راجل و سيد الرجال
“قراية”
نشرت
قبل 3 أشهرفي
من قبل
ياسين الرباعي Yassine Rebaï![image5 جلنار Jollanar](https://inforum-jollanar.com/wp-content/uploads/2024/06/image-5.png)
ياسين الرباعي:
برة عاد توة شيحزنا من حفظتشي وجيب كراستك وايجا وشعطاكم المعلم … الحاصيلو اهو بدى الضرب عندي والمرا بعد ما تحفظ الصغار نعرضلها انا والحق حافظة كل شي ناقصة شوية في التعبير الشفوي وبرة وممكن الي عندها اضافة سمحة تعجب المعلمة اما المعلم عليا بالله طول يعطيها صفر وثلاثة شهور حبس ، كيف ايجا لهون وانت رقيقص كيف بوك ، والا ماشي تقتلوني بالحركة وما تسمعوش الكلام كرهتكم انتم وبوكم فرد نهار …
![ياسين الرباعي جلنار Jollanar ياسين الرباعي](https://inforum-jollanar.com/wp-content/uploads/2023/01/ياسين-الرباعي.jpg)
وانا هكك وجاني ولدي يسأل فيا على تمرين في الايقاظ ايا قلت خلي نعاونو وعلى الاقل الموجيرة ما تقعدش تڨرڨر في انت موش لاهي بيهم والي عطاك على الكورة والقهوة وهات من هاكة اللاوي ، دوب ما حليت الكتاب وبسم الله المانع الستار دخلت وقاتلو بالله شيعرف منو بوك خلي نكمل مسحان الدار ونجيك وغير تعفصولي حزامي تقسم وانا نمسح ، قلتلها كمل ميسالش توة نقريه انا ،
قاتلي اهاه باش تطلعوا كيفكم وين تعرف عليه انت كانو فالح راهو جاء من بارح ، نحبوا قاري كيف خوالو اهو نقلك
، اهاه خوالو في النازا يخدموا قلتلها اما في قلبي الحق خاطر كان سمعتني شيحزنا وقتها ،
ايا لعنت الشيطان وقمت قلنلها ايا انا خارج نجيبشي حاجة في يدي ، قاتلي بالله وين عندك تخرج ما تشوفش فيا حايسة عوض تشد تقري صغارك وتعاون ما فيبالكش الامتحانات قربوا
– يا بنتي موش تحبهم قاريين لخوالهم بالكشي نفسدلك برنامجك انا ،
كهو عاد خرجت اتمتم ندرا شتقول وما فهمت منها كان كيف تشيح الدار خرج الزبلة في يدك والليلة احد جيبلنا العشاء من البرة ماشي نقري الصغار ما عيني في تطيب واعمل حسابك خليلي فلوس الايتيد نعطيهم لصغارك يخلصوا المعلمين خير ما يعملوا عليهم بونتو ويطيحوهم في الامتحان وفرد مرة حطلي باش ناخذ صباط الدنيا سخنت ونمشي بصباط الشتاء قدام المكتب شي يحشم من فوزية وسعاد وسامية بعدلي هاكم هوما يمشيوا ولسانهم يمشي وديما لابسين وهزهم للمدار وصدّرهم وانا غير يعرفوا المعلمين والمدير وطولك يا نهار قدام المكتب وفرد مرة يتكلموا على صغارك والا ما حبني في خليقتهم …
ذقمت انا قلتلها توة لازم تحرق الفيلم ، انا فيبالي ناخذلك دماق بمناسبة عيد الامهات ، ايا اوكي جات بطبيعتها ،
ويا كلمة الشوم !
قاتلي دماق هكة ؟ بالكشي اميمتك انا والا حناتك ، خليه عندك وكان تحب تجيبلي بالحق جيبلي فردة والا سلسلة بالمجارة كيف راجل فردوس اختي ، والا حقة شجابك انت لراجل فردوس ، هاكة يعرف كار المارا موش كيفك قلي دماق ايا شعندنا فيه جيبو الدماق وتوة نعطيه لامي وانت دبر راسك مع امك خوذلها قرطاس وشق والا سبحة تتلهى بها وتعتقني شوية وهي ما عاجبها فيا شي لقاتني ساكتة والله نشهدلها مرت خوك حاكتلها فمها وهي شاربتها عسل.
ايا لقيتشي ما نحل على روحي ها النهار هات هاكي الزبلة خلي نخرج واتلهى انت بولدك فمشي ما يخلط على خوالو في النازا
![Motifs 4 جلنار Jollanar Motifs 4](https://inforum-jollanar.com/wp-content/uploads/2024/02/image-4-e1710880768731.png)
تصفح أيضا
![image جلنار Jollanar](https://inforum-jollanar.com/wp-content/uploads/2024/07/image-30.png)
ياسين الرباعي:
_ ايا عجبكشي المحمص الصيفي متاعي
* فاوح يعطيك الصحة
![ياسين الرباعي جلنار Jollanar ياسين الرباعي](https://inforum-jollanar.com/wp-content/uploads/2023/01/ياسين-الرباعي.jpg)
_اهاه نعرفك تقلي هكك وبرة
* لا والله مهم عجبني
_ ايه اما تلقاك يعجبك محمص امك خير
* كل واحد وبنتو اوكة امي تفوحوا وتحرحروا ويجي بنين بالحق
_ اكاهو انت بلي نعمل ونطيب ما يعجبك كان تطيب امك ، برة صير كول عند امك نستاهل فيبالي نطيبلك وما نخليك شاهي شي
* لا يا روحي والله حتى تطيبك فاوح
_ اهاه فاوح هاكة علاش ما كملتش صحنك ياخي متعلم تفضل صحنك انت
* لا هاكة خاطر عملت تحريشة الصباح وقت هبطت اوكي رجعتني على الفطور
_ تاكل البرة وحدك ديما لا مرة قتلي نخرجوا بتي داج والا هزيتني كليت حاجة معاك وحتى تشوف عاد شكون هزيت معاك توكلها
* ما هزيت حد لقيت روحي جعت مشيت عملت ربع تن عند الصحبي الصباح
_ باهي نزيدكشي محمص اوكة بارد وما يعملش الجاير وموش حر كيف محمص امك ينقب الماعدة اللطف
* شبعت الحمد لله
_ باهي توة نسخنوه في العشاء يجي يشره
* تحبشي نكلم امي نمشيوا نتعشاوا عندها يا روحي وخلي المحمص نعديوه لامك تذوقوا ما فيها باس
_ باهي علاش ما نتعشاوش عند امي احنا ماشين ماشين وانت تحرحط كان على داركم تقول شعملتلك امي
* تعرفشي انا ماشي للقهوة وما عيني في عشاء ولا نمشي لحتى دار
_ اكاهو الي عطاك على القهوة كرهتك انت وياها تمشيلها وتلوحني في الدار وحدي برة يرزيكم فيها ها القهوة
* باهي انا قاعد هات نلقاوشي فيلم في التلفزة والا حطلنا الجزيرة
_ لا فيلم لا جزيرة يعطيهم تنطيرة هات الكومند لهوني مسلسلي التركي عدك بيه يبدى خير ما تفوتني حلقة الليلة …
* باهي انا البرة في الفيراندا
– مالا عاد تخنس وحدك بالتلفون والفيس بوك فرصة
* لا فيس بوك لا فيس امك انا ماشي نتمغط نرقد والعشاء محمص وقهوة الصباح محمص كان فضل زادة ، بعدلي برجي بالمحمص نخليه في بيت النوم نلقاه في الكوجينة ….
– نسمع فيك راهو بالله شتمتم وشتقول
* لا قلت ماشي نتبع معاك المسلسل وقيلا باهي يظهر …
![Motifs 4 جلنار Jollanar Motifs 4](https://inforum-jollanar.com/wp-content/uploads/2024/02/image-4-e1710880768731.png)
![image13 جلنار Jollanar](https://inforum-jollanar.com/wp-content/uploads/2024/08/image-13.jpg)
يس الرباعي:
في عرس صاحبي التوفيق قلنا نمشيوا للحمام مع العروس، ايا قول وصلنا للحمام، دخلنا وخذينا مفتاح المرفع الي نخليوا فيه الدبش وطلعت للسطحة عفصت على ساق واحد ملهْوث في فوطة وراقد ياخي قام قلي ماهو حل حبوبك الواحد ما ينجمش يعمل غمضة بعد الحمام في ها البلاد؟
![Yassine Rebai جلنار Jollanar](https://inforum-jollanar.com/wp-content/uploads/2024/07/Yassine-Rebai.jpg)
يا خويا سامحني والله لا ريتك حبيت نتعدى نخلي دبشي …
المهم طلع متسامح وقلي الله يلعنك يا شيطان ، نحيت دبيشاتي ولبست شورط الحمام هاكة الاديداس المخطط الساتان ودخلنا وجاني مسؤول الاستقبال قلي طياب خويا؟ قتلو مالا عاد اللازم لازم، وحطلي استيك في يدي فيه صوردي منقوب ورقم 6 قلي هاك عند البزويش ، ايا لبست القبقاب وهزيت الكرتل طول عبيتو بالماء السخون قلت نغطس سويقاتي.
وانا في بيت السخون ودخلت وطول تقول دخلت للحادث بريحة الفليو ، يا جماعة على سلامتكم ياخي اشنية ها الريحة شفمة غمزني واحد وفهمت الي السبد الي قاعد في فم الباب قد الفرتون وموشم مدخل معاه دبوسة فليو ويدور دورة ويصب على لحمو ويفرك ويقلب عليه سطل ماء ، كنت ماشي نكلمو لقيتو سبقني وغزرلي وقلي سافا العزيز ؟ قتلو ساااافا صحة لخويا ،
ايه ما نطولش عليكم خرجت من غادي مزنزن بالسخانة والخنقة متع الفليو ومشيت للبزويش ايا يا معلم جاشي دوري ، قلي اهو مازال واحد قدامك زيد اسخن ، تقول فوزي البنزرتي ماشي يعمل شنجمون وقلي اسخن …
عاودت دخلت وجاب ربي هاكة الفرتون خرج من بيت السخون وعملت فيها سبورتيف وليت نمسكل والناس داهشة فيا وانا تحليت عاد وليت عامل فيها فندام ، وخرجت للبزويش استلمني الحق بضحكة وقلي خليك على كرشك ، يا ولدي كيفاش توة يصير هذا؟ قلي ايا عاد ما تعطلنيش ، وشماشي يعمل الميت قدام غاسلو تمديت ونحس بجثة طلعت ترفس فيا بسقيها ويقلي سيب روحك ونسمع كان في العظم كل عظمة ترطق وحدها وانا نتحمل نوليشي نعيط والناس يضحكوا ويقولوا ولد ناناتي ،
كمل رفس لين شبع ودورني على ظهري وبدى يجبد في الرقبة يا بزويش يهديك حاشتي بها راني يقلي ريض وسيب روحك خلي تدلك بالباهي وبعد دار يد يد ساق ساق اهو عوجهم اهو جبدهم واهو يحك ويبرم ويرمي البروم قدامي زعمة زعمة اهو الوسخ ويختمها بعد كل فركة بضربة تقول يخبط في قرنيطة وجبد هاكي الكاسة الي تقول عليها بروس ميتاليك وبدى النبي مولاك ووخيكم مع كل جبدة يذوب وساكت موش خوف اما ما فمش جهد باش نتكلم واخر المتمة قلب عليا سطل ماء وقلي ايا صحة ،
اما صحة وخي وانت خليت فيا صحة ودخلت للمطهرة نعمل تشليلة وخرجت ما نشوف في شي في مخي كان نعفصشي مرة اخرى على هاكة الراقد ويقوملي وانا موش ناقص عاد يكملشي على مرمتي ، وتمديت في السطحة ونسمع كان صحة خويا كوكا والا بوڨا؟ ياخويا كويس ماء يرحم بوك فيه البركة ، قلي دبوسة ماء بالفين ، باهي هاتها فمشي ما ينفخ ربي في صورتي ، وبردت شوية ولبست دبيشاتي ولبست بشكير في راسي خايف من الهواء تجينيشي زفة ريح زادة في جرة ها الحمام ،
ايا دخلت للدار ونلقاها برود تشره وريحة البخور عجعاجي والمرا ظهرلي كيفلي مبدلة شوية بالمكياج والافاح … ايا صحة صحة شبيك بطيت تحبشي قهيوة والا كاس تاي ، ايه شبيه هات قهوة لا يقطعك ، هكك وخذاتني عيني لين جات قاتلي في الريح صار كبيت انت؟
فقت مفجوع نسخايب هاكة قباض الارواح متع الحمام الطياب لحق عليا للدار وقلتلها والله لا يد لا ساق راني. خليني نتمغط هوني ونرقد وبرة ، ايه لا توة نغطيك تعيا وانت تستنى وانا محضرة روحي فيبالي ، يا سلسبيل جيب غطي بوك خلي نمشي نكمل المسلسل والمحروم محروم …
![Motifs 4 جلنار Jollanar Motifs 4](https://inforum-jollanar.com/wp-content/uploads/2024/02/image-4-e1710880768731.png)
![image جلنار Jollanar](https://inforum-jollanar.com/wp-content/uploads/2024/08/image-14.png)
يس الرباعي:
– ابويا بويا ، هات عشرين نلف نمشيوا ناكلوا ڨلاس
– يخلي دار امك لين عشرين نلف ماشي تشري الحانوت ياخي؟ اهم الفين جيبنا جيرفاي ناكلوه هوني
![Yassine Rebai جلنار Jollanar](https://inforum-jollanar.com/wp-content/uploads/2024/07/Yassine-Rebai.jpg)
– شمعنتها جيرفاي نحب ڨلاس انا
– الجيرفاي جيلاط بالعصا يعطيك عصاء على جنابك
– اللطف عليه من العصا وليدي عوض تقلو توة نهزوا امك وناكلوا الجيلاط مع بعضنا وتخرجني نبدل الجو وانا محبوسة طول النهار لا نخرج لا ندخل نغسلك في سحاقك انت وصغارك ونطيبلك … تقلو عصا ، زايد والله زايد نعرف سعدي راقد معاك انا
– وين تخرج قلك بعشرين نلف هو واختو برك نمشيوا معاهم لازمني نبيع الموبيلات باش ناخذلكم الجيلاط ، بالله قوم قلم هاكي الدلاعة واغسلنا حارة هندي واكدس اهو برود يشره على الفيراندا
– اما فيراندا ياخي نسيت انت الليلة نزول نادين بنت شافية جارت الطيب خويا والمارا مستدعيتنا وتحلف وتعاود نمشيوا ، ايا قوم حدد سوريتك وسروالك ما بين حضرت انا
– بالله شهزني للنزول جلوة وقدم قدم وتكسير راس اهو ولدك توة يهزك مشوار بالموبيلات وخليني هون انا
– مالا عاد ياخي اول مرة تعملهالي تبعثني وحدي كيف الهجالة؟ ورحمة بويا العزيز الغالي قريب نعيط فيها وووه ايا قوم ها الليلة خيرلك
– الله لا يعطينا ما يغلبنا ، انا قايم برة ابدى احضر اوكي سوريتي الساتان المنورة بالاصفر محددة من العرس الي فات وتوة نلبس سروالي الاخضر
– توة نندب والا نستنى حتى يتلمدوا ، تدخل معايا للجنان هكة تقول داخل معايا حبوبة والا محسن الرايس ، توة نحضرلك انا دبشك كيف راد عليا ربي وانا اهو ما لقيت ما نلبس دبشي الكل راوه عليا ، اسمع ما يهمنيش الليلة تتعدى ماهو نزول انا غدوة الحفلة هبطني الصباح نشري روبة بالوهرة كيف النساء
– يا خليل يا خليل هاكة متع الجيلاط بو عشرين نلف يخدم ماهو غدوة الليل، خلي نمشيولو والله شهيتني ناراه وتوة نهزوا امك معانا خير من العرس …
![Motifs 4 جلنار Jollanar Motifs 4](https://inforum-jollanar.com/wp-content/uploads/2024/02/image-4-e1710880768731.png)
استطلاع
صن نار
- ثقافياقبل 17 ساعة
نقابة المهن الموسيقية تكرّم لطفي بوشناق ونجوم الفن التونسي
- جلـ ... منارقبل 17 ساعة
“الملاك يهبط في بابل”
- اقتصادياقبل يوم واحد
الجديد في معرض السياحة والعمرة الدولي
- رياضياقبل يومين
رئيس النادي الصفاقسي السابق منصف خماخم في ذمة الله
- راجل و سيد الرجالقبل يومين
“محمّصة”
- رياضياقبل يومين
تصفيات كان 2025… تونس في الثانية الأخيرة!
- صن نارقبل يومين
دبلوماسي سابق رئيسا لوزراء فرنسا… واليسار يتهم “ماكرون” بسرقة الانتخابات
- صن نارقبل يومين
عرب فلسطين المحتلة… اضراب عام أول أكتوبر تضامنا مع غزة