تابعنا على

من يوميات دوجة و مجيدة

دوجة تبيّض في الكوري

نشرت

في

Poules et basse-cour : tout savoir

– وينك يا دوجة امس العشية ستنيناك , ليدك في العاهد الله عشوية تشره تعدات , جاوا يا للا سحنونة ومعالجة وسجيعة عشة وفضيلة شعرية , وعملنالك كديسة الشه عليها ومحلاها قعيدة اعماهم

ياسين الرباعي
<strong>ياسين الرباعي<strong>

– امس العشية انا وين زعمة والله نسيت وهوما يخليولك عقل هاكة المغابن والحرايق الي عندي , برة برة تفكرت , عديناها عشية في الكوري انا وسيدك النوري وهاكة الاولاد نبيفوا فيه في غير جاهك هاج البجباج على هاكة الزوايل وترزيت في دجيجاتي وكانك من عليلشنا منع اما علوش قلالة ومهيرية كلاهم الشي , كل حد وقلبو ريتشي يا مجيدة اوكي جاتهم على غير يديا يعطيهم تنحيا انا عمري ما دعيت عليهم اما قلبي باهي اوكة طلع فيهم يطلع عينيهم الافنين , ايه قلي عاد شحالهم والله كان تفكرت راني جيتكم يصفاوا حال خرجتهم هوما مع سيدك النوري وجيتك

– هوما عندهم مديدة يقولوا نمشيوا لمجيدة طريقية نطلوا عليها ملي ولدت هاكي المغبونة كمونة , واوكة عاد ما سهل ربي وتلمدوا كان امس , عاد حفرتلك مريغة التاي وعندي دبيبسة شروبو مخبيتها من العيد خرجتها ومشيت نمد ڨرينات ڨطو من القصدرية تحت السرير انا وخيتك حليتها وما لقيت كان الفتفات يراهم تحت البتبات صغار كمونة وبنات عتورة , ما يهنيوا على شي اللطف وخلاوني في الحشمة يعطيهم بشمة في ها الصنعة

– العيب موش فيهم وخيتي , في اماتهم الي ما رباوهمش والي حال لين ها الصنعة , هكة راد الله علينا وبرة يا مجيدة , ايه وشعملت مالا ؟

– شعندي نعمل , بعفت سيدك قادر لدار كمال الطبال هاكة ماهو دارو ما تفرغش من الحلو وولي يبيع فيه بعد العيد , بعدلي يلمد تنايك الله نهار العيد بعد ما يطبل , جابلي من عندو باقية معبية فيها كعيبات مقروف وڨرينات ڨطو وكعبات ابيف وحمصية سترت بيهم وجهي قدام الناس

– بالله هاكي سجيعة عشة شحالها بعد ما طيحت الفانا متاعها , قايمة تحبل توة حال شقام عليها بوحش الصغار ياخي والا تهز بالصغر زعمة ؟

– ليدك في العاهد الله قاتلك جرا فيها مسيكنة , وحبلت وما فاقتش وهي ماك تعرفها بقليبها قايمة تسوق في البرج وتعبي في الماء من البير وطالعة للسدة تخمل فيها ما كملت النهار الا ما ولات تطلق يا محمد يا علي ومولى بيتها وبناتها ما فهمو شي الا ما جاء عمك الصادق شافها قلهم هافي جيبولها بالراجحة القابلة باش فهموا وقتها , وجرا فيها العزاية حتى بالحشمة قدام نسيباتها محلاها قايمة تحبل اعما بناتها , كانك من مولى بيتها تشوا على الفانا الي طاح هاكة ماهو يحب الصغار كانت كل عام كرشها على قلبها الكل على روس بعيفاتهم جابتهم , وكانك منها هي قاتلك والله رتحت منو شمازال فيا ما نربي الغشاشر انا , اما فضيلة شعرية مسيكنة جرا فيها زادة

– شبيها لاباس , شي والله تردمنا هوني والركايب وفاوا ولا عاد نسمعوا شيء يا مجيدة

– لاباس اما تنابزت مع مولى بيتها ومشات غفبانة عدة يديك ايامات لدار امها , هو ماهو حروجي وحزار يراه في النار , وهي مسيكنة على نيتها كيف ما تعرفها , راد ربي حبت تروح للبلاد وتشوف هاكي السرماكس والا سوريماس والا شيسمها الي حلت جديدة قلك تشره وفيها الدنيا الكل , هي في محطة الكار وشافها عمك سعيد , ايا قلها نهبطك يا فضيلة خير ما تكدس تستنى والشمس قوية عليك , من حينك عاد ركبت اعماه يباركلو ويفكوا من شبايك البلاء محلاه هاكة الراجل الحق ونصرة هو وكميونتو , يا للا هوما في القصاص وراجلها طالع على بسيكلتو ويشوفها في الكميونة وزيد سفساريها طايح , ستناها لين ولات للدار وعمللها صيفة نهار يشيب فيه ابن امو , كيفاش كيفاش تركب مع سعيد وحدو , وحلف عليها ما تباتش في الدار , مشات العزاية لامها , كانك من سيدها الكبير قلها بول عليه واكدس هوني والمتقلق يجيبك خبرو , رضينا بيه حنظلة وحكاكة وفقوسة مرة وهو موش عاجبو , كان جاء هزك والا دار بوك محلولة وكلابها تنبح , وكانك من راجل اختها الحبيب ماهو يشره هاكة وما ارطبو ومحلاه قداش مسايسي , قلها انا نمشيلو ونحكي اعماه , كهو عاد جاه وفهمو ولعن الشيطان وقلو باهي توة نبعف شكون يجيبها , خرج للمركز يلقاشي شكون ولى وهز اعماه سعيد بالكميونة وجابوها

– توة هافا راجل هافا ؟ يطرشق حبتو محسوب على زينو البديع يعمل فيها هكة , والله ادزو في شكلة هي لتوة شادة رويحتها ومفخمة وزينها كيف ما هي يعطيه تنحية وعقرب صيفية , عاد يباركلهم رجالنا الحق يشرهو ركبنا ومشينا مع سعيد احنا وكناينا عاد لين ولا واحد قال حرف , يا شيتي نعرفوه الراجل ومحسوب منا فينا , هاكي مهيرية حتى بالليل تكلمو يجي يهزها وين تحب يباركلو اوكي قلالة الحق لتوة تحشم منو ما هزهاش حتى مرة وما قالتلوش اما وقت تواتي ما يقولش لا الحق , ايا الحمد لله رجعت لدويرتها شعرية والله انت تحكيلي وانا تعملت عليها , تلقاها عاد سحنونة داهشة في الشي هافا هاكي بالها واسع هي وراجلها ودار الخلاء تبيع اللفت

– اوكي مسيكنة حتى هي جاري فيها قايمة بسلفها الهجال بعد الي طلق مرتو وجاء تنبر عندهم في الدار , ولاتشي المغبونة العشاء بعشاه والفطور بفطورو ودخلو كل شي لبيتو وهو مغروم بالسهرية والراديون والجماعة يرقدوا وتخليهشي وحدو عاد يسهر شيء يحشم ترصيلها هي بحفاه وتطيب في التاي وتقلي في الزلوز والكاكوية قاتلك ساعات لين الفجر يفن وهي بحفاه ولازمها تقوم بكري تحفر قهوة راجلها وصغارها وجاري فيها مسيكنة

– عاد مشاوا خفاولو مارا لين كادس هكك ؟

– قالولو , قلهم كرهت النساء من مرتي الاولة , ويا لندرى شطاح بيه المغبون , وهي قاتلك هو راجل هوما افنين اهو نقوم بيه حتى شيفرج ربي

– ومعالجة عاد ديما سويكتة هاكي عفمتها بلاش فص اللطف , عدي بها عندها البيافة في الدار وسطا مرمة ينقشلهم في السقيفة قالوا طاحت خمخم بالندا – قالت هكة وخيتي ويعلم الله بها , قالت كانك من السطا كمل والبيافة قعدوا فربات ياخي المعلم بعف الصناع وقلها توة نكملهم وحدي يزي من الخسارة ومن جورني الخدامة , اوكة يجيها من الصباح للصباح وهي بين يديه حتى مسيكنة جات راسها فيه زلومة قد ماهي , قاتلك يفرغ في السدة باش يبيفها وهي تقل عليه من اللوطة , اهو مد الغرابل يمدلها بالواحد بالواحد منهم واحد هو دلدلهولها ويجي على راسها , قاتلك مسيكن هبط وهزها بالحملة كيف لقاها لعبت عليها الدوخة وطرحها على سريرها وما سيبها الا ما حلت عينها ورجعت فيها الروح , ويزي عليا وبرة يا دوجة كل واحد كيفاش جاتو عي ها الدنيا

– وكناينك اعماكم والا كيف العادة عبد السلام ما عليه كلام ؟

– كناين الهانة ورقاد الجبانة , الي هافي جات كدست مشوار وانا نغمز فيهم يصبوشي كاس شروبو ويجيبوا صحين الحلو وهوما لاهم هوني , كمونة هاكي من الصباح نحات كعبات قارص وكدست مشوار وقالت انا داخلة لبيتي , وعتورة خرجت لمولى الفو باش تحلو المنقالة ڨدست غاد , يا بنتي ايجا قالت المنڨالة معدومة ويشوف فيها عمك الهادي متاع الفو شبيها وهي اعماه لين خرجوا الجماعة نلقاوهم الافنين على السطحة , اما يباركلو هاكة الهادي صلحها ورجعها تخدم اما خير والا ترصيلنا في خطية قلك دار الفو تفيق بمنڨالة معدومة يخطيوك

– لا يفكو من شبايك البلاء الهادي متاع الفو احنا وين ما يجي يلقاها معدومة تخرجلو مهيرية الحق ويكدسوا مشوار لين تتصلح , اما خير يعرفنا ويريڨلها هو والا نجيبوا واحد بهاكة الحساب

– اوكة الجمعة الجاية حلفت سحنونة العشوية عندها وقاتلي لازم تقول لدوجة تجي , انا عدتلك من توة خير ما تقلي نسيت نعرفك كيف مفهوبة الشيرة انا راهو , ايا خلي نمشي المغرب صار نمشي نحفرلهم فم للعشاء وكان هافا عدي عليا غدوة نشقوا الريق نحكيوا بالوهرة هافا حديف هب هب يجنني انا يا دوجة

أكمل القراءة
انقر للتعليق

اترك تعليقا

لن يتم نشر عنوان بريدك الإلكتروني. الحقول الإلزامية مشار إليها بـ *

من يوميات دوجة و مجيدة

دوجة ومجيدة وعلوش العيد

نشرت

في

ياسين الرباعي:

– يا دوجة ايا بالهنا العلوش يفهر يشره علوشك ليتو مدورة كيف الغربال ووقفتو سمحة , لا يشره ان شاء الله لحيمتو ما تطلعش محلفة وبرة يفهر فني وكبير

– يهنيك يا مجيدة , انا ديما هكك ماك تعرفني العلوش على ليتو , وانت شريتشي ؟

– انا كل عام سيدك قادر يجيبلي علوش راسو كبف النعجة وصوفو منصل وحالتو حليلة ويركبني علة في جسمي قال شنو الفايدة رزين ويطيح اللحم شيهمك في المنفر , السنة عرفتلو مية امين ما ناخفو كان على عيني , اوكة عاد يستنى في الماندا وقلي توة نهزك اعمايا وما تاخفو كان على عينك , وانا نخمم على هاكة الاولاد ياخفوشي كانك من التوفيق قلي يااا بالله ناخفو شكون يقوم بيه كمونة ما تشد فيه شي , وكانك من المنجي عتورة تتوحم وقاتلو ما نحبش علوش يجعلني نقوم بروحي

. لا محسوب وقت هي ما تتوحمش كادسة مقطعة روحها , ليدك في العاهد الله تشد هاكي الدوارة وتبدى تمصمص فيها تفركلي لحمي ومقابلتها رتيبة كمونة هاكي تخرط المصران والاخرى تتباوع علينا وتشد الكرشة من الطرف تقول شادة فحمة يراهم يفحموا الافنين , نولي انا نعرف على الدواور الكل وحتى نقلهم براوا شوشطوا هاكة الروس ما بين كملت انا , وحدة تتسبب بفناها تقول نمشي نرفعو قهرتني وهي وين ما نقفيها تجيب الرفاعة صدرها طول النهار مدرجح على برة , وللا عتورة تقوم تقرقط الروس تعمل فربتين وتقلي يا امي مجيدة انا الراس ما ناكلوش كانك تحبوا خافو والا توة يخرجوا المنجي للجامع يصدقو , نولي انا نقوم كيف راد عليا ربي ونعملهم ويتعدالي نهار مدوبل , وها , يعطيك ربي عينيهم تتحل ووليوا كيف البلاوات وقت ننصبوا المريغة ونحطوا البازين والقلاية والا كيف نشويوا العشية يعطيهم كية والا حتى تنحية ,

– حتى انت غالطة يا مجيدة , غير بس تخليهم ما يفبحوش قلك حرام بوفني سمعتو في الراديون قال الي ما يفبحش حرام , ياخفوا عليلشاتهم وكل وحدة تقوم بسقيطتها ودوارتها وتجيب كتيف تعطيهولك للقلاية , انا هاكة شنعرف , مهيرية ماهي كل شي فيها مشوم الا في هافي الحق , تعمل كل شي ناقصها كان الفبيحة قاتلك كان ما جيتش مارا نفبح , انا قلتلها افبح يقولوا المرا تشد يد وليد صغير والا تحط بحفاها يد مهراس والا عصاة البازين وتولي فبيحتها حلال ,

– كل وحدة تتلهى بسقيطتها ؟ يا دوجة راك والله نحكيلك ونندم تزيد تفركلي لحمي راك , انا نقلها المرا تتباوع وهي تقلي سقيطة يعطيهم تشوشيطة , بعد العشية وما نشويوا اللحيمات والتوفيق يربط التكسي على الموبيلات ويعبي غشاشرو والسقيطة في الجفنة و تتنبرلك وراه كمونة وتقول يا دار بوها , ريتشي منو حاجة انت العلوش انا هكك يا لندرا شتعملوا والا تخليهولهم وتجي والا فعلا اخفتها وعزاها وخلاها , وعتورة يجيها خوها يقطعهولها تعبيه صريرات وتعبيلو القفة ويمشي على حالو , مالا تقول يا امي مجيدة اهي مونة نطيبوها والا فوق علوشنا ؟ ابدا , وبعد يخرج الحديف من المنجي قاتلو شلمعنى احنا نعطيوا وكمونة لا وما ناراوا منها شي , ايا شفتشي عيدي كيفاش يا دوجة يعطيهم تنحية وموفق يشدهم من الصباح للعشية

– توة ماهو يهودي واعطيه حقو , هوما سماطهم يتقلع قبل العيد في الحركة ماني ريتهم , وكمونة عندها حلتها سمحة في الحلو وعتورة يد بيد معاها ماني فقتو حلوهم وصحة الابدان في هاكي الحلة , تجيك في نهار العيد يجبر عليك ربي , انا عكسك مهيرية لا حركة ولا حلو ولا مر , حتى نهار الوقفة تهبطلك من العشية هي ومحسن يطلعوا كان نفص الليل وهوما يا عشاء البرة يا سينما من فيلم لفيلم وياخفلها القازوز من الجفنة يراها تفنا , قلها حال لين الحومة عوف نشوفوا شناقصنا وشزايدنا , وهاكي الحركة والحلو يوحلو في راسي اوكة نجيب اختي راضية معايا الحق يفبت غرستها تهنيني على الصواني حتى يجيوا من الكوشة , وانت وخيتي نهار العيد سيدك قادر وين ماهو يعمل حويجة معاك

– سيدك قادر هاكة يجي يعين يهين , يولي على اعصابو وما يداينش حوسة وولي شعيرة تحرقلو طاجنو , يجر على العلوش ويسيب هاكة الاولاد في السليخة وينقبولي الجلد قداش من عام يشويوني عليه , ويشدلك البيت ويحب مريغة التاي ويدور دورة واحنا يدينا بالحوسة وهو يعيط بدلوا الماء الي في الداقرة نغسل الكيسان ونصبلكم , قتلو ايا لا تصبلي لا نصبلك موش ناقصتك اذا عينك في حاجة عملها وحدك , يقوم العزا ومنهم خطرة غرف الماء في الداقرة من البانو الي غسلنا فيه الدوارة ماهو العينين على قدهم ولاوا والنفير جمالي , وصبلي كاس نشرب فيه بطعمة الخرا , يا سيدي قادر هافا شنو ياخي خليت البعر عوف الحشيشة والا شلخفة ؟ غيرشي العيد عيد الهناء يا دوجة والا لا عاد عيني فيه ولا مازالت الصحة الي تنجمو

– ايا يزي علينا كل عام وقسمو ويحييك ربي لكل عام ووعي نخرجوا للمركز وصيت عمك سعيد الحوانتي على السميد قال السنة ماشي يجيب سميد يشره خلي نخرجوا النشاء على بكري , يزيك الي فيه انت توة نخرج انا ونعطيك ثردة اعملها

– تقول قريت شفي راسي يا دوجة برة لا قطعك انا هاكة لين جيتك قلت البازين عليا وعلى دوجة وهاك جبتهالي قد قد , ايا نكب سفساريا ونخرج

Motif deux poules

أكمل القراءة

من يوميات دوجة و مجيدة

مجيدة حركانة

نشرت

في

ياسين الرباعي:

– يا مجيدة توة مازلت متاع هافا انت مطبسة في الريح بالعرجون قدام الحوش , خلي هكك وادخل خير ما كرشك تتبنطل بالهواء , انا والله لا بقيت نعملو قدام الحوش اوكي قلالة مرت الباشا والا مهرية يباركلهم ويفبت غريستهم

– ليدك في العاهد الله لو ما نعملوش انا لا يشدوه هاكة البنات يعطيهم غداد , بعد الي كمونة قامت حبلت وطول النهار اه راسي ومرمية على عين قفاها يدها لراسها ما تهزهاش والتوفيق ابني هو يعمل في كل شي اهو غسل راس الصغار , اهو دخللها تشرب , اهو خرجها للميحاف ويزي عليا وبرة , وعتورة يجعلها تقد هاكي الحريقة بنتها طول النهار في كرومتها تربات بالهزان الطفلة , غير تطرحها على الجلد الطفلة تقول فيها واك تقول شكون لسعها اللطف وحاكتلها افيمها , اسمع الطفلة جات ليلهم صعيبة انا ربيت صغاري حسهم ما يتسمعش نمشي فيفة بيهم يقولولي يا مجيدة تقول عليك ما عندكش صغار , اما الشي هافا ما ريناه كان مع عتورة يعطيهالها في العاشورا قهرتني ونهرتني هي وبناتها , قلي عاد عاد انت شحال عروستك وحبلتشي؟

– تحكي على قلالة؟ اوكي مرة حمد ومرة جحا ما تفرهاش كيفاش يا مجيدة , خطرات تقول محلاها وهي يا امي دوجة يا امي دوجة وخطرات تتقلب اللطف وتقلب علينا خليقتها تقول شعملانالها , والغيرة من بعفهم هي ومهيرية يعطينهم التنحية الافنين , خرجتشي مهيرية تقوم قلالة تشوم النهار على الباشا في اوكم يحوموا وانت راهني في الدار , يكشف عليها الحال , نقلها يا بنيتي ايا قربشي تحبل ونفرح بصغيرات ابني , تقلي انا خاطيني شوف الباشا , بالله حال شدخلو الباشا ابني , توة قريب العام قللها يا بنيتي كان ما حبلتش نمشيوا لبوجربوع يقرى عليك الحفيظ لويلة , اوكي قالت باهي وينعم الله وقتاش يهزنا سيدك النوري ويفضاوا هاكة الاولاد , حتى انا نحبو يقرا عليا والله نحس روحي مريفة يا مجيدة

– ولات موضة يا دوجة يحبلوا موخر بنات توة يا لندرا شاخفتهم , بنت سلفي توة فلافة سنين وما خلات ما غلات وما شربت وما كلات والنافع ربي , رويجلها ماهو ديما في السفر يخدم يجي هاكي اللويلة في الشهر وما لقاش وقت يمشي بها لشكون يداويها , توة نقلها كان هافا نهزها ونمشي اعماكم لبو جربوع , ولو انو صحتو وفات هاكة الحفيظ الله منو كل ليلة بايت يقرا على شكون يباركلو

– حتى يفضانا عمك سعيد الحوانتي وين ما يقلو سيدك النوري يوصلنا يقلو معالجة مرتي ولات ما تحبش على التوصيل , خلاتلوا عيشتو مرار معالجة مسيكن وهو عزيز ويبل الريق , ما تجيش كاملة يعطيها بعزة , هو يشره انا عمري ما ريتو وحدو في الكميونة كان اعماه شكون , هافي هبطها للكياس , هافي وصلها للعرس , هافي ماشية تعزي …. الحق نصرة عمك سعيد , اوكي هي قاتلك ما عادش يساعدني يا للا يعجبكشي ها الحديف , تحب كان هي مرحرحة بحفاه والا ما يهز حد يعطيها دمالة في الخد , قلي مالا كمونة شحالها وقريبشي تولد؟

– ديما مريفة قاتلك , انا جيت للتوفيق قتلو اسمع مرتك يا تقوم يا جيبلها عمك الصادق الحجام يدردلها حاجة تشربها ويدلكها , شنو هافا طول النهار وهي مقشوعة على عين قفاها وغير بس نكلموها , اوكي في التالي رامت وقاتلو برة جيبلي عمك الصادق , راهو فنكنا فيها حتى جات بحفايا فندرية ماهي ساعات نعرف هي وتداوي قالتلها لا تقربلي ولا تشدني حشمتني قدام المرا , كهو عاد كيف ما قات بها وين قاتلو جيبلي الصادق

– يا مجيدة اع عليك توة تجيك فندرية وما تقليش؟ والله حبيت ناراها , في بالي نسالها على ولد سلفتها شعبونة , ماهو حب يخطب دلندة بنت مزغنية وهوما قالولي يا دوجة اسال عليه العروس , قلت عليا وعلى فندرية , انا قلتلهم ما غير ما تسالوا شعبونة وحفاقتها ورتابتها وتسالو عليها ؟ اوكي صعيبة ايه وتحب اولادها تحت منها اما عزيزة وعندها القدر , العروس قالوا ببسيكلتو وبخديمتو ومستكفي برويحتو وكادس يبني هو وخوه , ماهو بوهم عطاهم من قبلة خرخوط , واوكم مع بعيفاتهم ومتفاهمين يشرهو الافنين يد بيد في هاكي المرمة , كل واحد يعمل حويجة , قاتلك جاء لخوه قلو اسمع يا انت تصب الصبة وتسقفلي وانت نستكلك , يا انا نسقفلك وانت تستكلي الستاك , اوكم عاد صبو وحب ياخف مرا ويلم سويقاتو

– بالله تعرف هافا الكل شمزلت ما تسال فندرية يا دوجة , الي راد الله هي ما تعرفش الحديف هافا

انا تعرفني لا نسال ولا نحكي ولا يهمني في حد غير بس ريت شعبونة خطرة في المستوصف حكاتلي على اوليداتها وقالت تحب تاخفلهم , ماني مشيت نعدي على سويقتي غادي في غير جاهك تدور دورة وتيبس وفخذي يولي ازرق طيحان , الحق هاكة الطبيب غادي يشره مسدهالي من فوق اللوطة وعطاني بوماضة قلي كل لويلة ادهن مريرة , سيدك النوري اعملي لويلة وبعد قلي راني تفركت شوف شكون يعملك , فيبالي نقول لهاكة البنات كنايني وخيتي يديهم حرش طف طف كيف مفهوبين الشيرة ويقوللك كملنا , اوكة يباركلو الصادق من العشية للعشية يسكر حانوتو ويجيني , يشويه مزود البوماضة قريب يوفى انا قلت لمحسن ابني يجيبلي حتى افنين اخرين فمشي ما تفهن سويقتي مادام الصادق قلي نجيك في كل وقت

– لا يوريني فيك غيار يا دوجة وان شاء الله لاباس , ايا ادخل شلعزة وانت في باب الحوش خلي نحكيوا

– بالله وين ندخل خلي نمشي نحفر فطور الجماعة , توة نجيك عشوية بالوهرة وطل انت زادة لا يقطعك يا مجيدة تعرفني انا حديف هب هب ما نحبوش …

Motif deux poules

أكمل القراءة

من يوميات دوجة و مجيدة

دوجة ومجيدة يطيروا في السو

نشرت

في

Chèvre Stock Illustrations, Vecteurs, & Clipart – (68,609 Stock  Illustrations)

ياسين الرباعي:

– يا مجيدة تو ما تقليش وقتاش نمشيوا لنفيسة نطلوا عليها , قلك لا يوريك سو سكها البرشني وقت دخلت تعلف الشويهات وساقها يابسة كيف اللوحة وفخفها ازرق طيحان ومسيكنة في غبينة تحرك , وعمك الصادق الحجام داخل خارج يمسدلها في سويقتها وهي في غلبة كراية

– بالله شدخلها للكوري هي وشمازال فيها ما تعلف الشياه , مالا هاكة البنات فاش يعملوا والا ما عطاهم على الحومة من زنقة لزنقة ومن فلة لفلة يعطيهم شلة في هاكة السويقات , وزيد بالله شقربها للبرشني حتى يسكها

– هي ماهي النفير جمالي وفيبالها تحلب المعزة عاد غلطت ومشات للبرشني تحلب فيه وعوينتك ما تارا سو قلك طيحها مسيكنة ورفسها بسقيه ,

ياسين الرباعي
<strong>ياسين الرباعي<strong>

– انا ما فبيا ما نمشيلهاش هي ما تواصلش انا وقت دخلي حنش وتفجعت وجارا فيا تحرم تجي تقلي ما عندك سو يا مجيدة , لا حد خير من حد وخيتي وزيد كنتها ملي تعاركت مع كمونة في عرس الباشا ابنك على كميونة سعيد وانا نفرتها الحق , ياخي هي خير من رتيبة تكدس القدام وتشنعهم وبعد يمشيوا مرصوصين وهي في حجر الراجل ؟ اع عليها من مرا , كمونة ماهي مشومة اما يهودي واعطيه حقو هي عربنت على سعيد الاولة , اما كانك تحب ناقفوا عليها ناقفوا مشوار والله كان على خاطر عمك الطيب راجلها فهب معير هاكة الراجل بالقدر والحشمة وين يراني يا مجيدة يا مجيدة ويهزني من القاعة منهم خطرة في الزنقة انا داخلة ولعبت عليا الدوخة في غير جاهك كنت في الكاس ومشيت صايمة وجبدولي الدم وصلت للزنقة في حالة الدرك من الله , عاد شافني وهزني وانا سفساريا طايح وحطلي راسي على كتفو وتحملني ديڨة ديڨة لين دخلني للبرج وما خرج الا ما طمان عليا في فريشي , ليدك في العاهد الله لا حسيت بالزنقة نهارتها ما اقصرها ولات زنقتنا وفيسع وصلنا وهو متحملني , برة يباركلو , كان تحب العشية ناقفوا عليها نفقدوا عين ابليس مشيتشي مشيت

– خلي غدوة يا مجيدة العشية ماشي نكمل هاكة الشعير نغربلو اوكة من الصباح مكنت فيه قلالة ومهيرية يقليوا فيه وخلاوه هكك ودخلوا غسلوا راسهم وسيدك النوري قلي توة نجي نلمدهولك ونظفهولك وانت غربلو ونهزو للرحى , عاد قلت نخليهولو مغربل باش الصباح يخرجوا معاه , وقلت فرد مرة نخرج عماه للمستوصف ناخف دوايا ويعود يعدي عليا الطبيب عوينتي في حالة كيف الصمصمية قلي فيها الماء الخطرة الاخرى انا توة شهر ما غسلتش وجهي وما قربتلهمش الماء وحتى نارا شيعود يقلي

– هاكة بالعصب راهو يا دوجة , ياخي الي صارلك في عرس الباشا شوية والي عملتو فيك قلالة وامها وخلتها يخلي جلولتهم , انا عرفتك ماشي تاكلها وترقد اوكي جاتك في عونتك يفقد عينها امها , المرا تتشرط وتتفوحش عليك وما عاجبها حال

– هو ماهو يتلمد الشي عد يا مجيدة , فتيتة من سيالية يعطيها تنحية تجيها في العشية , وفتيتة الطبيب قلي ما تغسلش راسك وترقد وانا وخيتك ما نجمش نرقد هكك والله نمشي نجري للمطهرة قبل سيدك النوري وترجع وتاخفني عيني اوكة طلع يعقب الشي , قلي من قبل راهو الحدبف هافا موش من توة

– امشي مالا ما تسكتش على عوينتك وبعد نمشيوا لزوشة , اوكة سلامي كلا يا لندارا شكون جايني , حتى في الفطور انا نحرك فيه وانا عطست قامت عتورة قاتلي لازم شكون ماشي ياكل عمانا زيد باي والا افنين , وهي المغبونة طلعت مبرمجة مع دمقة خلتها باش تجيها تعمللها حواجبها سمعتها تكلم فيها في التلفون خفات المفتاح من عند كمونة وحلت وكلمتها , راهم هاكة الافنين يعملوا الف فاقرة مع بعفهم وانا نصل وبرة ديما يدقهم ربي ونفيق بيهم , ماني ولية وعلى نيتي تعرفني لا نفر لا نافي وفيمي ساكت ديما نفيق بيهم اما لين البلادة , حتى نجي ندعي عليهم نقول لوح عليا براهم كدس في الفنية الافنين – مادام سلامك كلا راهي جايتك دمقة اما كان كلاك شاربك راهو راجل جاي ,

– وهو عمرو كلاني شاربي يشويه , ماهو يجينا كان الي تعيط ايامو ناقصتني كان دمقة انا وعياه الدمامقة , غيرشي سيدك قادر يرصني ديما ويقلي خليها موش كادسة طول النهار تجينا , اوكة هو يتلهى بها يخل ويخرج في التاي ويبصر عماها وفحكهم يجيبك منين

– لا في العياه ما خلات لحد دمقة , في صبة الحبيب ابنها باعفتلي بلاطة بالكسكسي فيه شحمة وعفمة , بالكشي مخصوصة لكسكسيها انا , اع عليها , حتى مديتو لسيدك النوري قتلة فوق متاع دمقة قلي هافا مشحم وقوي ما نجموش ليدك في العاهد الله لا تبسم فيه حد , ومنهم خطرة تلاقينا في الحمام انا قلت لين نخسر في حق حارزة اهي دمقة يباركلها تحكلي فهري وبرة , انا قلتلها وهي دكتها تحت منها وسكتت , حال شجارالو كان حكتلي , رصاتلي وخيتك خرجت هكك فهري موش محكوك لين عودت غسلت راسي في الدار وحكهولي سيدك النوري يفكو من شبايك البلاء والله تفرك وولى يلهف مسيكن ما عادش ينجم

– الجهد تلقاه كان مع عتورة وبناتها طول النهار وهي بحفاهم اما خلاف هكك الريق ما تبلوش يبس رويقها من مرا شكلات على قلبي وشربت , انا نفكر في غسيل صوف كمونة في البحر جابتها عتورة يا للا وعملت الدنيا الكل من التنشيف للتخبيط بالكرنافة ومن زغاريدها يجيبك منين ووقت قلنالها برة اعمانا في صوف فهيمة بنت كراية سلفتي وهي جابت المرف الكل يعطيها مرف متاع ليه ليه على ما خلاتني في الحشمة

– هو الحديف بيناتنا , بالعاني عملتها هي حكاتلي في الحمام , قاتلي كراية ما ندخلش سلايكها مرا زڨلامة وشنفورها على قلبها وزيد وقت جاتهم في تحفير الدبش تحرم تقلها اكدس افطر بحفانا وهي فطورها موش طايب , لا هافي ناقصة من كراية يا مجيدة عاد لين

– هاكة باش تعرف خويا محسن العزيز مسيكن قداش يعدي برة يعطيهالها بركة سيدي المسدي , حتى اعمانا احنا يا مرا , مالا تقول نهار ايجاوا كولوا والا عشيوا والا شقوا الريق ؟ ابدا , عوينتك ما تارا سو , مالا قد ما ورفت على بوها را حاجة سيدي محسن ؟ فلوسها في البوسطة وكيف تبدى حتى محرمة خشم تقلو هات حقها , اوكة طالع فيها تقول تاكل في الملح عرقين يتحركو لا فخيذ لا زنيد لا صدير كيف النساء بالوهرة , ليدك فيالعاهد الله تمشي عمايا خطرات لعرس يقشرولي وجهي الناس شبيها مرت خوك هكة , نكلمها تقلي عودك عودك انا عودي هكك شنعملو , شتعملو ؟ اطلق خليقتك وصلح طبيعتك توة يجري الدم في وجهك نقلها يعطي ما يهزها

– ايا هافا الحديف ما يوفاش راهو , نمشي لهاكة الشعير نغربلو خلي يحكهولي سيدك النوري وغدة كملي بالوهرة ما اخيبوا الحديف هكة هب هب

Motif deux poules

أكمل القراءة

صن نار