ايا سيدي ماشي بدخلوا الصغار للمكتب وكل واحد يعرف بلاصتو وتوة ماشي تبدى حرب اخرى في الديار , هو قبل الديار راهي بدات الحكاية قدام المكتب , ماهو فمة نساء ملي يحل المكتب لين يسكر وهوما قدام الباب محلڨين عام كامل تقول لا في جرتهم ديار ولا حركة ولا تطيب , وهاكة النساء الي موجودين قدام كل مكتب يعرفوا خنار المدرسة اكثر من المدير والمندوبية والمعلمين بحثهم الكل عندهم , اهم اليوم عاد تلاقاوا وبوس وتعنيق وياجميلة شحالك ووينك يعطيك بلحين من المكتب للمكتب ناراك ….

. والله يا سعيدة قد ما حبيت نجيك في الصيف اما شي ماك تعرف الاعراس والبحر ويزي عليا وبرة وكمل عرس سلفي السنة كليناه صافي في جرتو , جاب ربي عملنا ايامات في المهدية والله تشره هاكي المهدية من العشية للعشية نخرجوا عالة التاي وننصبوا في الكورنيش برود يهبهب الحق وبحر يشره , ايا اهي جات راضية تظهر سمنت في الصيف وكحالت شعزاها زعمة ؟ يا مرحبا يا راضية وكل عام وانت بخير ايا سمعتشي ولدك عند شكون جاء ؟

اهو سمعت توة وقالولي عند مدام حميدة وانا بيناتنا ما نحبوش عندها , وخيتي تغيب ياسر وتحبل ديما وتطيح وعام كامل ما يقراوا شي الصغار , نحب نحولو عند سي احمد يشره الحق ومستواه باهي

, وانت تنجم تحول ولدك عند سي احمد بالله ؟ هاكة من اول الصيف عطاوه الصغار الممو وقلك المدير ما فمش محوال , انا جاب ربي بنتي عندو السنة اما في السوري عند راقية وانا تنوغلت الحق

, هاكي دينها فلوس والي ما يقراش عندها ايتيد تحتحتو يراها محتحتة وهي كيف العقرب الصفراء

, توة باهي هذا كل عام المدير يخلينا علة في كل قسم رغم دخلتلو عمناول ووصيتو وشي , حتى قلنا خارج انتريت المدير اهو طلع مازالو عام , والا حال كان في بلاصتو جاء سي الشاذلي محلاه هاكة الراجل وقداش مسايسي وياخذ بالخاطر , انا بالمسلط وقت يشد هو مدير بنتي تكمل السنة السيزيام

, وكمل عاد بنتك في السادس السنة يا جميلة وخلاولهم سي المنصف الحق هو يشره اما من عمناول تبدل مسيكن في النيخي هو ومرتو ونازلتهم عند الحاكم ولى ما عادش يقري كيف قبل انشاء الله السنة تكون تحلت حكايتو ويرجع , اوكة للحساب خلاوا معاه سي الطيب ومسيكن ماهو شرا دار وواخذ قرض ولى دازز عليها بالايتيد وفي القسم ما يقلهم شي الي يحب يفهم يجيني للدار يقلهم

, لا انا اذا هكة داخلة للمدير نقلو يحولي ولدي وكان الزم نحولو من المكتب توة نعمللهم صارمية انا ها المعلمين واسمع يا حسرة مكتبنا فسد راهو حتى نائبة المدير ماهي عرست لبنتها وبنتها ولدت ولات طول النهار الي غايبة اكثر ملي تقري شادة ولد بنتها ومبروك الشاوش كان مهنينا على صغارنا في اللمجة ووقت يغيب المعلم . قام المدير السنة قلو نحي عليا النصبة متاعك وما تبيع شي , اوكة بالبونتو ولى يكنس الاقسام ويشد بيتو ويكدس وهاكة الصغار كولني ناكلك في الساحة …

. اوكة حتى الجداول ما عطاوهمش قالولهم توة نعلقوهم وانتم نقلوه بعدلي الفوتو كوبي متع المكتب ما فيهاش اوراق

, يا جميلة بالله هاكي مدام هالة قسماش عطاوها ؟

العادة ديما قسم الرابع كبتلهم سعدهم الصغار لا تعرف تقري ولا تربي الي عطاها على جبدان شعرها وكل جمعة بلون وهي اش يا ذبانة ما فمة في الدنيا كان انا , وهو الحديث بيناتنا ماهي سلفت اخت راجلي جارتها قاتلي كل ليلة طريحة من عند راجلها وعركهم يجيبك منين

, اوكي عطاوها قسم الخامس السنة يا للا وتقري ايقاظ وتشكيلية ابرك ما تقريهمش حاجة اخرى ,

ويكمل الديسكور في الدار عاد ايا شقللكم المعلم وتوة نحولك من القسم انت اسكت ما تقول شي خاطر المدير وصاني قلي والله كان على خاطر نعزك يا راضية