حطلي باش ناخذ صباط الدنيا سخنت ونمشي بصباط الشتاء قدام المكتب شي يحشم من فوزية وسعاد وسامية بعدلي هاكم هوما يمشيوا ولسانهم يمشي وديما لابسين وهزهم للمدار وصدّرهم وانا غير يعرفوا المعلمين والمدير وطولك يا نهار قدام المكتب وفرد مرة يتكلموا على صغارك والا ما حبني في خليقتهم …

ذقمت انا قلتلها توة لازم تحرق الفيلم ، انا فيبالي ناخذلك دماق بمناسبة عيد الامهات ، ايا اوكي جات بطبيعتها ،

ويا كلمة الشوم !

قاتلي دماق هكة ؟ بالكشي اميمتك انا والا حناتك ، خليه عندك وكان تحب تجيبلي بالحق جيبلي فردة والا سلسلة بالمجارة كيف راجل فردوس اختي ، والا حقة شجابك انت لراجل فردوس ، هاكة يعرف كار المارا موش كيفك قلي دماق ايا شعندنا فيه جيبو الدماق وتوة نعطيه لامي وانت دبر راسك مع امك خوذلها قرطاس وشق والا سبحة تتلهى بها وتعتقني شوية وهي ما عاجبها فيا شي لقاتني ساكتة والله نشهدلها مرت خوك حاكتلها فمها وهي شاربتها عسل.

ايا لقيتشي ما نحل على روحي ها النهار هات هاكي الزبلة خلي نخرج واتلهى انت بولدك فمشي ما يخلط على خوالو في النازا

Motifs 4

أكمل القراءة

صن نار