ياسين الرباعي:

وانا نشوف توة في الناس تبرمج في العطلة هذا في الوتيل الفلاني وهذا في الوتيل الفلتاني والبيسين هذي طايرة وهذي صغيرة وهذا ماكلتو باهية وهذا لا … تذكرت عطلتنا وقت كنا نسكنوا في الربط ونستناوا اخر نهار في القراية باش نطلعوا للغابة لدار الجدة ومن الفلة يبدى الجهاد اول ما يستقبلونا كل من اتجه للغابة طول نبداوا اللعب قبل حتى ما ندخلوا نسلموا يا تتشكل قسمة متاع ماتش كورة وقت تكون كورة القراطس تعملت وتربطت وجاهزة للاستعمال او غميض وطرح جري على الطاير او في الجنان وماكلة الزلوز المغزاز والمشماش الاخضر من الشجرة وطبعا بالسرقة لان الجنان بعد الميالي كان من الممنوعات انك تدخلو ولازم نعفصوا في السطر متاع الميالي باش ما نخليوش بلاصة الساقين ونكونوا حافيين باش العفصة ما تبانش متاع شكون , وفي سطور الميالي نبداوا ماشين وناكلوا في ڨرون الحلبة الخضراء والڨرفالة والحمص الاخضر .

…..

وتجتمع النسوة وقتها ويتجبدوا الكرنيات انا ولدي طاح في الحساب والاخرى بنتها طاحت في الفرنسية اما بسم الله عليهم ذكيين المعلم قال هكة والفايدة موش توة المهم في الساتت ياخذوا السيزيام … وبعد تطيب طنجرة محمص مغلي والخضرة من الجنان خبيزة وسلق … وتتحط شقالة للصغار وهذا السلف سرفس متاعنا وقتها وتبدى السهرية بقلية حمص وفول ويتنصب معد الديمينو للرجال واحنا كل مجموعة في تركينا هذم يلعبوا في سلطان بلغ والاخرين في الخماس ونختموها بطريحة بنفس الشلاكة الي لعبنا بيها وقت يهرب السارق من السلطان في تنفيذ الحكم وتقوم عركة ويقوم واحد من الرجال يخبط فينا ويقلنا ايا تمغطوا يا بناي الكلب وانتم لا ترقدوا لا ليل لا نهار , وطبعا يضرب الصغار الكل ولا مرا تتكلم ويعز بها وتقول علاش ولدي والا ولدجي ما عمل شي وفاش قام تضرب فيه وتحلف بالايمان لا قعدتها وتهز صعارها كيف نساء توة …… وبعد الطريحة نضطر للنوم والكلنا طرحة وحدة في البيت وكليم الشوالق فوقنا الي يرقد على جنب يقوم عليه.

……

واحنا راقدين عاد في بيت النساء ويبداوا يرغيوا والحق ما عندهمش تقطيع وترييش وساعات وحدة تسيب نكتة والا كلمة خضراء ونضحكوا وقتها تسمع : صار انتم لتوة فايقين يقطع ريحتكم ما نجموش نتكلموا كلمة وحدنا , الصباح تتخلط صحفة البسيسة وشقالة العليق والشريح نكملوا ونخرجوا للجنان وتبدى مرحلة جديدة من اللعب والهرج وتقريبا الصباح كان مخصص لمرج الارانب في المطمورة ومحاولة مسكهم او سرقان العظم من تحت الدجاج وتكسيرهم ولتوة ماني عارف علاش كنا نتشمتو ونكسروا العظم وعارفين بعدها طريحة وزادة تكون فمة مرمة في تركينة الجنان والصبة مصبوبة وتحتها كدس التراب ونبداوا مسابقة احسن تنڨيزة وشكون يجي واقف …. وقتها يكون حضر شقان الريق وشقان الريق له نكهة خاصة فهو عبارة عن تسخين فاضل العشاء وصحن مقلي وهاكي البطاطا جرارات موش فريت بلاش بركة وكعبة الطماطم من الجنان والخبز لفيف او مبسوط.

…..

ومن غادي طول للزنقة والجنان وموعد مع جماعة الزنقة الاخرى لتكويرة تكون على الشوكوطوم او سطل ليم يعني الرابح ياكل بلاش وطبيعي التكويرة توفى بعركة وندخلوا مغبرين من ساسنا لراسنا وطول تقلك امك برة عبي كرتل ماء من البير صحيت خلي نغسلك طرافك وتبدى مغامرة جديدة في المطهرة بالقرصان والتشويش وتجليد اللحم بهاكي الكاسة الكحلة ونخرجوا بربطة البشكير ونوصلوا للسهرية ويتعاود السيناريو من الليل للصباح لوسط انهار.

…..

يعني العطلة متاعنا كانت اول ان كلوسف all inclusive كيف صغار توة ما فاتنا شئ معنتها !

ياسين الرباعي:

انه حفل زواج النوري ولد حبيبة عشة سلفت بنت خالت جارت انسابي … طبعا انه عرس قريب ووجب علينا الذهاب حتى لا نبقى حديث واللوم اسمع افزع ما جاوش واحنا مشينالهم في طهور ولد جيرانهم…

بدات تحضيرات الذهاب للزفاف منذ المساء من غسيل الراس الى تجبيد الشعر وتحديد الملابس ، بعد العشاء بدات التحضيرات والسيشوار ضارب مسد وحكك المكياج موزعة هذا رمال على العينين وهذه شلوفة حمراء ثم تتغير مارون ثم وردية لتعود في الاخير حمراء وهذه دندونة على الخدود وبين الفينة والاخرى تسمع : ايا قوم حضر روحك نحب ندخل قبل العروسة راني ، ثم يتم لبسان الدبش وننطلق الى الصالة . دخلنا الصالة فوجدنا اهل العروس بالباب يستقبلون الناس ويسالوننا دار شكون انتم مازالت البركة فتقول زوجتي احنا دار فلان جيران فلانة فتسمع ايييه يا حسرة عليكم وعلى عشرتكم بالله شحالكم وشحال امك وخلتك عبيشة … عزيزة راهي امك يا حسرة عليها وعلى وهرتها ،

ثم نتوجه الى مكاننا في طاولة تكون بالصف الاول لنكون قراب من العروسة وبعيدة على بافل الفرقة الذي يصدع الاوذان ، وتبدأ حصة المراقبة ساعتها ، شوف راضية يطرشق حبتها عاملة روحها ما شافتنيش خاطر خويا ما خذاش بنتها ، محسوب مية سنة عليها والا حاشتي بخليقتها انا ، ونحن كذلك تجي راضية تسلم ويقطعون بعضهم بالبوس بالله وينك وشحالك والله عينيا عماوا بوحشك وراضية تقلها موش بنتي خذات وعرست وطيحة عزيزة جاتها ويكون الرد ربي يهنيها مكتوب وخيتي راني فنكت فيه خويا غير هو طلع عندو شكون يالا ربي يهنيهم الكل ، وتمشي راضية وتقلي هاكة موش الفتحي ولد نفيسة بنت عمتك شبيه ولى هكد كبر وهرم يعطيها عزة مرتو كبرتو بلاش عمر ملي خذاها وهو يعاني مشومة طلعت ،

ونحن كذلك ياتي موزع الحلويات ويقدم لنا طبق فيه الدور الاول ويغشمنا بكاس تاي ، وتاخذ الحلو وترميه على الطاولة وفي قرارة نفسها ماذابها تاكلو الا انو البروتوكول يتطلب هذا ، ويحل موكب العرسان فتقول لي : بدلتها ياسر الحجامة نعرفها كحلة دبونة رجعتها بيضة الشه عليها اما شبيه العروس هكك كسوتو بعيدة على السورية ؟ يالا يصفاوا الفايدة في الهناء …

ويحل موكب دار العروسة وتمتلا طاولتنا بالنسوة والبوس مقطع بعضو فاقول لها انا ساذهب التالي مع الرجال فتنظر اليا هاكي النظرة التي نعرفها جميعا ولا ترد بكلمة ، بعد فترة اذهب اليها ومن بعيد اشير اليها ان نذهب فتقول لي : استنى ناراوا التنڨيز على الحوت اهو قريب ، ويتم القفز على السمك وانا اڨرڨر فتقوم وتقول لي : انت ديما هكة تقول علاش لاحق وتحشمني قدام الناس اللطف ما رينا شي ايا اخرج وانت مررتو ها العرس ، ونحن كذلك تاتي امراة مع طفلين وتعانق زوجتي وتبدأ رحلة جديدة من الترحاب وشحال وشحال … ثم تقول لي : ايا نوصلوها في عراضنا وين ماشي تلقى تاكسي هي وصغارها في ها الليل ، فاقول لها وين تسكن هي فتقول في عراضنا في ثنية المطار مع العلم ان العرس في السلطنية ونحن نسكن في قرمدة …

ونخرج جميعا للسيارة ويبدأ الاستيديو التحليلي والمافيولا للحفل كاملا من ام العروسة وام العروس ولبستهم الي موش متاع عمرهم لروبة العروسة الي معريا ياسر للحلو الي ندرا وين عملوه ويحشم موش على فرد كعبة والبجاوية يابسة كيف الحجر لشعندهم صغار في الصالة وكلبوا على ايامهم والمرا تقلها والله لو موش نعرفهم عاقلين صغاري ما نجيبهم مع العلم انهم قريب ينقبوا الكرهبة وهوما ينڨزوا ويتبنباوا في الكرسي واهم حلوا الشباك اهم سكروه وامهم تقلهم زيدوا زيدوا اهو عند بوكم حتى نوصلوا …

اخيرا وصلنا المنزل ودخلنا ونحيت ملابسي وقررت ان اتمدد قليلا فسمعت صوتا :كهو انت نحي ولوح ماهو علقهم ورجعهم كل شي انا اقتلوني وارتاحو … وزيد ماشي التالي ومخليني وحدي كيف الهجالة في الصالة ديما تعملها ها الصنعة وزيد ما تخلينيش نكمل العرس شي كان انا زهري النساء الكل رجالهم بجنبهم …

يا له من حفل زواج رائع وسهرة جميلة قضيناها

ياسين الرباعي:

ايا سيدي قمت في الصباح نلقى الكرهبة هزتها الموجيرة وانا لازم نهبط للبلاد ، برة خرجت الزنقة ووقفت على الكياس نستنى في تاكسي بالبلاصة ، وبصراحة ما طولتش ياسر وبداوا كل تاكسي يتعدى يزمرلي ويشعلي الضو حسيت روحي نانسي عجرم واقفة والكراهب تبزنس فيها ،

ايا وقفت تاكسي فيه مواطن بجنب الشيفور وانا وحدي التالي دوب ما قعدت حسيت بروحي بردت وسروالي مبلول ، يا معلم شفمة ، قلي لاباس خويا هاكة هزيت كليون توة طلعت بيه من باب الجبلي حط الساشيات على الكرسي والله غالب ساشاي المرقة كانت تشرشر طاح شوية ماء على الكرسي ،

الحاصيلو وقت هبطت حسيت انو القطاطس الكل شادة جرتي ، ايا مشينا شوية ووقف قلي بالله حللها الباب خاطر ما يتحلش من برة ، طلعت المرا وهي تقول ريحة الغاز تقتل وليدي في الكرهبة ، وهو كان متخلق الحق وقلها ما عجبتكش الكرهبة اهبط ، قاتلو لا تشره وليدي اقصد ربي بركة غير سكرلي ها الشباك ريح داخل ، قلها والله كل نهار نقول نصلحوا وما سهلش ربي راهو ما يتسكرش ،

ايا زاد شوية ووقف وطلعت بنية من الشيرة اليسار ورصاتلي في الوسط قلتلها ايجا انت الوسط راهم سقيا طوال ، قالت انا بجنب البلار والا نهبط ما نحبش الوسط ، ايا يتخذ خلي نوصلوا برك ، احنا هكك والي جنب الشيفور سكر الراديو وجبد تلفونو وحطلنا غناية اول مرة نسمعها لا عرفتها راب ولا عركة المهم حفظت منها كلمة برك * اووه يا نغار وبزوز كفوف طلع خرا وماء سخون … * والله هكة الغناية راهي ونقلتها كيف ماهي ، والسيد شايخ ، قتلو يا فتاح يا رزاق يا خويا خلي الراديو ونحي علينا هذا ، قلي هذي عالمية الغناية ياخي موش عايش في الدنيا انت ،

برة قلت الله يلعنك يا شيطان نقعدشي نتعارك ع الصباح وتلهيت بروحي وما ريتش هاكي الطفلة وهي تكتب لصاحبتها في ميساجات وتقلها والله الا ما نوريك فيه يسخايبني موش فايقة بيه حتى ناخذ حق الصباط من عندو قبل وبعد نبعثو، وصاحبتها ترجعلها : انا قتلك من الاول سيب عليك منو وزيد والله ما تصور منو شي يفلي راهو … الحق ما كنتش مركز وشدخلني نقرا غير هي خبات التلفون بالساك متاعها والي راني عرفت شقررت تستنى الصباط والا تبعثو …

ايا وصلنا للضو الاحمر وصف كراهب قد ماهو وما فقت كان بعمي الشيفور يجبد لليسار ويعطيها الشياط ورحية الغاز شوية لا خنقتنا والباب يطربق وكثر الهواء من هاكة الشباك المحلول والنبي مولاك يحرق الضو ، ياخويا علاش هكة ، قلي ما نعملش هكة نباتوا هنا وما نخدمش ، يا سيدي هبطتني نكمل على سقيا ولا نموت معاك ، قلي خلصني كامل ونهبطك ، قتلو ووقت ما نخلصكش قلي نكمل بيك للبلاد وغادي نخلص … المهم وصلنا وجاء في وسط الرمبوان وقال سايسوا رواحكم واهبطوا خير ما ترصيلي ندخل للمحطة خلي نخطف الدورة من هون …

عاد فتكم بالهدرة بلاصتي الي كان فيها ساشاي مرقة قعدت فيها هاكي المرا والموس متع الكرسي ماهو محلول بكلو عاد وتبنبخ بالماء وهبطت هاكي المرا عبايتها لاصقة في مؤخرتها وانا ريحتي بالحوت قلت ايا فيهشي فايدة نقعدشي هكة ريحتي ، مشيت للمحطة وخذيت تاكسي اخر رجعني منين جيت ….