ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

عبد القادر ميغري:

  الجمعة الي بعدها مشيت ليلة للمطعم دخلت من جهة باب التلامذة، عملت دورة لاحظت ان التلامذة اغلبهم ياكلو في عناكش وڤاشوش وجناحات، قليل صدر أو فخذ كيما قال لي أحد أولياء التلاميذ ضاحكا: “دجاجكم لا صدر لا ساقين ههه” تعديت للكوجينة، نشكر في الجماعة وكذا، تدعثرت في سطل نظيف، ثبتت نلقاهم برشة سطول يلمعوا بغلاڤاتهم ومن النوع الشفاف الخاص بالمواد الغذائية.

–  اشنوة هاذم ؟

–  متاع الاهالي يجوا يهزوا الصبة لكلابهم..

– مالة بكلهم مربين برجي ألمان وأنواع أجنبية ؟

ضحكوا، ضحكت معاهم وقلت لهم :

–  ايه، خاطر الكلب العربي ياكل الي يجي وما ياكلها كان ممرمدة، لكن ظاهرلي هنا ياكلوا بالمغرفة والفرشيطة (أو الفرڤيطة)

                                           ***

ورميت عيني للفور ويا للمفاجأة !!!

حليته نلقاها صدور يومئذ مكتنزة تكدست في الشقالة وتحتها أفخاذ مثيرة.. للشهية.

– اشنوة هاذم ؟ فضلوا من العشاء ؟!

–  لا ، هذاكة عشاء الإطار التربوي ،

–  والبونوات ؟ وريني تره .

–  لا من غير بونو الحق، سنّة حميدة من سنين .

يعطي عزاء لحميدة قداش عندها سُنَن!

***

اكاهو عاد بدلنا جدول الماكلة ومنعنا الأكل من غير بونو على الجميع … فجاءت النقابات في جلسات وتسوّات بعض الوضعيات رغم شوية مجاملات وبعض الاعتراضات والاحتجاجات.. واشكون عامتها ما يحتجش والا يكيدو العرف؟؟ كلها ثوار ثائرة والعجلة دايرة والمركبة سايرة والقصبة حايرة ومع ذاك ثمة وجوه نايرة وطنجرتها فايرة وما علينا سيدي الرئيس..

                                             ***

هيه، تذكرت. ثمة ظاهرة سخطتني بيها الوزارة عامتها هي أستاذة المسرح. شابة حسناء وأنيقة وعقلية أخرى من عالم آخر وكدس مشاكل يمشي عالارض. أولها جاني الي كاريلها الدار كيفاش تغير محل السكنى وماتشاورنيش، وهزت كراء قداش من ليلة،

– هيه ونا اش مدخلني؟!! 

– مشك عرفها وتحكم فيها!! ،قلها ترجع وتاو نسامحها

– يا ولدي بره يهديك ربي ناقصك انا !!.

وزدتها تبا بيني وبين روحي طبعا. وبعد نهارات الأستاذة هذي صوّرت قيم يضرب في تلميذ (وعلى فكرة: الضرب هو أسلوب التعامل الوحيد مع التلامذة). وهددت بالتبليغ وولات عركة بين القطاعات واجتماع مع الاساتذة ناس ضدها على خاطر تتكيف وناس معاها خاطرها زميلة، فقط لأنها زميلة. وبره عاد. لازم راس من نحاس.. المهم تفضّت المشكلة. ولكن الحق كانوا يموتوا عليها التلامذة ويحبوا ساعتها وهي كانت مندفعة وتعاونهم في مشاكلهم اكثر من اللازم. وتزيد تطلب قاعة اختصاص وطريقة عمل جديدة وبرشة حس لازم قاعة منعزلة وكان ذلك كذلك.

                                           ***

قوس: على ذكر الضرب ، ثمة ليلة وقت حصة المراجعة الليلية قبل ما يطلعوا للدرتوار، أنا في البيرو الي هو متركن الداخل في الادارة نسمع في الضرب طاف طاف رغم بابي مسكر، خرجت، نخزر كان لقيم ڤدع بطول وعرض يفشّخ في تلميذ بالكف، وعلى وجهه

–  ياسي فلان ، بربي دقيقة ، من بكري نلوج على نومروك حاجتي بيك عاجلا (مدير ونكذب !!! يا للعجب)

– لحظة سي فلان ، نسوي هالذيل (يقصد التلميذ) شوية ونجيك

– أجّله  لبعد يسترك وايجاني

تلفّت للطفل وكش عليه “اذهب لقاعتك وان شاء الله تعاودها ؟؟”

 وجاء ، سبقته للبيرو وكنت أكاد أتميز غيظا ، ماش نطرشق أصلا مازال داخل قتله:

– لاباس سي فلان؟ اش ثمة ؟

– لاباس . هاك انت قتلي امر مستعجل

– ايه. اشبيه الوليد؟ اش عمل؟

– فرخ حرام حاشاك. اتصور ماشي يجري للتواليت ناديتو طفاني واتعدى فلاش. ما عبرنيش اصلا

– انت وين ساعتها ؟

– خارج من قاعة الانترنيت ماشي نتفقد فيهم

– قاعة الانترنيت؟ عنا قاعة خاصة بالانترنيت تحل في الليل ؟

– لابو لانفورماتيك، ما عناش انترنيت في بيرونا خاطر

– ااه. فهمتك . واللابو محلول لتوة ؟

– ايه . عنا نسخة من المفتاح. من قبل ديجا

– وانت موش المفروض تكون مع التلامذة في قاعتهم ؟

– ماش نقسم روحي على قداش من قاعة؟ ماو زيدونا القيمين تاو كل واحد يشد صالة

– لا هظاكهو الحل. عندك الحق. مفتاح القاعة عندك مالة

– لا. عند سي (…) تاو كي يكمل يسكرها كالعادة

– سؤال بربي: لو تتسرق حاجة من اللابو او تتكسر او يصير دخول لمواقع ممنوعة، اشكون يتحمل المسؤولية؟

– انا مواقع سي فلان؟ اشنوة الكلام هذا؟ متاع هذا احنا؟

– موقع بنك او إدارة أو حاجة. يا سيدي حتى الاستاذ مثلا مخزّن دوفواراته غادي وتتسرب: اشكون نحاسبوا ؟

– ايه . عندك الحق. مالة لازم توفرولنا الانترنيت في الكولاج الكل. اما لتوة ما قتلي اشنية الحاجة الهامة الي ناديتني عليها ؟!!!

(دوّحي يا مباركة بولدك علي، قلت في قلبي)

– لا. شيء شيء. ينوب عليك  جيبلي مفتاح اللابو توة

– سي (…) غادي تاو كي يكمل يجيبو .

– قتلك توة يا سي فلان.

وتبسمت تبسيمة كركم ولعنت ما لعنت في سري.

المهم ما تناصف الثلاثي الثاني كان اكثر الامور ركحت وبدينا نحصدوا في شر فعلنا هههه

استنوا الساعة، موش هذا الاهم ، هاو جايكم في حلقة أخرى وكيما تشوفوا قاعد نختصر ههه

                                        ـ يتبع ـ  

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

عبد القادر ميغري:

أيا بالشوية بالشوية مشات الامور : شوية حزم وشوية مجاملات وبرشة خدمة بصدق

درنا للمزودين : من الستة متاع الصباح  نبيكي قدام المطعم ، كل خضرة موش فرشكة ترجع، وما يخفاكمش عاد تصبح ريحتي بالبصل والفلفل والطماطم والقرع وغيره حاشاكم، وليت نفوح بيهم أصل لانه الخضار يزين السلعة من فوق لفوق، تي ماي النار ماتخليش الميكروبات..  وخلي من المواد الغذائية منتهية الصلوحية او غير المطابقة عاد، ترجع له عالبلاصة، ما تدخلش المخزن أصلا. ووقعنا في أزمة وسلكناها، اللحم متاع الحرب العالمية الثانية يرجع رغم مطبوع ازرق يعمل الكيف ههه الدجاج والعظم مريڤلين..

***

نهار، اثنين، جمعة.. شي، لقوني شاد صحيح، داروا للثنية الاخرى: هدية (موش حاجة أخرى ومن غير ما يمشي مخك بعيد، الراجل طابع في جبينه قد الدينار ) حوت وراطة فرشكة (لتوة غايظتني) سكرت الباب وخليتو لأني حشمت لا نلبّسها على وجهه. كانك من  الخضار  مشيت نهار نشري في الخضرة عجبني حانوت دخلت، الي يبيع فرح بيّ الحق:

 –  ” تفضل سي فلان ووو”

قلت ربما يعرفني من قبل لأني عام 94 / 95 خدمت في معهد بوحجلة .. ايا سيدي نقلو حط كيلو يحط زوز

–  هاهي قتلك كيلو

–  تي لا سي فلان اخترتهم لك، ما تنقّصهمش

حشمت، يقلكش مدير وفالس !!! ايا ما علينا

– احسب متاعك

– خالص

– نعم؟،، اشكون خلصها؟

–  سي فلان مولى الحانوت، ماك تعرفه يزوّد في الكولاج، موصيني عليك. امورك هانية …

– هو بارك الله فيه وموش غريب عليكم الكرم لكن انت اختار : يا تاخذ متاعك بالكامل يا نصلب لك القفة في النصبة

– لا، يهديك ووو.

في الاخر حسبت وحدي وخلصته وتميت خارج. بقات مشكلة الماء، ما يوصلش للمبيت الفوقاني، فكرت في حل: نزيد مضخة تقوي الدفع وهْوَ ما كان لكن بعد مدة تشكّاو الاهالي الي يسكنوا بعد الكولاج من قصان الماء عليهم في الليل وألغينا المضخة وبدلنا جعب أجود وزدنا نظمنا استعمال التلامذة بالتداول بين الطابقين باش ولى الماء يوصل لفوق.

نرجعوا للتغذية: نظافتش الكوجينة وتحسنت الماكلة شوية خاطر سي محمد يذكره بالخير طباخ ماهر ويخدم حتى في الأعراس، وليت ساعات، نقص بونو من عند المقتصد ونمشي نفطر، هذا قبل ما تلتحق بي عائلتي. المرة الاولى ضحك عليّ كي مديتهوله قال لي: “توة هذا كلام !! تخدم في اولادنا وتاكل بالفلوس؟” ، قتله “ناخذ في شهرية ومنحة ومانيش متطوع” وكلامي كان بلهجة حادة شوية، جابلي الوجبة بالوافي والديسار دوبل، كليت وخليت الزايد من غير ما قلت حتى كلمة وخرجت نعمل في دورة على طواول التلامذة، وقعدت مع طاولة منهم كيما يعملوا المساهيل وفدلكت معاهم.. قداش كان إحساس ممتع كي ترى صغير فرحان بيك..

***

من غدوة قبل نصف النهار بشوية بعث لي استاذ رياضة باش نعاين الملعب والنقائص. مشيت. بعدما حكينا نخزر في عباد قاعدة تحت حيط المطعم، مشيت لهم، نلقاهم محلقين على شقايل وماكلة وخيرات يجي سبعة من الناس

 -صحة ليكم

– يعيشك، هيا باسم الله

– بالشفاء، اشكون سيادتكم ؟

– خدامة البلدية، نرفعوا فضلات الكولاج وهانو التركتور غادي

– والماكلة منين؟ (الشقايل نعرفهم)

–  هام الوخيان كي نجوا يسهمونا بشوية صُبّة نقعّدوا قلوبنا، والله ماكلين بيه من صباح ربي ..

– أيا ان شاء الله ينفعكم بركة ههه

 وطول للمسؤول استجواب بعد ما سألته وانا نتبسّم،

قال لي: “تي زواولة ويخدموا عالحضائر تعودنا من سنين نعطوهم باش ما يخلولناش الزبلة مكدسة، هذيكة هي الدنيا سبّق ايدك والحقها”،

قتلو:“مالة الحقها للبيرو العشية خوذ بيها استجوابك”…

ـ يتبع ـ

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

عبد القادر الميغري:

عام 2012/2011 يدڤني المزبس ونقبل خطة مدير لأسباب ليس هذا حينها، وتعينت في كولاج ذو أولوية وفيه مبيت، هو كولاج الإمام سحنون في بوحجلة. باشرت في أجواء ثورية، كنت استعدت القدرة على الحلم وجاي باش نبدل ونكون فاعل ومؤسس لواقع جديد وتونس أفضل على قول الشهيد.

دخلت بعقلية نصلّح ونغيّر ونبدل لكن موش بعيد عن النظريات والكتب. المؤسسة فيها برشة خراب من كل النواحي. المدير السابق جاني للدار يذكره بالخير ونصحني:”سيب عليك، راهي تتعّب” وعطاني بسطة صغيرة لكن انا كنت نحب نبدل… ودوب وصلت تعرفت عالإطار وعملت اجتماعات بكل الاسلاك والتمست التعاون ووو. وبعد طلّيت على كل أجزاء المؤسسة وسجلت النقائص في التجهيزات والبنية التحتية وكتبت تقرير مفصل للمندوب. ومن جملة ما لاحظته وحكوهولي ارتفاع نسبة الانقطاع: الكولاج يبدا بـ950 تلميذ يكمل العام بـ600.

وهذا كان مطابق للدراسة الي عملتها قبل حول بوحجلة ومن جملة ما فيها تجاوز نسبة الأمية 40% وقت ترشحت للمجلس التأسيسي. وأهم أسباب الانقطاع هو صعوبة التنقل لانها معتمدية مترامية الأطراف والكار ما توصلش للبلايص الكل، والتلامذة برشة منهم يعتمدوا النقل الريفي. وبره عاد لايزّي من صعوباته وتكلفته ومشاكله لا يزي من الخصاصة والبطالة ..

***

وكان ثمة مبيت مسكر. هوما زوز مبيتات للاولاد وزوز للبنات. المسكر للذكور. درت فيه وشفته نلقاه موش ناقص حاجة كبيرة: شوية جراري والفروشات متوفرة. يستحق دهنة ورتوش في الكهرباء والماء. والمدير السابق سكره لنقص القيمين. المغازة فيها كل شيء متوفر وثمة جمعية العمل التنموي فيها فلوس. طول استأذنت وبديت نصلّح وجبت الحماية المدنية وخذيت شهادة. نبقى للعشرة متاع الليل واقف عالأشغال، عندي قريب الخمسطاش خدام عالحضاير ساعتها. ركحناه وحضّرنا غرفة القيم وشرينا دبوزة المطافئ… وحضر المبيت قبل نهاية سبتمبر وقبلنا عدد باهي من التلامذة وفق معايير واضحة ومعلنة . وكان العمل هكاكة.

***

في نفس الوقت لاحظت انه جبل من الكراسي والاثاث المهشم محطوط في مدخل الكولاج. منظره خايب. بعثت مراسلات للمجلس الجهوي باش نتخلصوا منه بالبيع أو الإتلاف لكن لا حياة لمن تنادي.. والقاعات تشكو نقص في التجهيزات. اش عملت؟ ثبتت في الكدس نشوف فيه باااارشة ما يتصلح: كرسي والا طاولة ناقصة فيسات. حاجات بسيطة المهمّ. عيطت لعامل من عمال الحضائر قالولي بريكولور ، يعس في الليل وكلّفته بالتصليح ونعطيه على كل قطعة 500 مليم، من جيبي طبعا ههه. قداش طلّعنا منه هاك الكدس؟ شدوا عندكم: 120 كرسي، 14 بنك، 80 طاولة فردية، 6 طواول كبار، 60 طاولة زوجية حطيناهم في ثلاثة قاعات الفوق بأقل تڤربيع على الطابق الأرضي.. وهكاكة تحلت برشة مشاكل.

***

درت للمطعم: كوجينة إينوكس إيطالية من أفضل ما ثمة لكن مزططة بالوسخ والصغيرات ياكلوا في صحون بلاستيك متين مشتركة والصحن قاعه أسود ما ترضاشو للكلب، وقباصن الماء أليمنيوم مذرح قاعه أبيض بالخزّ وكيسان القهوة بلاستيك والمغارف تعيّف.. لجأ إليها السابقون لانها ما تتكسرش لأنهم جربوا البلاّر ياخي كل يوم تطيح عرصة صحون من يد الخدام وكل يوم اشري من جديد، ماش تقلي ماو البلاطوات؟ الخدامة رافضينهم لأنه غسلانهم يتطلب برشة وقت وهوما عددهم قليل، اقترحت نزيدهم من عمال الحضاير رفضوا قطعيا.. اذن اش عملنا ؟

حملة على الكوجينة : ما ثماش عطلة نصف ثلاثي كان ما تنظاف عالاخر وترجع للأصل لأنهم تعودوا يصلّعوا مع التلامذة. وكان العمل هكاكة: في ثلاثة ايام رجعت جديدة وتدهنت، ومن فلوس الجمعية يتبدل كل شي اينوكس ويرجعوا البلاطوات. ماش تقولوا هايل؟.. نقلّكم لا، مازال الخير القدام..

***

احنا هكاكة ويهيج البغبش (كل جهة واش تسميه وأكيد فيكم الي ما يعرفوش) على مكاتب ادارية والمبيت ويهيج القمل عالتلامذة. والدواء مخطر وفيه مسؤولية: سبت عشية وأحد رشّينا المكاتب والمبيتات وطلبنا إرسال فريق الصحة المدرسية. ماجاش. رغم انهم مطالبين بعيادة إجبارية في بداية السنة الدراسية. عاودنا ثلاثة مرات، في الاخر المندوب سي عبدالجليل صيود يذكره بالخير يعدي المراسلة للمدير الجهوي للصحة، يعطيهم صطاكة جاوا يجروا، وخبّوهالي ههه.. تاو نقلكم كيفاش في الحلقة الجاية.. ايّا خرجنا التليمذات الي عندهم المشكلة وواصلنا الخدمة..

***

درنا للقاعات: زوز مخابر إعلامية أكثرهم معدوم، ضغطنا دبّرنا مخبر كامل جديد، حاولنا توفير مواد العمل في مخابر الفيزياء وما نجمناش. ركزنا على نظافة القاعات وولاّت مناكفات بين المترسمين وعمال الحضاير. المترسمين ما عادوش يحبوا ينظفوا والاخرين متبوربين شوية. من جهة أخرى الوحدة الصحية للتلامذة قاعدة تتبدل بكلها وبره هكاكة بره هكاكة سارت الامور رغم ان الوضع كان مشحونا في البلاد والكلها ثوريين حمر عالاخر ، وخاصة متاع الشُعب المهنية الي ولاّو نقابيين ويعرفوا منين يتّاكل كل شي موش كان الكتف…

ملاحظة : طولت عليكم لكن موش هذا الأهم

ـ يتبع ـ